ગુજરાતની 26 બેઠકો પર ભાજપનો થશે ભવ્ય વિજય: પરષોત્તમ રૂપાલા

• પરષોત્તમ રૂપાલાનું રાજકોટમાં વાજતે-ગાજતે સ્વાગત

ખાસ-ખબર સંવાદદાતા
રાજકોટની લોકસભા સીટ ખાતે પરષોત્તમ રૂપાલાનું નામ જાહેર થતાં રાજકોટ શહેર ભાજપ દ્વારા પરષોત્તમ રૂપાલાનું વાજતે-ગાજતે સ્વાગત કરવામાં આવ્યું હતું. કેન્દ્રીય મંત્રી પરષોત્તમ રૂપાલાએ આ તકે નિવેદન આપ્યું હતું કે પડકાર ભાજપ માટે નહીં કોંગ્રેસ માટે છે, ગુજરાતની 26 બેઠકો પર ભાજપનો ભવ્ય વિજય થશે. વધુમાં તેમણે કહ્યું હતું કે અંબરીશ ડેર મૂળ અમરેલીના છે અને રાજુલા સ્થાયી થયા છે.

અર્જુન મોઢવાડિયા સૌરાષ્ટ્રના મોટા નેતા છે અને ભાજપમાં આવ્યા છે. રાજકોટ લોકસભા બેઠક પર પ્રશ્ર્નો ક્યાં તે અંગે પરષોત્તમ રૂપાલાએ કહ્યું હતું કે પ્રશ્ર્નો સમાજમાં ઉકેલાય જ નહીં, એક ઉકેલાય તો નવો ઉભો થાય. આ સાથે તેઓએ રાજકોટની જાહેર જનતાને કહ્યું હતું કે હું તમારો પાડોશી છું, રાજકોટના અનેક કાર્યક્રમોમાં આવતો હતો તેમજ આવું છું. આમ આજરોજ પરષોત્તમ રૂપાલાનું રેલી કાઢી ભવ્ય સ્વાગત
કરાયું હતું.

ભાજપ અગ્રણી વજુભાઇ વાળાના ઘરેથી ચૂંટણી પ્રચારનો શ્રી ગણેશ કરતાં પરષોત્તમ રૂપાલા

રાજકોટની લોકસભા સીટ ખાતે પરષોત્તમ રૂપાલાનું નામ જાહેર થતાં આજરોજ પરષોત્તમ રૂપાલા રાજકોટ ખાતે આવ્યા હતા જ્યાં તેમનું ભવ્ય સ્વાગત કરવામાં આવ્યું હતું. આ દરમિયાન પરષોત્તમ રૂપાલાએ વજુભાઈ વાળાના ઘરેથી ચૂંટણી પ્રચારના શ્રીગણેશ કર્યા હતા અને વજુભાઈ વાળાએ ખજૂરના લાડુથી મોઢુ મીઠુ કરાવી પરષોત્તમ રૂપાલાને જંગી બહુમતીથી વિજયી બનવા આશીર્વાદ પાઠવ્યા હતા.