રાજ્યમાં 8 વિધાનસભાની પેટા ચૂંટણીને લઈ હાલ ભાજપ-કોંગ્રેસ જોરશોરથી પ્રચાર કરી રહ્યા છે. આજે કેન્દ્રીય મંત્રી સ્મૃતિ ઈરાની આજે રાજકોટ પહોંચી ગયા છે. રાજકોટ એરપોર્ટ પર શહેર ભાજપ પ્રમુખ, મેયર અને CMના પત્ની અંજલીબેન રૂપાણીએ કેન્દ્રીય મંત્રી સ્મૃતિ ઈરાનીનું ભવ્ય સ્વાગત કર્યું હતું. રાજ્યના 8 પેટા ચૂંટણીને લઈને સ્મૃતિ ઈરાની આજથી જોરશોરથી સભાઓ ગજવશે.
- સ્મૃતિ ઈરાની મોરબીથી ચૂંટણી પ્રચારની શરૂઆત કરશે
સ્મૃતિ ઈરાની મોરબીથી પેટા ચૂંટણીના પ્રચારની શરૂઆત કરશે, બાદ લીંબડી, ગઢડા અને કરજણ બેઠક પર ચૂંટણી સભા ગજવશે. જ્યારે કેન્દ્રીય મંત્રી પુરુષોત્તમ રૂપાલા ધારી વિધાનસભા અંતર્ગત બગસરા, ધારી, મોટા સમઢિયાળા અને ચલાલાનો ચૂંટણી પ્રવાસ યોજશે. ઉલ્લેખનીય છે કે વિધાનસભાની 8 બેઠક પર 3 નવેમ્બરે પેટા ચૂંટણી યોજાશે. - સ્મૃતિ ઈરાનીનો પ્રચાર કાર્યક્રમ
ભાજપના 30 સ્ટાર પ્રચારકો હવે 8 બેઠકો કબજે કરવા પ્રચારમાં લાગી ગયાં છે. ત્યારે કેન્દ્રીય મંત્રી સ્મૃતિ ઈરાની આજે મોરબીમાં બ્રિજેશ મેરજાના સમર્થનમાં ચૂંટણી સભાને સંબોધશે. ત્યાર બાદ બપોરે દોઢ વાગ્યે લીંબડીમાં કિરીટસિંહ રાણાના સમર્થનમાં સભા ગજવશે. આ ઉપરાંત બપોરે 4.30 કલાકે ગઢડા બેઠક પર આત્મારામ પરમારનાં સમર્થનમાં ચૂંટણી પ્રચાર કરશે. છેલ્લે રાત્રે 8.00 કલાકે કરજણ બેઠક પર અક્ષયભાઈ પટેલના સમર્થનમાં જાહેર સભાને સંબોધશે. - કેન્દ્રીય મંત્રી પુરુષોત્તમ રુપાલા પણ સભાઓ ગજવશે
જ્યારે કેન્દ્રીય મંત્રી પુરસોત્તમભાઈ રૂપાલા આજે ધારી વિધાનસભા સીટના ભાજપા ઉમેદવાર જે.વી. કાકડિયાના સમર્થનમાં ધારી ખાતે સહકારી ક્ષેત્રના આગેવાનો, સામાજિક અગ્રણીઓ, વેપારી મંડળના આગેવાનો, જુદી જુદી સામાજિક અને સ્વૈચ્છિક સંસ્થાના શ્રેષ્ઠી શ્રીઓ સાથે બેઠક કરશે. ત્યારબાદ સાંજે 6.00 કલાકે મોટા સમઢિયાળા અને રાત્રે 8.00 કલાકે ચલાલા ખાતે જાહેરસભા સંબોધશે.
