ધોનીએ 17 કરોડ એડવાન્સ ટેકસ ભર્યો

ગત વર્ષ કરતાં આ વખતે 4 કરોડ વધુ ટેકસ ભર્યો: ઝારખંડનો સૌથી મોટો કરદાતા બન્યો

ખાસ-ખબર સંવાદદાતા
એમ એસ ધોનીને આંતરરાષ્ટ્રીય ક્રિકેટ ભલે છોડી દીધુ હોય પરંતુ કમાણી કરવામાં હજુ પણ આગળ છે. દરવર્ષ ધોનીની આવક સતત વધી રહી છે. આ જ કારણ છે કે તેઓ આજે પણ સૌથી વધુ ટેકસ ચૂકવે છે. મીડિયા રિપોર્ટસ અનુસાર, ધોનીએ ગયા નાણાકીય વર્ષની સરખામણીમાં આ વર્ષે 4 કરોડ રૂપિયા વધુ ટેકસ ચૂકવ્યો છે. જયાં તેણે ગત વખતે 13 કરોડ રૂપિયા ભર્યા હતા, આ વખતે તેણે 17 કરોડ રૂપિયા ભર્યા છે. ધોનીએ ગયા નાણાકીય વર્ષ કરતાં આ વખતે 4 કરોડ રૂપિયા વધુ ટેકસ ચૂકવ્યો છે. આ કારણે તેની કમાણી 30 ટકા સુધી વધી હોવાનું અનુમાન લગાવવામાં આવી રહ્યું છે. ઈન્ટરનેશનલ ક્રિકેટમાં પગ મૂકયા બાદથી ધોની પોતાના રાજય એટલે કે ઝારખંડનો સૌથી મોટો કરદાતા બની ગયો છે.

હવે સવાલ એ છે કે ધોની કયાંથી કમાય છે? તો તેની કમાણીનોસ્ત્રોત આઈપીએલ છે. આ સિવાય તેમની પોતાની બ્રાન્ડ અને બિઝનેસ છે. જેમાં તેની પોતાની સ્પોર્ટ્સ બ્રાન્ડ 7, ઓર્ગેનિક ફાર્મિંગ, ડેરી પ્રોડકશન, ક્રિકેટ એકેડમી અને ફિલ્મ પ્રોડકશન માટે પ્રોડકશન હાઉસ જેવી વસ્તુઓનો સમાવેશ થયા છે. આ સિવાય તાજેતરમાં જ ધોનીએ બેંગ્લોરમાં પોતાના નામે ગ્લોબલ સ્કૂલ પણ ખોલી છે.