ખાસ-ખબર ન્યૂઝ પોરબંદર, તા.24
વિશ્વ વિખ્યાત ટીવી શો કોન બનેગા કરોડપતિમાં અમિતાભ બચ્ચન સામે હોટ સીટ પર બેસીને રૂપિયા 25 લાખ જીતનાર પોરબંદરના શીશલી ગામની ખેડૂત પુત્રીએ પોતાની આ સક્સેસ યાત્રાની દરેક વાતો પોરબંદર વીલા સર્કિટ હાઉસ ખાતે આયોજિત પત્રકાર પરિષદમાં દિલ ખોલીને શેર કરી હતી.પોરબંદર વિસ્તારની ખેડૂત પરિવારની કોમ્પ્યુટર એન્જિનિયર યુવતીએ પોતાના જ્ઞાનના અનુભવના આધારે કોન બનેગા કરોડપતિ જ્ઞાન વર્ધક ટીવી શો કેબીસીમાં સદીના મહાનાયક અમિતાભ બચ્ચનના પ્રશ્નોના ખૂબ જ કોન્ફિડન્સ સાથે સાચા જવાબો આપીને રૂપિયા 25 લાખ જીતી સમગ્ર પોરબંદર વિસ્તારનું ગૌરવ વધાર્યું હતું. પોતાના જ્ઞાનના સહારે 25 લાખ જેવી માતબર રકમ જીતી પોરબંદર પરત આવી પહોંચેલી જયા ઓડેદરાએ એક પત્રકાર પરિષદમાં પોતાની આ સફળ જ્ઞાન યાત્રાની વાતો શેર કરી હતી.
- Advertisement -
પોતાની સફળતા સ્વર્ગસ્થ માતાને સમર્પિત
જયા ઓડેદરા કેબીસીમાં ભાગ લેવા માટે તૈયારીઓ કરતી હતી ત્યારે જયાને અમિતાભ બચ્ચન સાથે હોટ સીટ પર જોવા માટે તેમની માતાની ખૂબ ઈચ્છા હતી, પરંતુ જયા કેબીસીના ઇન્ટરવ્યૂ માટે જાય તે પહેલાં જ તેમની માતાનું બીમારી સબબ અવસાન થઇ ગયું. આથી જયાએ તેમની માતાની ઈચ્છા પૂર્ણ કરવા માટે આવી વિકટ પરિસ્થિતિમાં પણ હિંમતપૂર્વક તૈયારી કરીને અંતે અમિતાભ બચ્ચન સામે હોટ સીટ પર બેસી 25 લાખના પ્રશ્ર્નોના સાચા જવાબ આપીને સફળતા મેળવી એ સક્સેસ એમની સ્વર્ગસ્થ માતાને સમર્પિત કરી એમની ઈચ્છા પૂર્ણ કરી હતી. આ ટીવી શોના ઇન્ટરવ્યુ સમયથી લઈને એપિસોડના લાઈવ પ્રસારણ સુધી સતત માર્ગદર્શન અને પ્રોત્સાહન પૂરું પાડવા માટે લાખણશીભાઈ ગોરાણિયાનો ખાસ આભાર માન્યો હતો.
