ફલાઇટની જેમ રોજે-રોજ બદલાશે ટ્રેનનાં ભાડાં ?

રેલવેમાં ફ્લાઇટ જેવી ડાયનેમિક સિસ્ટમ લાવવા પ્રસ્તાવ

તહેવારોમાં વધુમાં વધુ 25% વધારો, ઑફ-સીઝનમાં 10થી 25% સીધી છૂટ મળશે

ચાર્ટ બનવાના 24-48 કલાક પહેલાં 30% સીટો ખાલી હશે તો સસ્તી ટિકિટ અપાશે

ભારતીય રેલવે પોતાના દાયકાઓ જૂના પરંપરાગત ભાડા માળખા અને ફ્લેક્સી-ફેર સિસ્ટમમાં ધરખમ ફેરફાર કરવાની તૈયારી કરી રહી છે. વિમાન મુસાફરીની જેમ હવે માંગ અને પુરવઠાના આધારે ટ્રેન ટિકિટના દરો નક્કી કરવા નવી લવચીક ભાડા નીતિ અંગે વિચારણા ચાલી રહી છે. આ નવી વ્યવસ્થા મુજબ તહેવારો કે પીક સીઝનમાં વધુ ભીડ હોય ત્યારે પણ બેઝ ફેરમાં ૨૫ ટકાથી વધુ વધારો કરી શકાશે નહીં, જેથી મુસાફરો લૂંટાતા બચશે. સાથોસાથ ઓફ-સીઝન કે ઓછી માંગવાળા રૂટ પર મુસાફરોને ૧૦થી ૨૫ ટકા સુધીનું ફ્લેટ ડિસ્કાઉન્ટ મળશે. આ બેવડી નીતિથી બજેટ પ્રવાસીઓને સસ્તી મુસાફરી મળશે અને રેલવેની આવકમાં પણ નોંધપાત્ર વધારો થશે. આંતરિક અભ્યાસમાં સામે આવ્યું છે કે તહેવારો સિવાય સામાન્ય દિવસોમાં દેશભરની પ્રીમિયમ અને એક્સપ્રેસ ટ્રેનોમાં ૧૫થી ૨૦ ટકા બેઠકો ખાલી રહે છે. દિલ્હી-ભોપાલ, મુંબઈ-અમદાવાદ અને બેંગલુરુ-ચેન્નાઈ જેવા વ્યસ્ત રૂટ પર પણ અઠવાડિયાના દિવસોમાં ૩૦ ટકા એસી થર્ડ અને સેકન્ડ ક્લાસ સીટો ખાલી જાય છે. આ સ્થિતિ નિવારવા એવી જોગવાઈ વિચારાઈ રહી છે કે ચાર્ટ તૈયાર થવાના ૨૪થી ૪૮ કલાક પહેલાં જો કોચમાં 30 ટકાથી વધુ સીટો ખાલી હશે, તો સિસ્ટમ આપમેળે ૧૦થી ૧૫ ટકા ડિસ્કાઉન્ટ આપી દેશે. જ્યારે સતત ઓછો ટ્રાફિક ધરાવતા રૂટો પર છેલ્લી ઘડીએ ૨પ ટકા સુધીની છૂટ અપાશે. આ આકર્ષક સ્કીમથી મધ્યમ વર્ગ અને વિદ્યાર્થીઓને ફાયદો થશે તેમજ બસ કે ફ્લાઇટના મુસાફરો ટ્રેન તરફ વળશે.

ખાલી સીટો ભરવા માટેનો માસ્ટર પ્લાન
ઓછી માંગવાળી ૫૦૦થી વધુ ટ્રેનોમાં મુસાફરો ૭૦% ઘટે છે. રેલવે છેલ્લી ઘડીએ ૨૫% સુધી ડિસ્કાઉન્ટ આપી ઓક્યુપન્સી ૧૦૦% સુધી પહોંચાડવા મંથન કરી રહી છે. આ ખાલી સીટો ભરવા માટેનો તેમનો માસ્ટર પ્લાન છે.