રાજકોટના પંજાબ ઓટોનાં વર્કશોપ મહિલા કેશિયર મહિલા કંચન સોલંકી સામે 28 લાખની ઉચાપતની ફરિયાદ

નવે.2024થી જુલાઈ 2025ના ગ્રાહકોના બિલના પૈસા બારોબાર ચાઉં કરી ગયા

2009થી નોકરી કરતા મહિલાનો ઓડિટમાં ભાંડો ફૂટી ગયો : તાલુકા પોલીસે તપાસ હાથ ધરી

ખાસ-ખબર ન્યૂઝ રાજકોટ

રાજકોટના કાલાવડ રોડ પર આવેલ પંજાબ ઓટો મોબાઇલ્સના વર્કશોપ મહિલા કેશીયર સામે 28.03 લાખની ઉચાપતની ફરિયાદ નોંધાઈ છે નવેમ્બર 2024થી જુલાઈ 2025 સુધીના ગ્રાહકોના બિલના પૈસા કંપનીમાં જમા કરાવવાને બદલે બારોબાર ચાઉં કરી ગયા બાદ ઓડિટમાં ભાંડો ફૂટી જતા અંતે તાલુકા પોલીસ મથકમાં ફરીયાદ નોંધાઈ હતી. રાજકોટના જામનગર રોડ પર ભોમેશ્વર પ્લોટમાં રહેતાં અને તા.03/06/2018થી કાલાવડ રોડ પર આવેલ પંજાબ ઓટો મોબાઇલ્સમાં સર્વીસ મેનેજર તરીકે ફરજ બજાવતા ભાર્ગવભાઈ કાંતીલાલ પરમાર ઉ.34એ ગુરુપ્રસાદ ચોક ત્રિવેણીનગરના હાલ કણકોટ રોડ ઉપર રહેતા અને વર્કશોપમાં કેશિયર તરીકે ફરજ બજાવતા કંચનબેન ઉકાભાઈ સોલંકી સામે તાલુકા પોલીસ સ્ટેશનમાં નોંધાવેલી ફરિયાદમાં જણાવ્યું હતું કે કંચન સોલંકી 2009થી પંજાબ ઓટો મોબાઈલ્સમાં જોડાયા હતા તેઓને વર્કશોપ કેશીયર તરીકેની ફરજ દરમ્યાન ગ્રાહકો પોતાના વાહનો સર્વિસમાં મુકવા આવે ત્યારે શો રૂમ એડવાઇઝર દ્વારા તે ગ્રાહકોનું જોબ કાર્ડ ભરવામાં આવે અને તેમાં ગ્રાહકની સહી લઇ ફલોર સુપર વાઇઝરને સોંપવામાં આવે અને ફલોર સુપર વાઇઝર તે જોબકાર્ડ આધારે મીકેનીક સુપર વાઇઝર પાસે ગ્રાહકની ગાડીમાં જોબકાર્ડ મુજબનું કામ કરાવી તેમાં સ્પેર પાર્ટસ તેમજ મજુરીનો ચાર્જ ઉમેરી જોબકાર્ડ તથા ગ્રાહકના વાહનની ગાડીની ચાવી વર્કશોપ કેશીયર એટલે કે કંચનબેન સોલંકી પાસે જમા કરાવે છે ગ્રાહક પોતાનુ વાહન લેવા આવે ત્યારે કંચનબેન જોબકાર્ડ મુજબનો ચાર્જ ગ્રાહક પાસેથી મેળવી જોબકાર્ડમાં ગ્રાહકની સહી લઇ ગ્રાહકને બીલ આપે છે તેમજ અન્ય બે બ્રાંચો આમ્રપાલી તથા બ્રહ્મસમાજ ચોકનો પણ રોજે રોજનો હિસાબ બીજા દિવસે કંચનબેન સોલંકી પાસે જમા કરાવતા હોય છે કંપનીના સોફટવેરમાં એન્ટ્રી થયા બાદ તે તમામ બીલની પંજાબ ઓટો મોબાઇલ્સના એકાઉન્ટીંગ સોફટવેરમાં એન્ટ્રી કંચનબેન સોલંકીને કરવાની હોય છે ત્યાર બાદ કંચનબેન ત્રણેય બ્રાંચનો હિસાબ કરી તે તમામ રકમ બીજા દિવસે બેંકમાં જમા કરાવવા આપતા હોય છે 2024માં શો રૂમમાં આશરે ચારથી પાંચ મહીના જેટલો સમય રીનોવેશનનુ કામકાજ ચાલુ હતુ, જેથી તે ફાયનાન્સીયલ વર્ષનુ ઓડીટ રીપોર્ટ થયેલ ન હોય અને અમદાવાદ ખાતે આવેલ હેડ ઓફીસના એકાઉન્ટન્ટ દ્વારા ઓગષ્ટ 2025માં રાજકોટ બ્રાંચના હિસાબો ચેક કરતા વર્કશોપ કેશીયર દ્વારા 28.03 લાખની ઉચાપત કરી હોવાનુ ધ્યાન પર આવ્યું હતું જેથી રાજકોટ બ્રાંચ દ્વારા હિસાબો ચેક કરતા નવેમ્બર/2024 થી જુલાઇ/2025 સુધીમાં 28,03,919ના બીલની હોન્ડા કંપનીના સોફટવેરમાં એન્ટ્રી થયેલ હોય જે તમામ બીલોની મોબાઈલ્સ શો રૂમના એકાઉન્ટ સોફટવેરમાં એન્ટ્રી નહી કરી રકમ પોતાના અંગત ઉપયોગમાં વાપરી જઈ ઉચાપત કરતાં ફરિયાદ નોંધાવતા તાલુકા પોલીસે ગુનો નોંધી તપાસ હાથ ધરી છે.