‘કૈલાશ પરબત’માં નિરાશા, ‘સર્વસ્યમ્’ અને ‘ઈનર સર્કલ’માં મોજેમોજ

કિન્નર આચાર્યની ફૂડ એક્સપ્રેસ

હું મુંબઈ હતો ત્યારે ઘણી વખત ત્યાંની કૈલાશ પરબત રેસ્ટોરાંમાં ગયો છું અને ત્યાં હંમેશા સંતોષ થયો છે. એટલે જ ઊંચી અપેક્ષાઓ રાખીને હું રાજકોટમાં શરૂ થયેલી કૈલાશ પરબત (કાલાવડ રોડ)માં ગયો. અને જે અનુભવ થયો એ એટલો ભયાનક અને ગંદો હતો કે, આ લખવું પડ્યું.
સામાન્ય રીતે હું જ્યાં જમવા જાઉં એ બધાં સ્થળોનો રિવ્યૂ લખતો નથી. કોઈ જગ્યાએ બહુ જામો પડી ગયો હોય તો એનાં વિશે લખું, ક્યાંક અત્યંત ખરાબ અનુભવ થયો હોય અને છેતરાયાની લાગણી થાય તો એનાં વિશે લખું. કૈલાશ પરબત બીજી કેટેગરીમાં આવે છે. ઓવર પ્રાઇઝડ, અત્યંત ઓછી ક્વોન્ટિટી, અત્યંત બેસ્વાદ ફૂડ અને બેફિકર સ્ટાફ. કોઈ એક બાબત માટે વખાણ કરવા હોય તો પણ આપણે ખોટું બોલવું પડે.
અમે શું મંગાવ્યું હતું? પાંઉભાજી. એકદમ ટેસ્ટલેસ. પાંઉ લગભગ કાચા જેવાં હતાં અને તેનાં પર બટર લગાવવામાં નહોતું આવ્યું, માત્ર સૂંઘાડવામાં આવ્યું હતું. કવૉન્ટિટી એટલી કે, એક વ્યક્તિ માટે પણ પર્યાપ્ત ન કહેવાય. છોલે-ભટુરે પણ બિલકુલ સ્વાદવિહિન. છોલેમાં નમક નાખવાનું કદાચ ભૂલાઈ ગયું હતું. આલુ ટિક્કી ચાટ પ્રમાણમાં સારી હતી પરંતુ ફરી એ જ સમસ્યા: પોર્શન સાઈઝ.
તમે જ્યારે પ્રીમિયમ રેટ્સ લેતા હોવ ત્યારે વસ્તુ અને પોર્શન સાઈઝમાં એ દેખાવું જોઈએ. ફાઈવસ્ટાર હોટેલમાં પ્રાઈસ ઊંચી હોય છે પરંતુ પોર્શન સાઈઝ એવી હોય છે કે, તમે તૃપ્ત થઈ જાઓ. સૌથી અગત્યની અન્ય એક બાબત: અત્યંત ખરાબ સર્વિસ. અમે જ્યારે ટેબલ પર બેઠાં ત્યારે તેનાં પર ચમચી-ફોર્ક વગેરે કશું જ નહોતું. આ બધી બેઝીક વસ્તુઓ માટે અમારે દસ વખત વેઈટરને કહેવું પડતું અને એ કોઈ એબ્સર્ડ વ્યક્તિ હતો. બધું ઘડીકમાં ભૂલી જાય, ફરી અમારે યાદ અપાવવું પડે. અમે તો મુંબઈના અનુભવોનાં કારણે બહુ ઊંચી આશા-અપેક્ષાઓ રાખીને ગયા હતાં અને હાથ લાગી નિરાશા.
છેલ્લાં થોડાં સમયમાં અમે રાજકોટની ચાર-પાંચ રેસ્ટોરાંમાં ગયા. કૈલાશ પરબત સિવાય બધી જગ્યાનો અનુભવ સુખદ રહ્યો. ‘સર્વસ્યમ્’ રેસ્ટોરાં અમે અદ્ભૂત સાઉથ ઈન્ડિયન માણ્યું. અમે ત્યાં પોડી મિની ઈડલી મંગાવી, ચેટ્ટીનાડ મસાલા ઢોસા, નીર ઢોસા, બેન્ને મસાલા ઢોસા અને માલાબાર કરી મંગાવ્યા હતાં. બધું જ અફલાતૂન. ‘સર્વસ્યમ્’ આજે રાજકોટના સુપ્રસિદ્ધ લોકો માટે હવે જાણીતું નામ બની ગયું છે.
‘સર્વસ્યમ્’માં બેસ્ટ સાઉથ ઈન્ડિયન ફૂડ તો મળે જ છે, આલા દરજ્જાનું નોર્થ ઈન્ડિયન -પંજાબી ફૂડ પણ મળી રહે છે. સર્વસ્યમ્નું ઍમ્બિયન્સ અફલાતૂન છે. ઑથેન્ટિક સાઉથ ઈન્ડિયનનું એ વિશ્ર્વાસપાત્ર સરનામું છે. પહાડી હર્બ પનીર અને દહીં કે શોલે જેવાં સ્ટાર્ટરથી લઈ કોલ્હાપુરી પનીર તથા સુફિયાની પનીર ટિક્કા મસાલા જેવાં મેઈન કોર્સ મૈસુર પાક, રવા કેસરી, યેલનીર પાયસમ જેવાં ડીઝર્ટ્સ પણ છે.
‘સર્વસ્યમ્’માં અમારા આખા પરિવારને તૃપ્તિ થઈ, ખૂબ આનંદ આવ્યો. આવો જ સંતોષ અમને રાજકોટમાં યાજ્ઞિક રોડ પર આવેલી બિઝ હોટેલમાં ત્રણ રેસ્ટોરાં છે. એક, ગ્રાઉન્ડ ફલોર પર ફાસ્ટફૂડ વગેરે, ઉપર ‘પંજરી’માં ગુજરાતી થાળી, ત્રીજી, અમે ગયાં હતાં એ (ફર્સ્ટ ફ્લોર પર) ઈનર સર્કલ.
પંજાબી અને કૉન્ટિનેન્ટલ માટે મોસ્ટ પ્રીમિયમ રેસ્ટોરાં બની ગઈ છે. અહીંના રેટ્સ-પ્રાઈસ પ્રીમિયમ છે તો ક્વૉલિટી અને ક્વૉન્ટિટી પણ પ્રીમિયમ છે. સ્વાદ એવો કે, દાઢે વળગી જાય. અમે બે પ્રકારનાં સૂપ, અવધી કોફતા અને પનીર રોલેટ મખની મંગાવ્યા હતાં. સાથે રોટી અને કુલચા. ઓહોહો… બેઉ સબ્જી એકદમ ચકાચક, છાસ-સૂપ પણ મજોમજો થઈ જાય તેવાં.
‘બિઝ’ (ઈનર સર્કલ)નું ઍમ્બિયન્સ પણ આનંદ આવે તેવું છે. આમ તો આ રેસ્ટોરાં ઘણાં વર્ષોથી ચાલે છે. પરંતુ થોડાં સમય પહેલાં ઈન્ટિરિયરમાં ફેરફાર સાથે નવું મેનુ લૉન્ચ થયું છે. આ ફેરફાર પછી અહીંનો ટેસ્ટ લાજવાબ બની ગયો છે.