ખાસ-ખબર ન્યૂઝ જૂનાગઢ, તા.9
ભારતીય ક્રિકેટ ટીમે ટી-20 વર્લ્ડ કપમાં ઐતિહાસિક વિજય મેળવી વિશ્વસ્તરે દેશનું ગૌરવ વધાર્યું છે. આ વિજયી ક્ષણને ઉત્સાહભેર ઉજવવા માટે જૂનાગઢ મહાનગર ભાજપ મિડીયા વિભાગના સુરેશ પાનસુરીયાની યાદી જણાવે છે કે, ભાજપ યુવા મોરચા દ્વારા ઝાંસીની રાણી સર્કલ પાસેના મેદાનમાં ફાઈનલ મેચના ભવ્ય લાઈવ ટેલીકાસ્ટનું આયોજન કરવામાં આવ્યું હતું.
આ પ્રસંગે શહેરના હજારો ક્રિકેટ પ્રેમીઓ અને યુવાનો એકત્રિત થયા હતા. દરેક બોલ પર વધતા રોમાંચ વચ્ચે ભારતની જીત નિશ્ચિત થતાં જ સમગ્ર મેદાન ’ભારત માતા કી જય’ના નાદથી ગુંજી ઉઠ્યું હતું. જીતની ખુશીમાં ભવ્ય આતશબાજી અને ઢોલના તાલે વિજયોત્સવ મનાવવામાં આવ્યો હતો, જેનાથી વાતાવરણ દેશભક્તિના રંગે રંગાયું હતું.
આ કાર્યક્રમમાં શહેર ભાજપ પ્રમુખ ગૌરવભાઈ રૂપારેલીયા, મહામંત્રીઓ વિનુભાઈ ચાંદ્રેગા, જયેશભાઈ ઘોરાજીયા, મિલનભાઈ ભટ્ટ, ડેપ્યુટી મેયર આકાશભાઈ કટારા તેમજ સ્ટેન્ડિંગ કમિટી ચેરમેન પલ્લવીબેન ઠાકર સહિતના અગ્રણીઓ ઉપસ્થિત રહ્યા હતા. મહાનુભાવો અને કાર્યકર્તાઓએ જનતા સાથે મળીને આ ગૌરવશાળી જીતની ઉજવણી કરી હતી. આ આયોજન દ્વારા યુવા મોરચાએ રમતગમત સાથે રાષ્ટ્રપ્રેમ અને એકતાની ભાવનાને વધુ પ્રબળ બનાવી હતી.
