ખાસ-ખબર ન્યૂઝ પોરબંદર
પોરબંદર જિલ્લામાં મોસમનો પ્રથમ વરસાદ ગત વર્ષની સરખામણીએ એક દિવસ મોડો નોંધાયો છે. જોકે ગરમીથી ત્રસ્ત બનેલા પોરબંદર માટે આ વરસાદ રાહતરૂપ બન્યો છે. સોમવારના રોજ એટલે કે 16 જૂનના દિવસે જિલ્લાભરમાં ધોધમાર વરસાદ વરસતાં તાપમાનનો પારો એક ઝાટકે 5.1 ડિગ્રી નીચે ફસકાતાં ઠંડક પ્રસરી હતી. જિલ્લામાં આજે અડધાથી લઈ બે ઇંચ સુધી વરસાદ નોંધાયો છે. રવિવારે મહત્તમ તાપમાન 34.9 ડિગ્રી હતું જે સોમવારે વરસાદ બાદ ઘટીને 29.8 ડિગ્રી પર પહોંચ્યું. લઘુતમ તાપમાન પણ 29.4 ડિગ્રીમાંથી ઘટીને 27.8 ડિગ્રી નોંધાયું છે. સવારથીજ પવન અને વાદળી આકાશ વચ્ચે 11 વાગ્યાની આસપાસ વરસાદે માહોલ બદલી નાખ્યો હતો. ત્રણેય તાલુકા તેમજ ગ્રામ્ય વિસ્તારોમાં વરસાદી માહોલ સાથે ઠંડક પ્રસરી હતી.
- Advertisement -
પોરબંદર શહેરના છાંયા ચોકી રોડ, ગોઢાણીયા કોલેજ રોડ અને ભાજપ કાર્યાલય પાસે વરસાદી પાણી ભરાતા સ્થાનિકોને તકલીફોનો સામનો કરવો પડ્યો હતો. મનપાના ઈજનેર જયદીપસિંહ રાણાએ સ્થળ પર પહોંચી તાત્કાલિક ગટરની સફાઈ કામગીરી હાથ ધરી હતી. પ્લાસ્ટિક અને ચરાની અવરોધિત નિકાસને દૂર કર્યા બાદ પાણીની સ્થિતિ સામાન્ય થઈ હતી. જોકે દોઢ કલાક સુધી રસ્તાઓ પર પાણી ભરાયેલા રહ્યા હતા.
બરડા પંથકમાં ધમાકેદાર વરસાદ, ખેડૂતોએ રાહતનો શ્ર્વાસ લીધો
બરડા પંથકમાં સવારે 10 વાગ્યાથીજ વરસાદનું ગાજવીજ સાથે ધમાકેદાર આગમન થયું હતું. બખરલા, કાટવાણા, નાગકા, ખીસ્ત્રી, બાવળવાવ, બેરણ જેવા ગામોમાં ભારે વરસાદ પડ્યો હતો. કોઝવે પર પાણી ફરી વળતાં કેટલીક જગ્યાએ ટ્રાફિક અવરોધ થયો હતો. સીમાણીથી બેરણ જતા રસ્તા પર વાહન ચાલકોને મુશ્કેલી પડી હતી. મગફળીના આગોતરા વાવેતર માટે આ વરસાદ ખૂબ લાભદાયી સાબિત થશે તેમ ખેડૂતો દ્વારા જણાવાયું હતું.
- Advertisement -
કૃષિ કામગીરી માટે અનુકૂળ માહોલ સર્જાયો
જિલ્લાના બગવદર, મોરાણા, પારાવાડા, ભોમીયાવદર, સીમર જેવા વિસ્તારોમાં પણ મધ્યમ વરસાદ નોંધાયો હતો. ખાસ કરીને બરડા વિસ્તારને પડેલા ધોધમાર વરસાદથી ખેતી માટે જરૂરી પિયત મળી રહેશે અને હવે મોટાભાગના વિસ્તારોમાં વાવણી કાર્ય શરૂ થશે તેવી શક્યતા છે. વરસાદથી વાતાવરણમાં પ્રસરી રહેલી ઠંડક અને ખેતી માટે અનુકૂળ માહોલ ખેડૂતવર્ગ માટે આશાજનક સંકેત આપતો રહ્યો.
