ખોટી રીતે આપ્યા હોવાની શંકા : વર્તમાન સીપી દ્વારા 200 અરજી નામંજૂર કરાઈ
રાજકોટમાં ફટકડી લટકાવીને સીનસપાટા કરવાના શોખીનો સામે પોલીસે આકરાં પગલાં ભરવાનું શરૂ કર્યું છે 2019થી 2021 દરમિયાન ઇસ્યુ થયેલા હથિયારના પરવાનાઓ જ્યારે રિન્યૂઅલ માટે આવ્યા ત્યારે પોલીસ કમિશનર દ્વારા 488 લાઇસન્સ રદ કરી દેવામાં આવતા ફટકડીના શોખીનોને આંચકો લાગ્યો છે વર્તમાન સીપી દ્વારા સ્થાનિક પીઆઈના અભિપ્રાયથી 200 અરજી નામંજૂર કરવામાં આવી હોવાનું જાણવા મળ્યું છે.
- Advertisement -
પોલીસના સત્તાવાર સૂત્રોના જણાવ્યા મુજબ, રાજકોટ શહેરમાં અત્યાર સુધીમાં કુલ 3001 હથિયાર લાઇસન્સ ઈસ્યૂ થયેલા છે રાજકોટમાં ભૂતકાળમાં ખૂબ જ સહેલાઈથી લાઇસન્સ વહેંચાયા હતા જોકે, તત્કાલીન સીપી રાજુ ભાર્ગવ અને વર્તમાન પોલીસ કમિશનર બ્રજેશકુમાર ઝાના કડક વલણને કારણે છેલ્લા ત્રણ વર્ષમાં રિન્યૂ માટે આવેલા 488 પરવાના રદ કરાતા ફટકડી લટકાડવાના શોખીનોના સપના અધૂરા રહી ગયા છે. જોકે હથિયાર લાઇસન્સ રિન્યૂ અરજી નામંજૂર કરતા પૂર્વે પોલીસ કમિશનર અરજદારને એક નોટિસ ઇસ્યૂ કરે છે અને રજૂઆતની તક આપે છે જેમાં યોગ્ય લાગે તો જ હથિયાર લાઇસન્સ રિન્યૂ કરવાનો નિર્ણય કરાઇ છે. રાજકોટમાં હથિયાર લાઇસન્સ રિન્યૂઅલ વખતે 8 પેરામીટર્સની કડક ચકાસણી કરાય છે. જેમાં ક્રિમિનલ રેકોર્ડ જોવાય છે. અગાઉ મોટી આર્થિક લેવડ-દેવડના કારણે લાઇસન્સ મળ્યું હોય, તે કારણ ઓનલાઈન બેન્કિંગના જમાનામાં હવે હયાત છે કે નહીં તે ચકાસાય છે. 65 વર્ષથી વધુ ઉંમર હોય, નબળું વિઝન કે ગંભીર બીમારી જેવા હેલ્થ ફેક્ટર હોય અથવા હથિયાર રાખવાની સલામત જગ્યા ન હોય તો પરવાનો રદ થાય છે. પીઆઈના રિપોર્ટના આધારે જ વર્તમાન પોલીસ કમિશ્નરના કાર્યકાળમાં 200થી વધુ અરજીઓ નામંજૂર કરાઈ છે.
ગન લાઈસન્સ માટે કરેલી 1000 અરજી પેન્ડિંગ
રાજકોટમાં છેલ્લા બેથી ત્રણ વર્ષમાં નવા લાઇસન્સ મેળવવા માટે આશરે 1000 જેટલી નવી અરજીઓ પોલીસ કમિશનર કચેરીએ આવી છે. જોકે ભૂતકાળની ગેરરીતિઓમાંથી પાઠ ભણીને પોલીસે હાલમાં આ તમામ 1000 અરજીઓ પેન્ડિંગ રાખી દીધી છે.
