ગેરકાયદે બાંધકામના કેસમાં બિલ્ડરની અરજીને RMCના વકીલનું સમર્થન, કોંગ્રેસ અગ્રણી સંજયભાઈ લાખાણીએ ઉઠાવ્યા સવાલો
તા. 14 મે, 2025ના સીલિંગ આદેશને રદ કરાયો હોવાનો કોઈ દસ્તાવેજ કોર્ટમાં રજૂ ન થયાનો આક્ષેપ
- Advertisement -
રાજકોટના વિવાદાસ્પદ ‘ક્રિસ્ટલ નેક્સસ’ બિલ્ડિંગ કેસમાં ઘટસ્ફોટ થયો છે તા. ૧૪.૦૫.૨૦૨૫ ના રોજ TPO ના સીલિંગ આદેશને રદ કરવા ક્યારેય કોઈ કાર્યવાહી થઈ નથી, એટલે કે સીલિંગનો આદેશ આજદિન સુધી ‘લાઈવ’ અને અકબંધ છે! છતાં ભ્રષ્ટાચારને છાવરવા RMC એ કોર્ટમાં બિલ્ડરની અરજીને ખુલ્લું સમર્થન આપ્યુ છે!
શહેરમાં કાયદાકીય નિયમો, ટાઉન પ્લાનિંગના ધોરણો અને જાહેર સલામતી (Public Safety) ને નેવે મૂકીને ખડકાયેલા ગેરકાયદેસર બાંધકામો સામે રાજકોટ ના કોંગ્રેસ અગ્રણી સંજયભાઈ લાખાણી દ્વારા લડવામાં આવી રહેલી કાનૂની લડાઈમાં આજે 1-10-2026) ના રોજ એક અત્યંત ચોંકાવનારો વળાંક સામે આવ્યો છે. રાજકોટની સિવિલ કોર્ટમાં ‘ક્રિસ્ટલ નેક્સસ’ કોમર્શિયલ બિલ્ડિંગ વિરુદ્ધ ચાલી રહેલા કેસમાં (Regular Civil Suit) આજે ઓર્ડર ૭ રૂલ ૧૧ ની અરજી પર સુનાવણી હાથ ધરવામાં આવી હતી, જેમાં બિલ્ડર અને રાજકોટ મ્યુનિસિપલ કોર્પોરેશન (RMC) ની મિલીભગત અને ભ્રષ્ટાચાર ખુલ્લા પડી ગયા છે.
આ કોઈ વ્યક્તિગત વિવાદ નથી, પરંતુ રાજકોટની જનતાની પબ્લિક સેફ્ટી (જાહેર સલામતી) અને કાયદાના પાલનનો ગંભીર મામલો છે. કાગળો પર કાયદો અને લાઈવ ઓર્ડર હોવા છતાં ભ્રષ્ટાચારને છાવરતી આ નિંભર વ્યવસ્થા સામે કાયદાકીય અને જનહિતની આ લડાઈ વધુ ઉગ્ર સ્વરૂપે ચાલુ રહેશે તેવુ સંજયભાઈ લાખાણી એ પોતાની યાદી મા જણાવ્યુ છે. હવે કોર્ટ આ બાબતે શુ હુકમ કરશે તે અંગે મીટ મંડાઈ છે. આ કામે વાદી સંજયભાઈ લાખાણી વતી સૌરાષ્ટ્રના જાણીતા વકિલ સંજયભાઈ પંડિત રોકાયેલ છે.
- Advertisement -
આ કેસની વાસ્તવિક હકીકતો અને સુનાવણીના મુદ્દાઓ
૧. ‘ઓર્ડર ૭ રૂલ ૧૧’ એટલે શું?
સામાન્ય ભાષામાં કહીએ તો, જ્યારે કોઈ જાગૃત નાગરિક ગેરકાયદેસર બાંધકામ સામે કોર્ટમાં જાય, ત્યારે બિલ્ડર કોર્ટમાં “ઓર્ડર ૭ રૂલ ૧૧” મુજબ અરજી કરીને એવો દાવો કરે છે કે, “અમારું બાંધકામ એકદમ કાયદેસર છે, પ્લેઇન્ટિફ (વાદી) ને આ કેસ કરવાનો કોઈ કાનૂની અધિકાર નથી, તેથી આ દાવો શરૂઆતમાં જ રદ કરી દો.” બિલ્ડરનો આશય હંમેશાં એવો હોય છે કે કેસની સાક્ષી-પુરાવા (ટ્રાયલ) થાય જ નહીં અને કાયદાકીય છટકબારીથી મામલો દબાઈ જાય.
૨. બિલ્ડર અને RMC નું હાસ્યાસ્પદ સ્ટેન્ડ – નાગરિકને ‘સ્ટ્રેન્જર’ ગણાવવા નો પ્રયાસ
કોર્ટની સુનાવણી દરમિયાન બિલ્ડર અને મ્યુનિસિપલ કોર્પોરેશનના વકીલોએ એવું સ્ટેન્ડ લીધું હતું કે પ્લેઇન્ટિફ (વાદી) ને આ પ્રોપર્ટી સાથે કોઈ લેવાદેવા નથી અને તે ‘સ્ટ્રેન્જર’ (અજાણ વ્યક્તિ / થર્ડ પાર્ટી) છે, જેથી ‘નો રાઈટ મીન્સ નો રેમેડી’ નો સિદ્ધાંત લાગુ પડે છે. હવે સવાલ એ છે કે જ્યારે તા. ૧૪.૦૫.૨૦૨૫ નો TPO નો સીલિંગ આદેશ રેકોર્ડ પર હાજર હોય અને ખુદ કોર્પોરેશન એમ સ્વીકારે કે બાંધકામ લીગલાઈઝેશનની અરજી પેન્ડિંગ છે, ત્યારે ગેરકાયદેસર અને જોખમી બાંધકામ સામે અવાજ ઉઠાવનાર નાગરિક ક્યારેય ‘સ્ટ્રેન્જર’ ન હોઈ શકે. બિલ્ડરના ભ્રષ્ટાચારને બચાવવા માટે કોર્પોરેશન દ્વારા વકીલ મારફત આપવામાં આવતું આ સમર્થન તંત્રની મિલીભગતની હદ દર્શાવે છે.
૩. તા. ૧૪.૦૫.૨૦૨૫ ના TPO ના સીલિંગ આદેશને ક્યારેય રદ કરવામાં આવ્યો નથી – આદેશ આજદિન સુધી ‘લાઈવ’ છે!
આ કેસમાં અગાઉ ટાઉન પ્લાનિંગ ઓફિસર (TPO) દ્વારા તારીખ ૧૪.૦૫.૨૦૨૫ ના રોજ સિટી ઇજનેરને સ્પષ્ટ આદેશ આપવામાં આવ્યો હતો કે આ જોખમી અને અનધિકૃત બાંધકામ સામે કડક પગલાં ભરીને તાત્કાલિક ધોરણે બિલ્ડિંગ સીલ કરવામાં આવે. સૌથી મોટો ઘટસ્ફોટ એ છે કે કોર્ટમાં કે કોર્પોરેશનના રેકોર્ડ પર બિલ્ડર કે કોર્પોરેશનના વકીલ દ્વારા ક્યારેય એવો કોઈ દસ્તાવેજ કે તથ્ય રજૂ કરવામાં આવ્યું નથી કે જે સાબિત કરે કે તા. ૧૪.૦૫.૨૦૨૫ ના આ સીલિંગ ઓર્ડરને ક્યારેય રદ (Revoke) કરવામાં આવ્યો છે! આનો અર્થ શું થાય? કાગળ પરનો આ સીલિંગ ઓર્ડર આજદિન સુધી ‘લાઈવ’ (અકબંધ) છે. છતાં સિટી ઇજનેર કે સંબંધિત અધિકારીઓએ આજદિન સુધી તે અમલમાં કેમ ન મૂક્યો? આ આદેશને ફાઇલમાં દબાવીને શા માટે બેસી રહ્યા? તે તંત્રની ગંભાર ફોજદારી બેદરકારી સાબિત કરે છે.
૪. કોર્ટમાં RMC દ્વારા બિલ્ડરની અરજીનું ખુલ્લું સમર્થન અને ભ્રષ્ટાચાર છાવરવાનો પ્રયાસ
આજની કોર્ટ સુનાવણી દરમિયાન રાજકોટ મ્યુનિસિપલ કોર્પોરેશન (RMC) ના વકીલ દ્વારા કોર્ટમાં એવું મૌખિક સબમિશન આપવામાં આવ્યું કે, “આ બાંધકામને લીગલાઈઝ (નિયમિત) કરવાની અરજી હાલ કોર્પોરેશનમાં પેન્ડિંગ છે.” કોર્પોરેશને પરોક્ષ તથા પ્રત્યક્ષ રીતે બિલ્ડરની આ અરજી તથા તેના સ્ટેન્ડને ખુલ્લું સમર્થન પૂરું પાડ્યું હતું. આનો સીધો અર્થ શું થાય? જો બિલ્ડરનું બાંધકામ પહેલેથી જ તમામ નિયમો મુજબ કાયદેસરનું હોત, તો તેને “લીગલાઈઝ” કરાવવાની અરજી કોર્પોરેશનમાં કરવાની જરૂર જ શી પડત? આ સમગ્ર ઘટનાક્રમ સ્પષ્ટપણે સાબિત કરે છે કે બિલ્ડરનો આડેધડ ભ્રષ્ટાચાર અને ગેરકાયદેસરતા છુપાવવા માટે ખુદ મ્યુનિસિપલ કોર્પોરેશનનું તંત્ર પીઠબળ પૂરું પાડી રહ્યું છે અને આ મામલાને છાવરવાના પૂરતા પ્રયાસો થઈ રહ્યા છે.
૫. જાહેર સલામતીનો ભોગ અને નાગરિકોનો અવાજ
એક તરફ તા. ૧૪.૦૫.૨૦૨૫ નો TPO નો સીલિંગ આદેશ આજદિન સુધી લાઈવ છે, બીજી તરફ બિલ્ડર ગેરકાયદેસર બાંધકામને સાચું ઠેરવવા માંગે છે, અને કોર્ટમાં કોર્પોરેશન ખુદ બિલ્ડરની તરફેણ કરે છે—આ ડબલ ધોરણો સાબિત કરે છે કે ભ્રષ્ટ વ્યવસ્થાના જોરે પ્રજાની જિંદગી સાથે ચેડા થઈ રહ્યા છે.
