મારી સાથે લગ્ન કરી લે નહીં તો તને મારી નાંખીશ: યુવતી લગ્ન માટે તાબે ન થતાં સુનીલ બારડે આપી ધમકી

સુનીલ બારડના શારીરિક માનસિક ત્રાસથી કંટાળી અંતે યુવતી પોલીસના શરણે

અવાર-નવાર માર મારતો હોવાની પણ યુવતીની રાવ

ખાસ-ખબર ન્યૂઝ રાજકોટ

સમાજમાં યુવતી સાથે છેડતીના કિસ્સાઓ દિવસે ને દિવસે વધી રહ્યા છે. આવારા લુખ્ખા તત્ત્વોને જાણે કોઈ કાયદા-કાનુનનો ડર જ ન હોય તેવી રીતે ખુલ્લેઆમ યુવતીઓ સાથે છેડતી કરી, તેની સાથે સંબંધ રાખવા અને લગ્ન કરવા દબાણ કરવું સહિતના ત્રાસ આપવામાં આવતા હોય છે ત્યારે રાજકોટમાં પણ એક એવો જ કિસ્સો પ્રકાશમાં આવ્યો છે. એર હોસ્ટેસનો અભ્યાસ કરતી એક યુવતીને પરાણે સંબંધ રાખવાનું દબાણ કરી તેમજ મારી નાખવાની ધમકી આપતો કિસ્સો પ્રકાશમાં આવ્યો છે. યુવતીએ અંતે કંટાળી અને ગભરાઈ આ અંગે રાજકોટ પોલીસ કમિશનરમાં સુનીલ હરદાસભાઈ બારડ વિરુદ્ધ ફરિયાદ નોંધાવી છે.

બનાવની વિગત એવી છે કે વેરાવળના અજોઠા ગામનો સુનિલ હરદાસભાઈ બારડ (ઉ.વ.20) વિરુદ્ધ થયેલી ફરિયાદમાં યુવતીએ જણાવ્યું હતું કે હું મારા માવતર સાથે રહું છું અને એર હોસ્ટેસનો અભ્યાસ કરું છું. મારી આ કામના આરોપી સાથે વર્ષ 2021માં સોશ્યલ મીડિયા (ઈન્સ્ટાગ્રામ) મારફતે ઓળખાણ થઈ હતી. ત્યારબાદ આરોપીએ મારા મોબાઈલ નંબર મેળવેલા હતા અને મારી સાથે ફોનમાં વાતચીત કરતા હતા. આમ ચાર વર્ષ એકબીજા સાથે ફોનમાં વાતચીત કરી છે અને મિત્રતાના સંબંધો રાખેલા છે. ત્યારબાદ ફરિયાદીએ આરોપી સાથે કોઈપણ જાતના સંબંધો રાખવા ન હોય જેથી આરોપીને મને યુવતીએ ફોન ન કરવાની તથા કોઈપણ રીતે મારો સંપર્ક ન કરવાની ચોખ્ખી ના પાડી દીધી હતી.

આમ છતાં આ આરોપી સુનીલ મને તેની સાથે સંબંધ રાખવા માટે દબાણ લાવતો હતો અને જો આરોપી સુનીલ સાથે ફોનમાં વાતચીત નહીં કરીએ તો તેમની સાથે સંબંધ નહીં રાખીએ તો આરોપી દવા પી લેશે તેવી યુવતીને ધમકી આપી તેમની સાથે સંબંધ રાખવા વારંવાર ઈમોશનલી બ્લેકમેઈલ કરતો હતો. ફરિયાદીએ એર હોસ્ટેસની ટ્રેનીંગ લેતા હોય તેમની કારકિર્દી બનાવવા માગતા હોય જેથી આરોપીને સંબંધ રાખવાની ના પાડી દીધેલી હતી જેથી આરોપીએ આજથી આશરે એક વર્ષ પહેલાં ઝેરી દવા પીધેલી હતી, ત્યારે આરોપીના કાકા હીરેનભાઈએ મારી માતાને ફોન કરીને આરોપીને એક વખત જોઈ જવા માટે જણાવેલું હતું જેથી હું આરોપીને મળવા માટે લેન્ડમાર્ક હોસ્પિટલે જતા હતા ત્યારે એસ્ટ્રોન ચોક પાસે આરોપીના કાકા મને મળ્યા ત્યારે તેમણે મને ખરાબ ગાળો આપી અને મને જણાવેલું કે તારા આખા પરિવારને કારની ડેકીમાં પુરી અપહરણ કરીને લઈ જવાની મારી ત્રેવડ છે, તેવું કહીને મને આરોપીની સાથે સંબંધ રાખવા માટે દબાણ કરેલું હતું અને ત્યારબાદ આરોપીના કાકાએ કાળા કાચવાળી તેમની કારમાં મને બળજબરીપૂર્વક બેસાડીને હોસ્પિટલે લઈ ગયા હતા.

આરોપીએ મને ડરાવી ધમકાવીને મોબાઈલ ફોન આપેલો હતો અને હું જ્યારે ક્લાસમાં હોય ત્યાં પણ આરોપી મને ચાલુ ક્લાસે તેમની સાથે વાતચીત કરવા માટે દબાણ કરે છે અને ક્લાસેથી છુટીને હું જ્યારે મારા ઘરે જાઉં ત્યારે આરોપી તેમના અલગ અલગ મિત્રોને મોકલીને મારી સાથે ફોનમાં વાતચીત કરવા માટે કહેવડાવે છે અને આરોપી સાથે ફોનમાં વાતચીત ન કરીએ તો આરોપી મારા કલાસીસે રીસેપ્શનમાં આવીને બધાની હાજરીમાં મને હેરાન પરેશાન કરવાની કોશીષ કરે છે આમ ંતે આ સુનીલ બારડના ત્રાસથી કંટાળી પોલીસ કમિશનરમાં ફરિયાદ નોંધાવી છે.

વધુમાં ફરિયાદમાં યુવતીએ જણાવ્યું હતું કે હું જ્યાં જ્યાં જાઉં ત્યાં આરોપી મારો પીછો કરતો હતો અને મને તેમની સાથે ફોનમાં વાતચીત કરવા માટે દબાણ કરતો હતો અને આ બાબતે મને ખરાબ ગાળો આપીને મને માનસિક ટોર્ચરીંગ કરતો હતો. હાલમાં આ કામનો આરોપી મને તેની સાથે સંબંધ રાખવા માટે ખૂબ જ માનસિક ટોર્ચરીંગ કરે છે તેમજ આરોપી અમોને તેમની સાથે લગ્ન કરવા માટે દબાણ કરે છે અને જો હું ફરિયાદી આરોપી સાથે સંબંધ નહીં રાખું કે હું તેમની સાથે લગ્ન નહીં કરું તો આરોપી ઝેરી દવા પીને આત્મહત્યા કરી લેશે અને મને ખોટા ગુન્હામાં ફીટ કરાવી દેશે તેવી ધમકી આપે તેમજ મારા ફોટા સોશિયલ મીડિયામાં વાયરલ કરીને મને બદનામ કરી નાખવાની પણ ધમકી આપે છે. આવું કરીને આરોપી મને યેનકેન પ્રકારે બ્લેકમેઈલ કરે છે તેમજ હું ગુજરાતમાં ગમે ત્યાં અભ્યાસ કરવા કે નોકરી કરવા જઈશ ત્યાં આરોપી મને શોધી લેશે અને મને હેરાન પરેશાન કરશે જ તેવી આરોપી સુનીલ મને ધમકી આપે છે. આ કામના આરોપીને સતત શારીરિક માનસિક ત્રાસથી હું કંટાળી ગયેલી અને હું માનસિક ડીપ્રેશનમાં આવી ગઈ છું અને હું ટ્રેનીંગમાં પણ સરખું ધ્યાન આપી શકતી નથી તો આ અંગે મને ન્યાય મળે તે માટે પોલીસ કમિશનરમાં ફરિયાદ નોંધાવી છે.