મુન્દ્રા હાઇવે પરથી ચોરાઉ ઓઈલ સહિત 4.34 કરોડના મુદામાલ સાથે 11 શખ્સની ધરપકડ

રાજકોટ શહેર અને જિલ્લાના ક્રાઇમના સમાચાર

કચ્છમાં એસએમસીની ટીમે મોટો દરોડો પાડી ઓઇલ ચોરી કૌભાંડનો પર્દાફાશ કર્યો છે મુન્દ્રા હાઇવે પરથી ચોરાઉ ઓઈલ સહિત 4.34 કરોડના મુદામાલ સાથે 11 શખ્સોની ધરપકડ કરી છે પોલીસે 6 ટેન્કર, 2 લાખ કિલોથી વધુ ઓઇલ, ચોરીના સાધનો જપ્ત કરી આદિપુરના મુખ્ય સૂત્રધાર અબ્દુલ અહેમદ હાલેપોત્રા સહિત 5 શખ્સોને વોન્ટેડ જાહેર કર્યા છે. ગાંધીનગર સ્ટેટ મોનિટરિંગ સેલની ટીમે પશ્ચિમ કચ્છ-ભુજ જિલ્લાના પ્રાગપર પોલીસ સ્ટેશનની હદમાં ઓઇલ ચોરીના મોટા કૌભાંડનો પર્દાફાશ કર્યો છે. પીઆઈ એસ.એમ. જાડેજા અને તેમની ટીમે ચોક્કસ બાતમી આધારે મુન્દ્રા હાઇવે પર આવેલા રતાડીયા ગામની સીમમાં દરોડો પાડીને કુલ 4,34,52,635નો મુદ્દામાલ જપ્ત કર્યો છે આ મેગા ઓપરેશન દરમિયાન ઘટનાસ્થળેથી ઓઇલ ચોરીના નેટવર્કમાં સામેલ 11 આરોપીઓ યુપીના રાજેશકુમાર રામવીરસિંહ રાજપૂત, અવનિશ રામશંકર કાશ્યપ, ઝારખંડના ચંદ્રિકા ભોલાદા પાંડે, રાજસ્થાનના વિક્રમસિંહ ભવરસિંહ ભાટી, ઝારખંડના વિકાસકુમાર જ્યનારાયણ મહેતા, કશિવકુમાર રાજારામ પાસવાન, કચ્છના શક્તા માશાભાઈ મુંધવા, અરૂણ મુના ઉરાંવ, શનીકુમાર બંગાળી પ્રસાદ મહેતા, યુપીના આકાશકુમાર રાજારામ યાદવ અને બિહારના પ્રભાત ભૂષણસિંહ સભાપતિસિંહને રંગેહાથ ઝડપી લીધા છે, જ્યારે મુખ્ય સંચાલક આદિપુરના અબ્દુલ ગફુર અહેમદ હાલેપોત્રા, અબ્દુલ અહેમદ હાલેપોત્રા, પંકજ, ધ્રુવરાજસિંહ પ્રદ્યુમનસિંહ જેઠવા, ગોપાલ લાઘા ગઢવી અને હરભમ રબારીને વોન્ટેડ જાહેર કરી શોધખોળ હાથ ધરી છે. પોલીસે રેડ દરમિયાન ઘટનાસ્થળેથી ઓઇલ ભરેલા વિશાળ ટેન્કરો અને ચોરી કરવા માટે વપરાતા અદ્યતન સાધનો કબજે કર્યા છે. જેમાં રૂ 1.50 કરોડની કિંમતના 6 ઓઇલ ટેન્કર અને તેમાં ભરેલું 2,05,170 કિલો ઓઇલ રૂ.2.81 કરોડનું જપ્ત કરાયું છે. આ સિવાય ટેન્કરમાંથી ચોરી કરાયેલું 1,78,090 ની કિંમતનું 1,465 કિલો ઓઇલ પણ અલગથી મળી આવ્યું હતું ઉપરાંત બાઈક, 10 મોબાઇલ ફોન, 50 પ્લાસ્ટિકના બેરલ, કેરબા, ઇલેક્ટ્રિક મોટર, પ્લાસ્ટિક પાઇપો, વજન કાંટો, લીકેજ સ્ટોપર્સ, ઓઇલ ટ્રાન્સફર કરવાની આયર્ન પાઇપ અને અન્ય નાના-મોટા સાધનો મળી આવ્યા છે.

વિછિયામાં 15 હજાર સામે 66 હજાર ચૂકવ્યા છતાં દાગીના પરત ન આપ્યા
વિંછિયામાં મહિલાએ બીમારીની સારવાર માટે પાડોશમાં રહેતા શખસ પાસેથી 15 હજાર વ્યાજે લીધા હતા જેની સામે 66 હજાર ચૂકવી દીધા છતાં આ શખ્સ ચાર મહિનાના વ્યાજની ઉઘરાણી કરી મહિલાએ ગીરવે મૂકેલા દાગીના પડાવી લઇ વ્યાજની રકમ નહીં ચૂકવે તો ટાંટીયા ભાંગી નાખવાની ધમકી આપતા ફરિયાદ નોંધાવવામાં આવી હતી. વિંછિયામાં બોટાદ રોડ પર રહેતા મધુબેન વલ્લભભાઈ પાટડીયા ઉ.40એ પાડોશમાં રહેતા કનુ ભીખા રાવળ સામે નોંધાવેલી ફરિયાદમાં જણાવ્યું હતું કે, 2022માં તે બીમાર પડતાં પૈસાની જરૂરિયાત હોય જેથી કનુ પાસેથી 15 હજાર વ્યાજે લીધા હતા જામીન પેટે સોનાની બુટ્ટી અડધા તોલાની અને ચાંદીના સડા 500 ગ્રામના ગીરવે મૂકયા હતા. વ્યાજે રકમ લીધા બાદ દર મહિનાની પહેલી તારીખે મહિલા કનુના ઘરે જઈ વ્યાજના 1500 ચૂકવતી હતી છેલ્લા ચારેક મહિનાથી પૈસાની સગવડ ન થતા તે વ્યાજના ચૂકવી શકતી ન હતી. જેથી કનુએ ઘરે આવી વ્યાજની પઠાણી ઉઘરાણી કરી કહેતો હતો કે, જો તમે વ્યાજના પૈસા નહીં આપો તો તમારા ઘરેણાં વેચાવી નાખીશ તેમ કહી ગાળો આપી ટાંટીયા ભાંગી નાખવાની ધમકી આપી હતી દરમિયાન મહિલા પાસે પૈસાની સગવડતા થતા તેણે ગઈ તા.28 ના સાંજના કનુ પાસે જઈ 15 હજાર રોકડ આપ્યા હતા જે કનુંએ લઇ લીધા હતાં. બાદમાં મહિલાએ તેની પાસે દાગીના માંગતા તેણે કહ્યું હતું કે, છેલ્લા ચાર મહિનાથી વ્યાજના પૈસા આપ્યા નથી તે આપીશ પછી જ તમારા ઘરેણા પાછા આપીશ અને જો તું મારા ઘરે ઘરેણા લેવા આવી તો તારા ટાંટિયા ભાંગી નાખીશ કહી ગાળો આપી હતી અને કહ્યું હતું કે મારા ઘરે બીજીવાર આવી તો મજા નહીં આવે. જેથી મહિલાએ 15 હજાર વ્યાજે લીધા હોય તેના બદલામાં 66 હજાર ચૂકવી દીધા હોવા છતાં દાગીના પરત નહીં આપી પઠાણી ઉઘરાણી કરી ધમકી આપતાં અંતે મહિલાએ ફરિયાદ નોંધાવી હતી.

હોસ્ટેલમાં રહી અભ્યાસ કરતી અમરેલી પંથકની સગીરા સાથે દુષ્કર્મ
રાજકોટમાં એક હોસ્ટેલમાં રહેતી અમરેલી પંથકની 16 વર્ષીય વિદ્યાર્થિનીને મોહજાળમાં ફસાવી જૂનાગઢના પૂર્વ સહપાઠીએ ધમકીઓ આપી રાજકોટ અને જૂનાગઢ લઇ જઈ દુષ્કર્મ ગુજારાયાનો કિસ્સો પોલીસ ચોપડે નોંધાયો છે યુનિવર્સીટી પોલીસે જૂનાગઢ રહેતા હર્ષદસિંહ લાખાભાઇ દેવધરીયા અને મદદગારી કરનાર એક કિશોર સામે દુષ્કર્મ અને પોક્સો સહિતની કલમો હેઠળ ગુનો નોંધી તપાસ શરૂ કરી છે. પોલીસ પાસેથી પ્રાપ્ત વિગત મુજબ ભોગ બનનાર છાત્રા અઢી વર્ષ પહેલા જૂનાગઢમાં એક હોસ્ટેલમાં રહી અભ્યાસ કરતી હતી. ત્યારે સાથે જ અભ્યાસ કરતા હર્ષદસિંહ સાથે સંપર્ક થયા બાદ બંને વચ્ચે વાતચીત થતી હતી. ત્યાર બાદ 2025માં તે રાજકોટમાં એક હોસ્ટેલમાં રહીને – અભ્યાસ કરતી હતી ચારેક મહિના પહેલા આરોપી હર્ષદસિંહ રાજકોટ આવી છાત્રાને મોહજાળમાં ફસાવી રૈયા ગામ વિસ્તારમાં રહેતા પરિચીત કિશોરના ઘરે લઈ જઈ બળજબરી પૂર્વક દુષ્કર્મ આચર્યુ હતું. બાદમાં આરોપીએ જો કોઈને કહીશ તો જાનથી મારી નાખીશ ધમકી આપી હતી. ત્યાર બાદ તે વેકેશનમાં જૂનાગઢ ગઈ ત્યાં પણ આરોપી હર્ષદસિંહે ધમકી આપી અવારનવાર દુષ્કર્મ આચર્યું હતું. રાજકોટ આવ્યા બાદ તેણે હોસ્ટેલના ગૃહપતિને વાત કરતા તેણે તેના પરિવારજનોને જાણ કરતા તેઓ રાજકોટ આવ્યા બાદ યુનિવર્સીટી પોલીસનો સંપર્ક કર્યો હતો જેના આધારે પોલીસે ભોગ બનનારની ફરિયાદ દાખલ કરી આરોપીઓની શોધખોળ હાથ ધરી છે.

સ્પામાંથી 70 હજારનો દારૂ મળી આવતા સંચાલકની ધરપકડ
રાજકોટના 150 ફૂટ રીંગ રોડ પર બીગ બજાર પાછળ સત્યસાંઈ રોડ પર આવેલા કાયા ફેમિલિ – સ્પામાં ક્રાઈમ બ્રાંચે દરોડો પાડી 70 હજારના અંગ્રેજી દારૂ સાથે ઘંટેશ્વર રહેતા સંચાલક પ્રતિપાલસિંહ અજયસિંહ ચુડાસમાને ઝડપી લીધો હતો દારૂ જુગારના કેસો કરવાની સૂચના અન્વયે ક્રાઈમ બ્રાંચની ટિમ પેટ્રોલિંગમાં હતી ત્યારે ચોક્કસ બાતમી આધારે કાયા સ્પાનું બોર્ડ લગાડેલા – મકાનમાં દરોડો પાડતાં ત્રીજા માળે આવેલા રૂમમાંથી અંગ્રેજી દારૂની નાની-મોટી મળી 120 બોટલ મળી આવી હતી જેથી આરોપીની અટકાયત કરી હતી આરોપીએ આ મકાન ભાડે રાખ્યું છે. સ્પાનું રજીસ્ટ્રેશન પણ કરાવેલું છે. પરંતુ તેને લગતી કોઈ પ્રવૃતી થતી ન હતી. દારૂ ક્યાંથી લઈ આવ્યો હતો તે સહિતના મુદ્દે હવે તપાસ કરવામાં આવશે.

કાલાવડ રોડ પર 3.50 લાખના ડુપ્લીકેટ તમાકુના ડબ્બા સાથે શખ્સની ધરપકડ
રાજકોટના કાલાવડ રોડ પર જાનકી પાર્ક પાસે પીસીબીની ટીમે દરોડો પાડી કોઈપણ આધાર પુરાવા વગર એક બ્રાંડના ડબ્બામાં ડુપ્લીકેટ તમાકુનું વેંચાણ કરનાર મિહિર ભરતભાઈ બુધ્ધદેવને પકડી લઈ 3.50 લાખની કિંમતના ડુપ્લીકેટ તમાકુના ડબ્બા કબજે કર્યા હતા. અમદાવાદ ઘાટલોડીયા વિસ્તારમાં રહેતા અને એક કંપનીમાં પ્રોપરાઈટર હિરેનભાઈ મુકેશભાઈ પટેલને માહિતી મળતાં પીસીબીના સ્ટાફને સાથે રાખી કાલાવડ રોડ પર જાનકી પાર્કમાં રેડ કરી મિહિર બુધ્ધદેવને પકડી લઈ તપાસ દરમિયાન તેની પાસેથી પ્લાસ્ટિકના બાચકામાંથી અલગ-અલગ પાંચ પાર્સલ મળી આવ્યા હતા. પાર્સલ ખોલતા એક બ્રાંડના ડુપ્લીકેટ તમાકુના 1000 ડબ્બા મળી આવ્યા હતા પુછપરછ દરમિયાન આરોપી એક બ્રાંડની ઓરીજનલ તમાકુ અને લુઝ તમાકુ બંને મિક્સ કરી ડુપ્લીકેટ તમાકુ બનાવી એક ડબ્બો 350 લેખ વેંચતો હોવાની કબૂલાત આપી હતી. પોલીસે 3.50 લાખનો ડુપ્લીકેટ તમાકુનો જથ્થો કબજે કરી આરોપી વિરુદ્ધ કોપીરાઈટ એક્ટની કલમ હેઠળ ગુનો દાખલ કરી માલવીયાનગર પોલીસે વધુ તપાસ હાથ ધરી છે.

લોઠડામાં રમતા બાળક પર બોલેરોનું ટાયર ફરી વળતા મોત
શહેરની ભાગોળે આવેલા લોથડા ગામે એક હૃદયદ્રાવક અને કમકમાટીભર્યો અકસ્માત સર્જાયો છે, જેમાં માત્ર 10 વર્ષના માસૂમ બાળકે જીવ ગુમાવ્યો છે બનાવને પગલે પરિવારમાં શોક વ્યાપી ગયો છે આજી ડેમ પોલીસે ધોરણસરની કાર્યવાહી હાથ ધરી છે. લોથડા ગામે આવેલી વરુણ કાસ્ટીંગ ફેક્ટરીની બાજુમાં રહેતા અનિલભાઈ મખોડીયાનો 10 વર્ષનો પુત્ર આર્યન ઘર નજીક આંગણામાં રમી રહ્યો હતો. આ દરમિયાન નજીકમાં જ એક ઢાળ પર પાર્ક કરેલી બોલેરો ગાડી અચાનક રિવર્સમાં નીચે ઉતરી આવી હતી.દુર્ભાગ્યે, ઢાળ પરથી સરકેલી બોલેરોનું આગળનું વ્હીલ સીધું માસૂમ આર્યન પર ફરી વળ્યું હતું. અકસ્માતમાં ગંભીર ઈજાઓ થવાના કારણે માસૂમ બાળકનું ઘટનાસ્થળે જ મોત નીપજ્યું હતું ઘટનાને પગલે પરિવારમાં અરેરાટી વ્યાપી ગઈ છે. બનાવની જાણ થતાં જ આજીડેમ પોલીસ મથકનો સ્ટાફ દોડી ગયો હતો અને જરૂરી કાર્યવાહી કરી મૃતદેહને પીએમ અર્થે ખસેડી ખરેખર બનાવ કેવી રીતે બન્યો તે અંગે વિશેષ તપાસ યથાવત રાખી છે.

સોખડા ચોકડી પાસે બંધ ટ્રક પાછળ બાઈક ઘુસી જતા શુક્લ પીપળીયાના યુવકનું મોત
રાજકોટના બેડી ચોકડીથી સોખડા ચોકડી તરફ જતા પુલ ઉતરતા રોડ પર બંધ ટ્રક પાછળ બાઈક ઘુસી જતા શુક્લ પીપળીયા ગામના 20 વર્ષીય યુવકનું મોત નીપજતા પરિવારમાં અરેરાટી વ્યાપી ગઈ છે. શુક્લ પીપળીયા ગામે રહેતા કરણ મહેશભાઈ સરવૈયા ઉ.20 ગત રાત્રીના પોતાનું બાઈક લઈને રાજકોટથી શુક્લ પીપળીયા જતો હતો ત્યારે બેડી ચોકડીથી સોખડા ચોકડી તરફ જતા પુલ ઉતરતા રોડ પર એક ટ્રક ઉભો હતો. જે ધ્યાને ન આવ્યા કરણનું બાઈક ટ્રક પાછળ અથડાયુ હતું. તેને માથે શરીરે ગંભીર ઈજાઓ થઈ હતી બનાવના પગલે લોકો દોડી આવ્યા હતા 108 એમ્બ્યુલન્સ મારફતે યુવકને સિવિલ હોસ્પિટલમાં ખસેડવામાં આવ્યો હતો અહીં ફરજ પરના ડોક્ટરે જોઈ તપાસી મૃત જાહેર કર્યો હતો બનાવની જાણ થતા કુવાડવા પોલીસ મથકનો સ્ટાફ દોડી ગયો હતો અને મૃતદેહ પીએમ રૂમે ખસેડી જરૂરી કાર્યવાહી કરી હતી. કરણ રાજકોટમાં પેડક રોડ પર આવેલા બંગડીના કારખાનામાં કામ કરતો હતો. તે બે ભાઇમાં નાનો હતો પ્રાથમિક તપાસમાં તે બાઈક લઈને રાજકોટ ચકર મારવા નીકળ્યો હતો પછી પરત ઘરે પરત આવતો હતો ત્યારે આ બનાવ બન્યો હતો. આશાસ્પદ યુવકના મોતથી પરિવારમાં શોક વ્યાપી ગયો છે.

ખારચીયા ગામે જુગાર રમતા છ ઝડપાયા
રાજકોટમાં દારૂ જુગારના કેસો કરવાની સૂચના અન્વયે આજી ડેમ પોલીસ મથકના પીઆઇ એચ એન પટેલની રાહબરીમાં ટિમ પેટ્રોલિંગમાં હતી ત્યારે સ્ટાફના પિયુષ ચિરોડીયા અને ગોપાલભાઈ બોળીયા સહિતની ટીમે બાતમી આધારે ખારચીયા ગામે વાડી પાસે દરોડો પાડી લાઈટના અજવાળે જુગાર રમતા અશોક ગોવિંદભાઇ મકવાણા, જગદીશ રવજીભાઈ પરમાર, કાળું ભલાભાઈ સોહેલિયા, દિનેશ દેવજીભાઈ સોહેલિયા, સુનિલ હીરાભાઈ ચૌહાણ અને નરેશ કાળુભાઇ મકવાણાની ધરપકડ કરી 5,910 કબ્જે કર્યા છે.

અજમેર ફરીને આવ્યા બાદ ત્રણ સંતાનોની માતાનો આપઘાત
રાજકોટના દૂધસાગર રોડ ઉપર આવેલ ગુજરાત હાઉસિંગ બોર્ડ ક્વાટરમાં રહેતી અને ગુંદાવાડીમાં આવેલ દુકાનમાં નોકરી કરતી ભગવતી ઉર્ફે ગાયત્રી પવન પરીહાર ઉ.28 નામની પરિણીતા આજે પોતાના ઘરે હતી ત્યારે પ્રથમ બ્લેડથી છરકા માર્યા હતા અને ત્યાર બાદ ગળેફાંસો ખાઈ આપઘાત કરી લેતા પોલીસ કાફલો દોડી ગયો હતો અને મૃતદેહ પીએમ અર્થે સિવિલ હોસ્પિટલે ખસેડાયો હતો પ્રાથમિક તપાસમાં એક ચિઠ્ઠી મળી હતી જેમાં લખ્યું હતું કે મને કોઈનું દબાણ નથી હું મારી મરજીથી આ પગલું ભરું છું પરિવારની પૂછતાછમાં ગત મંગળવારે અમન નામના છોકરા સાથે તેણી અજમેર ગઈ હતી અને ત્યાંથી પરત આવ્યા બાદ આ પગલું ભરી લીધું હતું તેણીના મોતથી 2 દીકરી અને 1 દીકરાએ માતાનું છત્ર ગુમાવ્યું છે પોલીસે આપઘાતનું કારણ જાણવા તજવીજ હાથ ધરી છે.

રાજકોટની વધુ એક ગેંગ સામે ગુજસીટોક
રાજકોટમાં ગેંગ બનાવી ગુનાખોરી આચરતી ટોળકીને ડામી દેવા શહેર પોલીસે ગુજસીટોકનું હથિયાર ઉગામ્યું છે અત્યાર સુધીમાં લાલો રાઉમાં ગેંગના 11 શખ્સો, ભીસ્તીવાડની ગેંગના 13 શખ્સો, ચડ્ડી બનીયાનધારી ગેંગના 11 શખ્સો, પેડા ગેંગના 21 શખ્સો, મુરઘા ગેંગના 17 શખ્સો, ઓડીયા ગેંગના 10 શખ્સો, બાટલી ગેંગના 14 શખ્સો, રમેશ રાણા ગેંગના 3 શખ્સો, ઇભલા ગેંગના 7 શખ્સો, શામજી મકા ગેંગના 12 શખ્સો, અલ્તાફ ઉર્ફે છ આંગળી ગેંગના 6 શખ્સો અને રામદેવ ડાંગરની ગેંગના 5 શખ્સો સહીત કુલ 130 શખ્સો સામે ગુજસીટોક હેઠળ ગુનો નોંધી કડક કાર્યવાહી કરવામાં આવી છે ત્યાર બાદ આજે વધુ એક ગેંગ સામે ગુજસીટોક દાખલ કરવામાં આવી છે સુત્રોમાંથી પ્રાપ્ત માહિતી મુજબ આ ગેંગમાં 20 જેટલા આરોપીઓ સામેલ હોવાનું જાણવા મળ્યું છે આ અંગે સાંજે ડીસીપી ક્રાઇમ જગદીશ બાંગરવા પત્રકાર પરિષદ યોજી વધુ વિગતો જાહેર કરશે.

કંસારા બજારમાં ત્રીજા માળે દુકાનનો દરવાજો તોડી તસ્કરો 4.79 લાખની મતા ચોરી ગયા
રાજકોટના એરપોર્ટ રોડ ઉપર મારુતિનગરમાં રહેતા અને નવા નાકા રોડ કંસારા બજારની પાછળ ત્રિભુવનદાસ દામોદરદાસ શેઠ નામની પેઢી ચલાવતા સચીનભાઈ રસીકલાલ શેઠ ઉ.45એ 4,79,250ની ચોરી અંગે ચાર અજાણ્યા તસ્કરો સામે એ ડિવિઝન પોલીસમાં ફરિયાદ નોંધાવી છે. ફરિયાદમાં જણાવ્યું હતું કે ગત 28 તારીખે હું પેઢીને તાળા મારી સુરેન્દ્રનગર ખાતે ઘરકામ સબબ ગયો હતો અને ગત તા.2ના રાત્રીના એકાદ વાગ્યે ૫રત આવ્યો હતો બાદ મારા સગા મોટાબાપાના દીકરા દીલીપભાઈનો ફોન આવેલ કે, તમો દુકાને આવો તમારા દુકાનમા ચોરી થઈ છે તેવુ મને પિન્ટુ ભાઈ ગોહીલ જે આર.એમ.સી કચરા પેટીની ગાડી ચલાવે છે તેને મને ઘરે આવી જાણ કરેલ છે અને મે ચાર માણસોને ભાગતા જોયા છે આ વાત કરતા હું તુરંત મારી પેઢીએ ગયેલ અને ત્યા દુકાનનુ તાળુ ખોલેલ અને અંદર જઈને જોયુ તો મારી બે માળની દુકાનમાં જોતા બધું વેરવિખેર પડ્યું હતુ અને દુકાનમા ત્રણેય ભાઇઓએ તપાસ કરતા નિચેના માળેથી કોઈ માલસામાન ચોરી થઈ નથી પરંતુ કાઉન્ટરમા રાખેલ રોકડ રૂપીયા 1.52 લાખની ચોરી થયેલાનુ જાણવા મળ્યું હતું બાદ ઉપરના માળે ભંગારનો જુનો સામાન રાખીએ છીએ ત્યા જઈ તપાસ કરતા ત્યાથી 1100 ગ્રામ ચાંદીની ચમચી તથા લોટી, 640 ગ્રામ ચાંદીનો છુટક ભંગાર, 3 મોટા જર્મન સિલ્વરનો મંદીરનો સામાન જેમા અગરબતી સ્ટેન્ડ ધુપેલીયા અને 3 નાના તેમજ પીતળની નાની નાની 2 વાટકી, જર્મન સીલ્વરની હિચકાના 48 સળીયા, એક બાજોટનો પીતળનો સિંહ પાયો, જુનવાણી અલગ અલગ તાંબાના 2 કિલો 800 ગ્રામના સિકક્કા, જર્મન સિલ્વરની 6 કિલોની સાંકળ, જર્મન સિલ્વરના 32 વાટકા, જર્મન સીલ્વરના ડીસ, કીટલી વીગેરે 6 નંગ, પીતળનો 1 ત્રાંસ, જર્મનના અઢી કિલો છુટક વાસણો, પીતળનો 500 ગ્રામ ભંગાર તથા જર્મન સિલ્વરનો ભંગાર તથા પિતળનો ભંગાર તથા જુનવાણી તાંબાના અલગ અલગ સિક્કા મળી અલગ અલગ ભંગારના કુલ 3,27,250 તેમજ રોકડ રૂપીયા 1.52 લાખ મળી કુલ 4,79,250ની કોઈ ચોર ઈસમો અમારી પેઢીમાથી ચોરી કરી લઈ ગયેલ છે. આ ચોરી રાત્રિના ત્રણ વાગ્યાથી ચાર વાગ્યા દરમીયાન ગઢની રાંગની દિવાલથી ત્રીજા માળે
આવેલ કેબીનનો દરવાજો તોડી બીજા માળે નીચે સીડી વાટે રાત્રીના સમયે અપપ્રવેશ કરી આ ચોરી કરેલ છે અને અમારી પેઢીની પાછળ ગઢની રાંગની દીવાલ જે મારી પેઢીને અડીને આવેલ છે ત્યાથી ચાર ચોર ઈસમોએ ચોરી કર્યાનુ મારૂ માનવુ છે તેમજ પિન્ટુભાઈ મગનભાઈ ગોહીલ જે આર.એમ.સી કચરા પેટીની ગાડી ચલાવે છે તેણે આ ચાર ચોર ઈસમોને ભાગતા જોયા હોય ફરિયાદ નોંધાવતા પીઆઇ વાઢિયા સહિતે તપાસ હાથ ધરી છે.