– શૈલેષ સગપરિયા
ડાંગ જિલ્લામાં કરાડીઆંબા નામનું વનવાસી વસ્તી ધરાવતું એક નાનકડું ગામ છે. આ ગામમાં પાકા મકાન નહીં પણ ઘાસ અને માટીનાં ઝૂંપડાંઓ જ જોવા મળે. લોકો મહેનત-મજૂરી કરીને માંડ માંડ ગુજરાન ચલાવે.
આ ગામના જ એક ગરીબ પરિવારની દીકરીએ માત્ર ગામને જ નહીં, સમગ્ર દેશને ગૌરવ અપાવ્યું. ઝૂંપડા જેવા ઘરમાં રહેનારી સરિતા ગાયકવાડે ઇન્ડોનેશિયાના જાકાર્તા ખાતે યોજાયેલા એશિયન રમતોત્સવ-2018માં ભારતને 400 મીટરની રીલે દોડમાં ગોલ્ડ મેડલ અપાવ્યો હતો.
- Advertisement -
“મન હોય તો માળવે જવાય” આવું આપણે સાંભળ્યું કે વાંચ્યુ છે; પણ ‘ડાંગ એક્સપ્રેસ’ તરીકે જાણીતી ડાંગની દીકરી સરિતા ગાયકવાડે એ સાબિત કરી બતાવ્યું છે. સાવ ગરીબ પરિવારની આ દીકરીને પહેલેથી જ રમતગમત પ્રત્યે ખૂબ રુચિ હતી. શિક્ષકોએ પ્રેરણા આપી અને સરિતાએ રમતગમતમાં દોડ વિભાગમાં દુનિયાને પોતાનું કૌવત બતાવવાનું સપનું જોયું. લોકો એવું કહેતા કે આ આપણું કામ નહીં, આમાં તો પૈસાવાળા અને પહોંચવાળા જ આગળ આવી શકે. પણ આ દીકરીએ મનમાં દૃઢ નિર્ધાર કર્યો હતો કે કઠિન પરિશ્રમથી મારે મારા સપનાને પૂર્ણ કરવું છે.
સરિતાને એના અભણ માતા-પિતા અને ભાઈએ સાથ આપ્યો. દિવસ-રાત મજૂરી કરીને જે થોડીઘણી બચત થાય એ દીકરીની કારકિર્દી માટે ખર્ચી નાંખતા. વનવાસી વિસ્તારમાં દીકરીને બહુ મોકળાશ ન મળે પણ સરિતાનાં માતા-પિતાએ એને વિકસવા અને વિસ્તરવા માટે એમનાથી આપી શકાય એ બધું જ આપ્યું. 18મા એશિયાઈ રમતોત્સવમાં સરિતા ગાયકવાડે ભારતનું પ્રતિનિધિત્વ કર્યું અને ભારે રસાકસી વચ્ચે 4ડ્ઢ400 મીટરની રિલે દોડમાં ગોલ્ડ મેડલ પ્રાપ્ત કર્યો.
સરિતાના પરિવારને આ સમાચાર મળ્યા ત્યારે મોઢું મીઠું કરવાની મીઠાઈ પણ ઘરમાં નહોતી. ગામ એટલું નાનું છે કે ગામમાં મીઠાઇ પણ મળતી નથી. એનો ભાઈ દ્રોણેશ્વર એના ગામથી 35 કિલોમીટર દૂરના ગામેથી મીઠાઈ લઈ આવ્યો અને ગામના લોકોએ સરિતાએ પ્રાપ્ત કરેલી ભવ્ય સફળતાની ઉજાણી કરી.
- Advertisement -
માણસ ધારે અને પોતાની જાત પોતાના ધ્યેયને સમર્પિત કરે તો આ જગતમાં કશું જ અશક્ય નથી. જો તમે દૃઢનિશ્ચયી હો, તો કોઈ સાધનોનો અભાવ તમારી પ્રગતિમાં બાધારૂપ બની શકે નહીં. મુશ્કેલી પડે પણ મન મક્કમ હોય, તો સફળતા જરૂર મળે.