પોરબંદર વિધાનસભાની પેટા ચૂંટણીમાં ભાજપના ઉમેદવાર અર્જુનભાઈની 1,16,808 મતની ઐતિહાસિક સરસાઈ સાથે જીત

ભાજપના ઉમેદવાર અર્જુનભાઈ મોઢવાડિયાને કુલ 1,33,163 (કુલ મતના 86%) મત પ્રાપ્ત થયા, કૉંગ્રેસના ઉમેવાર રાજુભાઈ ઓડેદરાને કુલ 16,355 મત મળ્યા

ખાસ-ખબર ન્યૂઝ પોરબંદર, તા.5

પોરબંદર વિધાનસભાની પેટા ચુંટણીમાં આ વખતે 1,16,808 મતની ઐતિહાસિક સરસાઈ સાથે ભાજપના ઉમેદવાર અર્જુનભાઈ મોઢવાડિયાની રેકોર્ડબ્રેક જીત થઈ છે. 83 પોરબંદર વિધાનસભાની આ પેટા ચુંટણીમાં કુલ 1,54,909 લોકોએ (58%) મતદાન થયુ હતું. જેની આજે હાથધરવામાં આવેલ મતગણતરીમાં ભાજપના ઉમેદવાર અર્જુનભાઈ મોઢવાડિયાને કુલ 1,33,163 મત પ્રાપ્ત થયા છે, જેની સામે કોંગ્રેસના ઉમેવાર રાજુભાઈ ઓડેદરાને કુલ 16,355 મત પ્રાપ્ત થયા છે, જ્યારે અપક્ષ ઉમેદવાર જીવણ જુંગીને 1089 મત, અશ્વિન મોતીવરસને 477 મત, દિલાવર જોખીયાને 386 મત પ્રાપ્ત થયા છે. વીરો કે વીર ઈન્ડિયન પાર્ટીના ઉમેદવાર રસીક મંગેરાને 806 મત મળ્યા છે અને 2633 મત નોટોમાં ગયા છે. ટકાવારીમાં જોઈએ તો થયેલ મતદાનમાંથી 86% મત ભાજપના ઉમેદવાર અર્જુનભાઈ મોઢવાડિયાને મળ્યા છે.

જે માત્ર પોરબંદરમાં જ નહીં પરંતુ સમગ્ર ગુજરાતમાં કોઈ એક ઉમેદવારની તરફેણમાં પડેલ મતની ટકાવારીનો રેકોર્ડ છે. ખાસ વાત એ છે કે પોરબંદર વિધાનસભા વિસ્તારમાં મતગણતરી દરમિયાન તમામ 18 રાઉન્ડમાં ભારતીય જનતા પાર્ટીના બન્ને ઉમેદવારો અર્જુનભાઈ મોઢવાડિયા અને ડો. મનસુખભાઈ માંડવીયાને સરસાઈ મળી હતી. તેમાં પણ માત્ર ત્રણ રાઉન્ડમાં કોંગ્રેસના ઉમેદવારોને ચાર આંકડાના મત મળ્યા હતા. આ પણ પોતાની જાતે એક નવો રેકોર્ડ છે.