₹570 કરોડના ખર્ચે બનશે 175 મીટર ઊંચો ‘અમદાવાદ સિટી સ્ક્વેર’

દુબઈની સ્કાયલાઈનની ઝલક હવે અમદાવાદમાં!

સાડા ત્રણ વર્ષમાં તૈયાર થશે આઈકોનિક ટાવર : 40 મીટરની ઊંચાઈએ 1200 લોકોની ક્ષમતાવાળું બે માળનું રેસ્ટોરન્ટ, ટોચે સ્કાય ડેક અને સ્કાય વોક બનશે

અમદાવાદની ઓળખ હવે એક નવા આઈકોનિક પ્રોજેક્ટથી બદલાવા જઈ રહી છે. દુબઈની ભવ્ય સ્કાયલાઈનની ઝલક આપતો ‘અમદાવાદ સિટી સ્ક્વેર’ સિંધુ ભવન રોડ પર સાકાર થવા જઈ રહ્યો છે. અમદાવાદ મ્યુનિસિપલ કોર્પોરેશન (AMC) દ્વારા અંદાજે રૂ.570 કરોડના ખર્ચે આ મહત્વાકાંક્ષી પ્રોજેક્ટ તૈયાર કરવાની યોજના બનાવવામાં આવી છે. આ પ્રોજેક્ટ અંતર્ગત 175 મીટર (અંદાજે 574 ફૂટ) ઊંચો આઈકોનિક ટાવર બનાવવામાં આવશે, જે અમદાવાદની સ્કાયલાઈનને નવી ઓળખ આપશે. AMC દ્વારા આ પ્રોજેક્ટ માટે 25 ઓક્ટોબર, 2026ના રોજ ટેન્ડર બહાર પાડવામાં આવ્યું છે. કોન્ટ્રાક્ટરને કામ સોંપાયા બાદ પ્રોજેક્ટ પૂર્ણ કરવા માટે 42 મહિના એટલે કે અંદાજે સાડા ત્રણ વર્ષનો સમયગાળો નિર્ધારિત કરવામાં આવ્યો છે. આધુનિક આર્કિટેક્ચર, મનોરંજન, વ્યાપારી પ્રવૃત્તિઓ, હરિયાળી અને જાહેર સુવિધાઓના સમન્વયથી તૈયાર થનારો આ પ્રોજેક્ટ અમદાવાદમાં પ્રવાસન અને મનોરંજનનું નવું કેન્દ્ર બની શકે છે.

અમદાવાદ સિટી સ્ક્વેરનો મુખ્ય આકર્ષણ 175 મીટર ઊંચો આઈકોનિક ટાવર રહેશે. ટાવરમાં અંદાજે 40 મીટરની ઊંચાઈએ બે માળનું વિશાળ રેસ્ટોરન્ટ બનાવવામાં આવશે. અહીં એકસાથે અંદાજે 1200થી વધુ લોકો બેસીને ભોજનનો આનંદ માણી શકશે. રેસ્ટોરન્ટ માટે અંદાજે 6485 ચોરસ મીટર જેટલું બાંધકામ રાઉન્ડ આકારમાં ઊભું કરવામાં આવશે. રેસ્ટોરન્ટની ઉપરના ભાગે ટેરેસ ડેક કેફે વિકસાવવામાં આવશે, જેમાં એકસાથે અંદાજે 200 લોકો બેસી શકશે. શહેરના આકાશી નજારાની વચ્ચે ભોજન અને કેફેનો અનુભવ મેળવવા માટે આ સુવિધા આકર્ષણનું કેન્દ્ર બની શકે છે. ટાવરની સૌથી ઉપર અંદાજે 175 મીટરની ઊંચાઈએ સ્કાય ડેક અને સ્કાય વોક બનાવવામાં આવશે. અહીંથી અમદાવાદ શહેરનો ચારેય દિશામાં પેનોરેમિક વ્યુ નિહાળી શકાશે. સ્કાય ડેક પર એકસાથે અંદાજે 75 વ્યક્તિઓ માટે વ્યુ ગેલેરીની સુવિધા ઊભી કરવામાં આવશે. આ ઉપરાંત ટાવરના 40થી 175 મીટરની ઊંચાઈ વચ્ચે વિશાળ ડિજિટલ સ્ક્રીન લગાવવામાં આવશે, જેના પર વિવિધ ડિજિટલ જાહેરાતો પ્રદર્શિત કરી શકાશે.

આ પ્રોજેક્ટ માત્ર ઊંચા ટાવર પૂરતો સીમિત નહીં રહે, પરંતુ જાહેર જનતા માટે મનોરંજન અને સાંસ્કૃતિક પ્રવૃત્તિઓનું પણ વિશાળ કેન્દ્ર બનશે. ગ્રાઉન્ડ લેવલથી ઉપર લોઅર ગ્રાઉન્ડ અને અપર ગ્રાઉન્ડ એમ બે સ્તરે વિવિધ સુવિધાઓ વિકસાવવામાં આવશે. લોઅર ગ્રાઉન્ડ ખાતે આધુનિક દુકાનો અને આર્ટ ગેલેરી બનાવવામાં આવશે. તેના કારણે કોમર્શિયલ પ્રવૃત્તિઓની સાથે કલા અને સંસ્કૃતિને પણ પ્રોત્સાહન મળશે. અપર ગ્રાઉન્ડ ખાતે ચારેય ખૂણામાં ફૂડ કિઓસ્ક, ગાર્ડન, ફૂડ કોર્ટ અને વોટર ફાઉન્ટેન સહિતની સુવિધાઓ વિકસાવવામાં આવશે. અહીં 310 વ્યક્તિઓ બેસી શકે તેવી ક્ષમતાવાળું એમ્ફીથિયેટર પણ બનાવવામાં આવશે. સાંસ્કૃતિક કાર્યક્રમો, જાહેર સમારંભો અને મનોરંજનના વિવિધ કાર્યક્રમો માટે આ સ્થળ ઉપયોગી બની શકે છે. આ સમગ્ર વિસ્તારને અર્બન પ્લાઝા તરીકે વિકસાવવાની યોજના છે.

1500 વાહનો માટે અંડરગ્રાઉન્ડ પાર્કિંગની વ્યવસ્થા
સિંધુ ભવન રોડ જેવા વ્યસ્ત વિસ્તારમાં વાહન પાર્કિંગની સમસ્યાને ધ્યાનમાં રાખીને પ્રોજેક્ટમાં વિશાળ પાર્કિંગ વ્યવસ્થા પણ ઊભી કરવામાં આવશે. ગ્રાઉન્ડ લેવલથી અંદાજે 15 મીટર ઊંડાઈએ ત્રણ બેઝમેન્ટ બનાવવામાં આવશે, જેમાં કુલ 1500 વાહનો પાર્ક કરી શકાશે. આ ઉપરાંત પ્રોજેક્ટની સામેની બાજુએ આવેલા કોર્પોરેશનના અન્ય પ્લોટમાં વધારાના 450 વાહનો માટે પાર્કિંગની વ્યવસ્થા કરવામાં આવશે. આમ, સમગ્ર પ્રોજેક્ટ અંતર્ગત અંદાજે 1950 વાહનો પાર્ક કરી શકાય તેવી સુવિધા ઊભી થશે.

5,990 ચોરસ મીટરમાં હરિયાળી, 17 લિફ્ટ અને સોલર-ટ્રી
અમદાવાદ સિટી સ્ક્વેરને આધુનિક સુવિધાઓની સાથે પર્યાવરણને અનુકૂળ બનાવવાની પણ યોજના છે. પ્રોજેક્ટના કુલ પ્લોટમાં 5,990 ચોરસ મીટર વિસ્તારમાં લેન્ડસ્કેપિંગ અને વૃક્ષારોપણ કરવામાં આવશે. વીજળીના ઉત્પાદન માટે આધુનિક સોલર-ટ્રી પણ સ્થાપિત કરવામાં આવશે. આઈકોનિક ટાવરમાં કુલ 17 લિફ્ટની વ્યવસ્થા રહેશે, જેમાંથી બે હાઈસ્પીડ લિફ્ટ મુલાકાતીઓને સીધી 175 મીટરની ટોચ સુધી પહોંચાડશે. પ્રોજેક્ટ સુધી પહોંચવા માટે 75 મીટર લાંબો એપ્રોચ બ્રિજ પણ બનાવવામાં આવશે. આ ઉપરાંત ગ્રાઉન્ડ, લોઅર અને અપર ગ્રાઉન્ડ સહિતના વિવિધ સ્તરે કુલ 50 આધુનિક કોમર્શિયલ દુકાનો વિકસાવવામાં આવશે.

અમદાવાદના પ્રવાસન અને મનોરંજન ક્ષેત્રને મળશે નવી ઓળખ
અંદાજે રૂ.570 કરોડના ખર્ચે તૈયાર થનારો અમદાવાદ સિટી સ્ક્વેર શહેરના આધુનિક શહેરી વિકાસનું નવું કેન્દ્ર બનવાની દિશામાં મહત્વપૂર્ણ પ્રોજેક્ટ છે. એક જ સ્થળે રેસ્ટોરન્ટ, કેફે, સ્કાય ડેક, સ્કાય વોક, વ્યુ ગેલેરી, આર્ટ ગેલેરી, શોપિંગ, ગાર્ડન અને એમ્ફીથિયેટર જેવી અનેક સુવિધાઓ ઉપલબ્ધ થશે. ખાસ કરીને 175 મીટરની ઊંચાઈએથી અમદાવાદનો નજારો નિહાળવાની તક શહેરવાસીઓ અને બહારથી આવતા પ્રવાસીઓ માટે નવું આકર્ષણ બની શકે છે. ટેન્ડર પ્રક્રિયા બાદ નિર્ધારિત 42 મહિનાના સમયગાળામાં પ્રોજેક્ટ પૂર્ણ થાય તો આવનારા વર્ષોમાં અમદાવાદની ઓળખમાં આ આઈકોનિક ટાવરનો પણ ઉમેરો થશે.

અમદાવાદ સિટી સ્ક્વેર : એક નજરમાં
વિશેષતા વિગતો
અંદાજિત પ્રોજેક્ટ ખર્ચ ₹570 કરોડ
ટાવરની ઊંચાઈ 175 મીટર
કુલ પ્લોટ વિસ્તાર 13,144 ચો.મી.
લેન્ડસ્કેપિંગ 5,990 ચો.મી.
રેસ્ટોરન્ટ ક્ષમતા 1,200થી વધુ વ્યક્તિ
ટેરેસ કેફે 200 વ્યક્તિ
સ્કાય ડેક 75 વ્યક્તિ
એમ્ફીથિયેટર 310 વ્યક્તિ
કોમર્શિયલ દુકાનો 50
કુલ લિફ્ટ 17
અંડરગ્રાઉન્ડ પાર્કિંગ 1,500 વાહન
વધારાનું પાર્કિંગ 450 વાહન
એપ્રોચ બ્રિજ 75 મીટર
કામ પૂર્ણ કરવાની સમયમર્યાદા 42 મહિના