સાવરકુંડલામાં લીમડી ચોક પાસે ઉભેલા ટીઆરબી જવાનનું લોકો સાથે અશોભનીય તોછડું વર્તન

ટીઆરબી જવાને કાર હટાવવા બાબતે મનફાવે તેવી ભાષામાં તોછડાઈ અને ઉદ્ધત વર્તન કર્યું
ખાસ-ખબર ન્યૂઝ સાવરકુંડલા

સાવરકુંડલા શહેરમાં લીમડી ચોક પાસે ઉભેલા ટીઆરબી જવાન દ્વારા ટ્રાફિક સંદર્ભે એક જાગૃત નાગરિક દ્વારા ધ્યાન દોરવામાં આવતાં આ કર્મચારી દ્વારા ઉદ્ધત વર્તન કરતો વિડિયો વાયરલ થયો. વાત જાણે એમ છે કે સાવરકુંડલા ખાતે આવેલ લીમડી ચોક વિસ્તારમાંથી બે ત્રણ રસ્તાનાં ફાટાં પડે છે. અહીંથી હવેલી તરફ મેઈન બઝાર તરફ અને મણીભાઈ ચોક તરફ જવા માટેના રસ્તાઓ હોય વાહનવ્યવહાર તથા લોકોની આવજાવ ઘણાં પ્રમાણમાં જોવા મળે છે. વળી આ ચોકમાં અનેક દુકાનો પણ આવેલી છે એટલે ખરીદી માટે ગ્રાહકોની પણ અવરજવર રહે છે.

આ વિસ્તારમાં ચોકમાં વાહનોનો જમાવડો પણ જોવા મળે છે. આડેઘડ પાર્કીંગ કરેલા વાહનોથી લોકોને અવરજવરમાં મુશ્કેલી પડતી જોવા મળે છે. વળી દિવાળીના તહેવારો નજીક આવી રહ્યા હોય ટ્રાફિક વધુ રહે એ સ્વાભાવિક છે. આ ચોકમાં ઉભેલા ટીઆરબી કર્મચારીને એક જાગૃત નાગરિકે પોલીસ લખેલી કારને થોડી દૂર હટાવવા માટે નમ્ર ભાષામાં નિવેદન કરતાં સામેથી આ ટીઆરબી કર્મચારીએ આ કાર નહીં હટે અને જેમ ફાવે તેવી ભાષામાં તોછડાઈ અને ઉદ્ધત વર્તન કર્યું છે.

આમ સાવરકુંડલા શહેરમાં જો આવી રીતે ટીઆરબીના કોઈ પણ કર્મચારી આવું બેફામ વર્તન કરે તે કેમ ચલાવી લેવાય? આ સંદર્ભે આ બાબતનો વિડિયો પણ વાયરલ થયેલ છે. સાવરકુંડલા શહેરમાં કાયદાના રખેવાળો જ જો કાયદાને માન ન આપે તો પછી સાવરકુંડલાના સુજ્ઞ નાગરિકોએ કોની પાસે કાયદા પાલનની અપેક્ષા રાખવી?
આ સંદર્ભે વાયરલ થયેલ વિડિયોમાં એ કર્મચારી પોતાનું નામ પણ ઉચ્ચારી અને કાયદાને પણ પડકાર ફેકતો હોય તેવું જોવા મળેલ. વધુમાં અહીં બીજા બે ટીઆરબી કર્મચારીઓ પણ આ સંદર્ભે મૂક પ્રેક્ષક બની તમાશો જોતાં હોય તેમ એક કર્મચારી તો અમારે તો આ મેઈન રોડની ડ્યુટી છે અમે કશું ન કરી શકીએ એવો લૂલો બચાવ પણ કરતાં જોવા મળેલ છે. આ બનાવની સઘન તપાસ કરી આવા કહેવાતા કાયદાના રખેવાળોને માટે પણ સખ્ત કાર્યવાહી કરવી જરૂરી છે. જાગૃત નાગરિકો સાથે જો આવું બનતું હોય તો ભલા ભોળા આમ આદમીને માટે તો આવા કર્મચારીઓ કેવું વલણ અખત્યાર કરતાં હશે.? આમ સાવરકુંડલા એટલે નાવલીની ભૂમિ, જોગીદાસબાપુની ધરતી એમ પણ કહી શકાય. સાવરકુંડલાના કહેવાતા આવા કાયદાના રખેવાળોને તંત્ર દ્વારા કાયદાકીય પાઠ ભણાવવામાં આવે જેથી ભવિષ્યમાં કોઈ કર્મચારી આવું તુમાખીભર્યુ તોછડું અને ઉદ્ધત વર્તન કોઈ શહેરીજનો સાથે ન કરે.