રશિયાનો સૌથી મોટો જવાળામુખી ફાટયો: વિસ્ફોટથી આકાશમાં જવાળાઓ ઉછળી

-જવાળામુખી ફાટવાને પગલે એરલાઇન સેવા ઠપ્પ થઇ શકે છે

પૂર્વી રશિયાના કામચાટકા દ્વીપકલ્પમાં શિવલુચ જ્વાળામુખીના વિસ્ફોટથી આકાશમાં જ્વાળાઓ ઉછળી રહી છે. આખું આકાશ લાલ દેખાઈ રહ્યું છે. આ સાથે રાખનો ઢગલો 10 કિમીની ઉંચાઈ સુધી ફેલાયો છે. આકાશમાં રાખના કારણે હવાઈ વાહનવ્યવહાર માટે ખતરો ઉભો થયો છે. આ કારણે રશિયામાં એરલાઇન સેવા ઠપ થઈ શકે છે.

કામચટકા જ્વાળામુખી વિસ્ફોટ પ્રતિભાવ ટીમ (KVERT) એ એરક્રાફ્ટ કામગીરી માટે રેડ કોડ ચેતવણી જારી કરી છે. જ્વાળામુખી વેધશાળાએ ઉડ્ડયન સૂચના જારી કરીને જણાવ્યું છે કે, વિસ્ફોટ સ્થળથી “મોટા રાખ વાદળ” પશ્ચિમ તરફ આગળ વધી રહ્યા છે. આકાશમાં 15 કિલોમીટરની ઊંચાઈએ રાખનો વિસ્ફોટ થઈ શકે છે.

રોઇટર્સના અહેવાલમાં જણાવાયું છે કે, KVERTએ કહ્યું છે કે આકાશમાં 15 કિલોમીટરની ઊંચાઈએ રાખનો વિસ્ફોટ ગમે ત્યારે થઈ શકે છે. આનાથી આંતરરાષ્ટ્રીય ફ્લાઇટના સંચાલન પર ખરાબ અસર પડી શકે છે. મ્યુનિસિપલ પ્રદેશના વડા ઓલેગ બોંડારેન્કોએ જ્વાળામુખી ફાટી નીકળવાની આસપાસની શાળાઓ બંધ કરવાનો આદેશ આપ્યો છે અને સ્થાનિકોને ઘરની અંદર રહેવા કહ્યું છે, અહેવાલમાં જણાવાયું છે.

અધિકારીએ જણાવ્યું કે, જ્વાળામુખી ફાટ્યા બાદ રાખના વાદળો ક્લ્યુચી અને કોઝીરેવસ્કમાં ફેલાઈ ગયા છે. રોઇટર્સે અહેવાલ આપ્યો છે કે આ બંને ગામો વિસ્ફોટ સ્થળથી 70 કિમીથી વધુ દૂર છે. શિવલુચ એ રશિયાના સૌથી મોટા અને સૌથી સક્રિય જ્વાળામુખી પૈકીનું એક છે, જેમાં છેલ્લા 10,000 વર્ષોમાં અંદાજિત 60 વિસ્ફોટ થયા છે. છેલ્લો મોટો વિસ્ફોટ 2007માં થયો હતો.