રાજકોટના અમીન માર્ગ પર RMCનું ડ્રેનેજ ટ્રક ખાડામાં ફસાયું

ખોદકામ બાદ રસ્તાનું યોગ્ય પુનઃસ્થાપન ન થતાં સર્જાઈ મુશ્કેલી

ટ્રાફિક જામથી વાહનચાલકો પરેશાન, સ્થાનિકોમાં રોષ

ખાસ ખબર ન્યૂઝ  રાજકોટ

રાજકોટના અમીન માર્ગ વિસ્તારમાં શનિવારે રાજકોટ મહાનગરપાલિકા (RMC)નું ડ્રેનેજ વિભાગનું ટ્રક રસ્તા પર આવેલા ખાડામાં ફસાઈ જતાં સ્થાનિકો અને વાહનચાલકોને ભારે હાલાકીનો સામનો કરવો પડ્યો હતો. ઘટનાએ ફરી એકવાર શહેરમાં ખોદકામ બાદ રસ્તાઓના યોગ્ય સમારકામ અંગે તંત્રની કામગીરી સામે પ્રશ્નો ઊભા કર્યા છે.

મળતી માહિતી મુજબ, અમીન માર્ગ પર અગાઉ ડ્રેનેજ સંબંધિત કામગીરી માટે ખોદકામ કરવામાં આવ્યું હતું. જોકે, ખોદકામ પૂર્ણ થયા બાદ રસ્તાનું યોગ્ય અને મજબૂત પુનઃસ્થાપન કરવામાં ન આવતા જમીનનો ભાગ નબળો બની ગયો હતો. પરિણામે ડ્રેનેજ વિભાગનું ભારે વાહન ત્યાંથી પસાર થતાં જ તેના ટાયર જમીનમાં ધસી ગયા અને ટ્રક ખાડામાં ફસાઈ ગયું હતું. ટ્રક રસ્તાની વચ્ચે ફસાઈ જતાં અમીન માર્ગ પર થોડા સમય માટે ટ્રાફિકની સમસ્યા સર્જાઈ હતી. વાહનોની લાંબી કતારો જોવા મળી હતી અને વાહનચાલકોને વૈકલ્પિક માર્ગોનો ઉપયોગ કરવાની ફરજ પડી હતી. ઘટનાની જાણ થતાં મહાનગરપાલિકાના અધિકારીઓ અને કર્મચારીઓ સ્થળ પર દોડી આવ્યા હતા અને ટ્રકને બહાર કાઢવા માટે ભારે જહેમત ઉઠાવવી પડી હતી. સ્થાનિક રહેવાસીઓએ આ ઘટનાને તંત્રની બેદરકારીનું પરિણામ ગણાવતાં રસ્તા સમારકામની ગુણવત્તા સામે અસંતોષ વ્યક્ત કર્યો હતો. સ્થાનિકોના જણાવ્યા અનુસાર શહેરના વિવિધ વિસ્તારોમાં ડ્રેનેજ, પાણી અને અન્ય કામગીરી માટે વારંવાર ખોદકામ કરવામાં આવે છે, પરંતુ ત્યારબાદ રસ્તાઓનું યોગ્ય સમારકામ કરવામાં આવતું નથી. જેના કારણે થોડા જ સમયમાં રસ્તા બેસી જવાના અને ખાડા પડવાના બનાવો બનતા રહે છે.

આ ઘટનાએ ખાસ કરીને પ્રિ-મોન્સૂન કામગીરીના તંત્રના દાવાઓ પર પણ સવાલ ઊભા કર્યા છે. ચોમાસુ નજીક આવી રહ્યુ છે ત્યારે શહેરમાં રસ્તાઓની સ્થિતિ, ખાડાઓનું સમારકામ અને વરસાદી પાણીના નિકાલની વ્યવસ્થાને લઈને તંત્ર સતત કામગીરીના દાવા કરી રહ્યું છે. પરંતુ અમીન માર્ગ પર બનેલી આ ઘટના તે દાવાઓની વાસ્તવિકતા પર પ્રશ્નચિહ્ન મૂકે છે. સ્થાનિકોમાં એવી પણ ચિંતા વ્યક્ત કરવામાં આવી રહી છે કે ચોમાસા દરમિયાન આવા ખાડાઓમાં વરસાદી પાણી ભરાઈ જવાથી તેની ઊંડાઈનો અંદાજ લગાવવો મુશ્કેલ બની શકે છે. જેના કારણે વાહનચાલકો માટે અકસ્માતનું જોખમ વધી શકે છે. ખાસ કરીને રાત્રિના સમયે અને ભારે વરસાદ દરમિયાન આવી સ્થિતિ વધુ જોખમી સાબિત થઈ શકે છે. સ્થાનિક રહેવાસીઓએ મહાનગરપાલિકા તંત્રને શહેરમાં ખોદકામ બાદ કરવામાં આવતી રસ્તા પુનઃસ્થાપન કામગીરીની ગુણવત્તાની તપાસ કરવા તેમજ ચોમાસા પહેલાં તમામ જોખમી ખાડાઓનું તાત્કાલિક સમારકામ કરવાની માંગ કરી છે, જેથી ભવિષ્યમાં આવી ઘટનાઓ અને સંભવિત અકસ્માતો અટકાવી શકાય.