સામાકાંઠે પાણી વિતરણ માટે એલિવેટેડ સર્વિસ રિઝર્વોયર અને ગ્રાઉન્ડ સર્વિસ રિઝર્વોયરનું નિર્માણ થશે

ભાવિ પાણી જરૂરિયાતોને પહોંચી વળવા આધુનિક ઈન્ફ્રાસ્ટ્રક્ચર ઊભું કરવાની દિશામાં મહત્વપૂર્ણ પગલું

ધારાસભ્ય ઉદય કાનગડ, સ્ટેન્ડિંગ ચેરમેન પરેશ પીપળીયા, મ્યુનિસિપલ કમિશનર સુમેરાએ ડી-માર્ટ પાછળ મનપાના પ્લોટની મુલાકાત લીધી

શહેરના સામા કાંઠા વિસ્તારમાં ઝડપથી વધી રહેલી વસતિ અને આગામી વર્ષોમાં વધનારી પાણીની માંગને ધ્યાનમાં રાખીને રાજકોટ મહાનગરપાલિકા દ્વારા આગોતરું આયોજન હાથ ધરવામાં આવ્યું છે. નાગરિકોને નિયમિત, પૂરતો અને વધુ ગુણવત્તાસભર પાણી પુરવઠો મળી રહે તે માટે ડી-માર્ટ પાછળ આવેલા રાજકોટ મહાનગરપાલિકાના પ્લોટમાં નવા **એલિવેટેડ સર્વિસ રિઝર્વોયર (ESR)** અને **ગ્રાઉન્ડ સર્વિસ રિઝર્વોયર (GSR)**ના નિર્માણ માટે સંભવિત સ્થળની ઉચ્ચસ્તરીય મુલાકાત લેવામાં આવી હતી. આ સ્થળ મુલાકાત દરમિયાન ધારાસભ્ય ઉદયભાઈ કાનગડ, સ્ટેન્ડિંગ કમિટી ચેરમેન પરેશભાઈ પીપળીયા અને મ્યુનિસિપલ કમિશનર તુષાર સુમેરાએ અધિકારીઓ સાથે સ્થળનું નિરીક્ષણ કરી પ્રોજેક્ટની સંભવિતતા અંગે ચર્ચા કરી હતી. શહેરના ભાવિ વિકાસને ધ્યાનમાં રાખીને પાણી પુરવઠાની વ્યવસ્થાને વધુ મજબૂત બનાવવા માટે આ પ્રોજેક્ટને મહત્વપૂર્ણ ગણાવવામાં આવી રહ્યો છે. સ્થળ નિરીક્ષણ દરમિયાન જમીનની યોગ્યતા, પાણી સંગ્રહ ક્ષમતા, વિતરણ વ્યવસ્થાની સુવિધા, ભાવિ વિસ્તરણની સંભાવનાઓ સહિતના વિવિધ તકનિકી મુદ્દાઓનું વિસ્તૃત મૂલ્યાંકન કરવામાં આવ્યું હતું. અધિકારીઓએ સ્થળ પર જ પ્રાથમિક આયોજન અંગે માહિતી આપી હતી તેમજ પ્રોજેક્ટના અમલીકરણ માટે જરૂરી પ્રક્રિયાઓ અને આગામી આયોજન અંગે ચર્ચા કરી હતી.

પ્રસ્તાવિત ESR–GSRનું નિર્માણ પૂર્ણ થયા બાદ સામા કાંઠા વિસ્તારના વિવિધ વોર્ડોમાં પાણી પુરવઠાની વ્યવસ્થામાં નોંધપાત્ર સુધારો થવાની અપેક્ષા છે. પાણીના દબાણમાં વધારો, પૂરતા પ્રમાણમાં પાણીની ઉપલબ્ધતા, વધતી વસતિને અનુરૂપ પુરવઠાની ક્ષમતામાં વધારો અને ભવિષ્યની જરૂરિયાતોને પહોંચી વળવા માટે આ પ્રોજેક્ટ ઉપયોગી સાબિત થશે. શહેરના વિસ્તરતા વિસ્તારને ધ્યાનમાં રાખીને લાંબા ગાળાની પાણી વ્યવસ્થાપન યોજના હેઠળ આ પ્રોજેક્ટને મહત્વપૂર્ણ કડી તરીકે જોવામાં આવી રહ્યો છે. મુલાકાત દરમિયાન ઈસ્ટ ઝોનના સિટી એન્જિનિયર અને ટાઉન પ્લાનિંગ ઓફિસરે ઉપસ્થિત મહાનુભાવોને ESR–GSRની સંભવિત ક્ષમતા, સ્થળની ઉપયોગિતા, ટેક્નિકલ પાસાઓ અને ભાવિ અમલીકરણ અંગે વિગતવાર માહિતી આપી હતી. ઉપસ્થિત જનપ્રતિનિધિઓએ પણ પ્રોજેક્ટને વધુ અસરકારક અને લાંબા ગાળે લાભદાયી બનાવવા માટે જરૂરી સૂચનો અને માર્ગદર્શન આપ્યું હતું. આ સ્થળ મુલાકાતમાં રાજકોટ શહેર ભાજપના મહામંત્રી વલ્લભભાઈ દુધાત્રા, સ્થાનિક કોર્પોરેટરો, અગ્રણીઓ તેમજ રાજકોટ મહાનગરપાલિકાના ટાઉન પ્લાનિંગ ઓફિસર, સિટી એન્જિનિયર અને સંબંધિત વિભાગના અધિકારીઓ પણ ઉપસ્થિત રહ્યા હતા.

રાજકોટ મહાનગરપાલિકા દ્વારા શહેરના સર્વાંગી વિકાસ સાથે પાણી જેવી પાયાની સુવિધાઓને વધુ સક્ષમ બનાવવા માટે સતત આયોજન કરવામાં આવી રહ્યું છે. આગોતરું આયોજન, આધુનિક ઈન્ફ્રાસ્ટ્રક્ચરનું નિર્માણ અને સુદૃઢ પાણી વિતરણ વ્યવસ્થા દ્વારા નાગરિકોને વધુ ગુણવત્તાસભર સેવાઓ ઉપલબ્ધ કરાવવાના પ્રયાસો થઈ રહ્યા છે.