સ્માર્ટ સિટી નહીં ‘નાસ્તા સિટી’
રાજકોટના રાજપથ કહેવાતા રોડ ઉપર ખાણી-પીણીવાળાઓને ધંધો કરવાની ખુલ્લેઆમ છૂટ, અંદરના ભાગે ઉભા રહેતાં ચકરડીવાળાઓને સખ્ત મનાઇ!
- Advertisement -
ખાસ-ખબર ન્યૂઝ રાજકોટ
શહેરની શાન ગણાતો અને સ્માર્ટ સિટીના પ્રોજેક્ટ હેઠળ વિકસાવાયેલો રેસકોર્સ રિંગ રોડ આજે બેદરકારી અને અયોગ્ય વ્યવસ્થાપનનું જીવંત ઉદાહરણ બની ગયો છે. જ્યાં એક તરફ નાગરિકોને આરોગ્યપ્રદ જીવન માટે વોકિંગ ટ્રેક અને સ્વચ્છ વાતાવરણ પૂરુ પાડવાનો દાવો કરવામાં આવ્યો હતો, ત્યાં હવે રાત્રિના સમયે આ વિસ્તાર ‘નાસ્તા બજાર’માં ફેરવાઈ ગયો છે. ફૂડ ટ્રકો અને લારીઓના અતિક્રમણથી રસ્તો સાવ સાંકડો બની ગયો છે અને ટ્રાફિકની સમસ્યા રોજિંદી બની ગઈ છેમ દરરોજ સાંજ પડતાં જ રેસકોર્સ વિસ્તારમાં ફૂડ ટ્રકોનો મસમોટો જમાવડો જોવા મળે છે. ફૂટપાથથી લઈને રસ્તાના અડધા ભાગ સુધી આ લારીઓ કબજો જમાવી લે છે, જેના કારણે વોકિંગ માટે આવતા નાગરિકો માટે કોઈ જગ્યા જ બાકી રહેતી નથી. ખાસ કરીને વૃદ્ધો, મહિલાઓ અને બાળકો માટે આ સ્થિતિ અત્યંત જોખમી બની ગઈ છે. એક સમયે આરામ અને સ્વાસ્થ્ય માટે ઓળખાતો આ વિસ્તાર હવે ગેરવ્યવસ્થાનો શિકાર બન્યો છે.
નાસ્તો કરવા આવતા લોકો દ્વારા પણ કરવામાં આવતું આડેધડ પાર્કિંગ સમસ્યાને વધુ ગંભીર બનાવે છે. મોંઘીદાટ કાર રસ્તાની વચ્ચે પાર્ક કરવામાં આવતી હોવાથી વાહનવ્યવહાર સંપૂર્ણપણે ખોરવાઈ જાય છે. ટુ-વ્હીલર સવારોને જોખમ લઈ પસાર થવું પડે છે, જ્યારે ઇમરજન્સી વાહનો માટે પણ રસ્તો ખુલ્લો રહેતો નથી. આ સ્થિતિ કોઈ મોટી દુર્ઘટનાને આમંત્રણ આપી રહી છે. સ્થાનિક નાગરિકો અને જાગૃત વર્ગમાં આ મુદ્દે ભારે રોષ જોવા મળી રહ્યો છે. લોકો ખુલ્લેઆમ સવાલ ઉઠાવી રહ્યા છે કે શું રાજકોટ મ્યુનિસિપલ કોર્પોરેશન (છખઈ) દ્વારા આ પ્રકારના અતિક્રમણને મૌખિક કે લેખિત મંજૂરી આપવામાં આવી છે? જો મંજૂરી નથી, તો ‘દબાણ હટાવ વિભાગ’ કેમ નિષ્ક્રિય બની બેઠો છે? શું કોઈ પ્રભાવશાળી તત્વોની ‘મીઠી નજર’ હેઠળ આ ગેરકાયદેસર પ્રવૃત્તિઓ ચાલી રહી છે?
નાગરિકોનું કહેવું છે કે સ્માર્ટ સિટીના નામે કરોડો રૂપિયાનો ખર્ચ કરીને બનાવવામાં આવેલા રેસકોર્સ રિંગ રોડની હાલત આજે શરમજનક બની ગઈ છે. જ્યાં સફાઈ, શિસ્ત અને વ્યવસ્થા હોવી જોઈએ, ત્યાં માત્ર ગેરકાયદેસર ધંધા અને અસ્તવ્યસ્તતા જ જોવા મળી રહ્યા છે. આ સ્થિતિ શહેરની છબી પર પણ નકારાત્મક અસર કરી રહી છે, ખાસ કરીને બહારથી આવતા પ્રવાસીઓ માટે ખોટો સંદેશ આપે છે. જો તંત્ર તાત્કાલિક કડક પગલાં નહીં ભરે તો આ સમસ્યા વધુ વિકરાળ બની શકે છે. ટ્રાફિક નિયંત્રણ, અતિક્રમણ હટાવવાની કાર્યવાહી અને ફૂડ ટ્રકો માટે અલગ ઝોન નિર્ધારિત કરવું સમયની માંગ બની ગઈ છે. સાથે જ નિયમોનું કડક પાલન અને સતત દેખરેખ જરૂરી છે. હાલમાં સૌથી મોટો સવાલ એ છે કે શું છખઈ હવે પણ ‘આંખ આડા કાન’ની નીતિ અપનાવશે કે નાગરિકોના હિતમાં કડક કાર્યવાહી કરીને રેસકોર્સ રિંગ રોડને તેની જૂની ઓળખ પરત અપાવશે?.
તંત્રએ નક્કી કરાયેલા ઝોન કરતાં વધુ અનિયંત્રિત ઝોન વાસ્તવમાં ઉભા થયા !
- Advertisement -
અમલનો અભાવ : શહેરમાં વ્યવસ્થિત સ્ટ્રીટ ફૂડ વ્યવસ્થા ઉભી કરવા માટે રાજકોટ મહાનગરપાલિકા દ્વારા ફૂડ અને હોકર ઝોન માટે આયોજન કરવામાં આવ્યું હોવા છતાં, તેની અસરકારક અમલવારીના અભાવે આજે સ્થિતિ સંપૂર્ણપણે વિપરીત બની ગઈ છે. કાગળ પર નિર્ધારિત ઝોન હોવા છતાં, શહેરના અનેક મુખ્ય માર્ગો પર ફૂડ ટ્રકો અને લારીઓની સંખ્યા દિવસેને દિવસે વધતી જાય છે.
નિયમનો ભંગ : તંત્ર દ્વારા બનાવાયેલા ઝોનિંગ મોડલનો હેતુ ટ્રાફિક વ્યવસ્થા જાળવવી, ફૂટપાથ ખાલી રાખવા અને નાગરિકોને સુવિધાજનક ફૂડ ઝોન પૂરા પાડવાનો હતો. પરંતુ ગ્રાઉન્ડ પર જોવા જઈએ તો રેસકોર્સ રિંગ રોડ, 150 ફૂટ રિંગ રોડ, કાલાવડ રોડ, યુનિવર્સિટી રોડ જેવા વિસ્તારોમાં ફૂડ ટ્રકોનો એવો જમાવડો જોવા મળે છે કે જ્યાં નિયમોનો ખુલ્લેઆમ ભંગ થઈ રહ્યો છે.
સુરક્ષા સામે સવાલ : હાલની પરિસ્થિતિમાં નક્કી કરાયેલા ઝોન કરતાં વધુ અનિયંત્રિત ઝોન વાસ્તવમાં ઉભા થઈ ગયા છે, જે તંત્રની અમલક્ષમતાની ખામી તરફ સીધી આંગળી કરે છે. ફૂટપાથ પર અતિક્રમણ, રસ્તા પર આડેધડ પાર્કિંગ અને ટ્રાફિક જામ જેવી સમસ્યાઓ રોજિંદી બની ગઈ છે. વોકિંગ માટે બનાવાયેલા વિસ્તારો પણ હવે વેપાર માટે વપરાઈ રહ્યા છે, જેના કારણે નાગરિકોની સુરક્ષા જોખમમાં મુકાઈ રહી છે.
કાર્યવાહીની માંગ : નિયમિત ચેકિંગ અને દંડાત્મક પગલાંના અભાવે ગેરવ્યવસ્થા વધતી જઈ રહી છે. હાલમાં નાગરિકોની મુખ્ય માંગ એ છે કે ફૂડ ટ્રકોને માત્ર સત્તાવાર ઝોનમાં જ મર્યાદિત કરવામાં આવે, અનધિકૃત અતિક્રમણ સામે કડક કાર્યવાહી કરવામાં આવે અને મુખ્ય રસ્તાઓને ‘નો-વેન્ડિંગ ઝોન’ જાહેર કરવામાં આવે.
