ઈટાલીમાં વાવાઝોડાના લીધે તબાહી, એરપોર્ટની છત ઊડી

અમુક વિસ્તારોમાં 23,000 વખત વીજળી ત્રાટકી

ઇટાલીમાં ૨૧ ઓગસ્ટે આવેલા ખતરનાક વાવાઝોડા અને તોફાનનાં કારણે ફોરલી શહેરના લુઇગી રિડોલ્ફી એરપોર્ટ પર ભારે તબાહી મચી ગઈ. વાવાઝોડા દરમિયાન પવનની ઝડપ લગભગ ૧૨૦ કિલોમીટર પ્રતિ કલાક સુધી પહોંચી ગઈ હતી. સોશિયલ મીડિયા પર અનેક વીડિયો સામે આવ્યા છે જે આ વાવાઝોડાની અસર દર્શાવે છે. ભારે પવને એરપોર્ટ પર ઊભેલાં કેટલાંક હળવાં અને અલ્ટ્રાલાઇટ વિમાનોને પોતાની જગ્યાએથી ઉખાડી ફેંક્યા. વાયરલ વીડિયોમાં ચાર વિમાન પવનના કારણે હવામાં ઊછળતાં, પલટાતાં અથવા જમીન પર પડતાં જોવા મળી રહ્યા છે.
પરિસ્થિતિને જોતાં સુરક્ષાના કારણોસર એરપોર્ટને લગભગ એક કલાક માટે બંધ રાખવું પડ્યું હતું. વાવાઝોડાના પવનથી એરપોર્ટની કેટલીક ઇમારતોને ભારે નુકસાન પહોંચ્યું અને અરાઇવલ એરિયામાં લાગેલી છતનો કેટલોક ભાગ પણ અલગ થઈ ગયો. અલ જઝીરાના રિપોર્ટ અનુસાર, ઘટના બાદ બચાવ ટુકડી અને ફાયરબ્રિગેડના કર્મચારીઓને સ્થળ પર બોલાવવામાં આવ્યા હતા. જોકે, આ ઘટનામાં કોઈ ઘાયલ થવાના સમાચાર નથી. વાવાઝોડાની અસર ફોરલી-ચેસેના અને રાવેન્ના પ્રાંતના આસપાસના વિસ્તારોમાં પણ જોવા મળી. ભારે પવનનાં કારણે અનેક વૃક્ષો ધરાશાયી થયા. પરિસ્થિતિ સંભાળવા અને વાવાઝોડાથી થયેલા નુકસાનને સરખું કરવા માટે ફાયર વિભાગને ૧૫૦થી વધુ વખત મદદ માટે જવું પડયું હતું.
આ વાવાઝોડું ઇટાલીના અનેક ભાગોમાં ચાલી રહેલા ખરાબ હવામાનનો એક ભાગ હતું. લિગુરિયા, ટસ્કની, લોમ્બાર્ડી અને એમિલિયા-રોમાગ્ના સહિત અનેક વિસ્તારો આનાથી પ્રભાવિત થયા. ટસ્કનીમાં વાવાઝોડા દરમિયાન ૨૩,૦૦૦થી વધુ વીજળી પડવાની ઘટનાઓ નોંધાઈ. પીસાના કિનારે પવનની ઝડપ ૧૦૬ કિલોમીટર પ્રતિ કલાક અને ફ્લોરેન્સ પ્રાંતમાં ૧૦૩ કિલોમીટર પ્રતિ કલાક સુધી પહોંચી ગઈ. ભારે વરસાદના કારણે અનેક જગ્યાએ પૂર આવી ગયું. વૃક્ષો પડવા, વીજળી ગુલ થવી અને પાયાની સુવિધાઓને નુકસાન પહોંચવાની ઘટનાઓ પણ સામે આવી.