જિનપિંગ 7 વર્ષ પછી ભારતમાં

ગલવાન અથડામણ પછીની પ્રથમ મુલાકાતઃ BRICSમાં સામેલ થશે, સાંજે વડાપ્રધાન મોદી સાથે દ્વિપક્ષીય બેઠક

ચીનના રાષ્ટ્રપતિ શી જિનપિંગ ૭ વર્ષ બાદ ભારત આવ્યા છે. પાલમ એરપોર્ટ પર કેન્દ્રીય મંત્રી જિતિન પ્રસાદે તેમનું સ્વાગત કર્યું. વર્ષ ૨૦૨૦માં ગલવાનમાં થયેલી અથડામણ બાદ ભારતની આ તેમની પ્રથમ મુલાકાત છે. તેઓ નવી દિલ્હીમાં યોજાનારી બ્રિક્સ (BRICS) સમિટમાં ભાગ લેશે. ચીનના રાષ્ટ્રપતિ જિનપિંગનું એર ચાઈનાનું વિમાન પાલમ એરપોર્ટ પર ઉતર્યું હતું. BRICS સમિટ શનિવારથી નવી દિલ્હીમાં શરૂ થવા જઈ રહી છે. ભારતમાં યોજાનાર BRICS સમિટમાં ૧૦ વર્ષ પછી વડાપ્રધાન નરેન્દ્ર મોદી, રશિયાના રાષ્ટ્રપતિ વ્લાદિમીર પુતિન અને ચીનના રાષ્ટ્રપતિ શી જિનપિંગ એકસાથે જોવા મળશે. આ ત્રણેય નેતાઓ આ પહેલા ૨૦૧૬માં ગોવામાં યોજાયેલા BRICS સમિટમાં એકસાથે સામેલ થયા હતા. વિયેતનામના વડાપ્રધાન લે મિન્હ હંગ BRICS સમિટ ર૦ર૬માં ભાગ લેવા માટે દિલ્હી પહોંચી ગયા છે. સમિટમાં BRICSના ૧૧ સભ્ય દેશો ઉપરાંત ૧૦ ભાગીદાર દેશોના નેતાઓ પણ સામેલ થશે. BRICSની તાકાતને માત્ર સભ્ય દેશોની સંખ્યાથી જ નહીં, પરંતુ તેમની વસ્તી અને અર્થતંત્રથી પણ સમજી શકાય છે. ૧૧ સભ્ય દેશોમાં દુનિયાની લગભગ ૪૯.૫% વસ્તી રહે છે. એટલે કે દુનિયાના લગભગ દર બેમાંથી એક વ્યક્તિ BRICS દેશોમાં રહે છે. અર્થતંત્રની વાત કરીએ તો PPP એટલે કે ખરીદ શક્તિના આધારે BRICS દેશોનું કુલ અર્થતંત્ર દુનિયાનું લગભગ ૩૯% છે. આ અમેરિકાના અર્થતંત્રની સરખામણીમાં લગભગ ૩ ગણું છે.