વંથલી મર્ડર કેસ: પ્રેમ પ્રકરણમાં યુવાનની હત્યા કરનાર પિતા-પુત્ર સહિત ત્રણ ઝડપાયા

ખાસ-ખબર ન્યૂઝ જૂનાગઢ, તા.4

વંથલી ટાઉનમાં ભલાયશા પીરની દરગાહના ગ્રાઉન્ડમાં ગત રોજ વહેલી સવારે બનેલી હત્યાની ઘટનાથી સમગ્ર પંથકમાં ચકચાર મચી ગઈ હતી. આ કેસમાં વંથલી પોલીસે ત્વરિત કાર્યવાહી કરીને કેશોદના અગતરાય ગામેથી મુખ્ય આરોપી રફીકશા સહિત ત્રણ શખ્સોને રાઉન્ડઅપ કરી લીધા છે.
ફરિયાદી મુસાભાઈ અબ્દુલભાઈ સોઢાના જણાવ્યા અનુસાર, તેમના પુત્ર તાજીમને આરોપી રફીકશાની દીકરી ઈકરા સાથે પ્રેમ સંબંધ હતો. આ સંબંધનો ખાર રાખીને આરોપીઓએ તાજીમ પર હુમલો કર્યો હતો. તાજીમના માથાના ભાગે લાકડાના ધોકા વડે જીવલેણ ઈજાઓ કરી હતી. જયારે અકરમશા, અરબાજશા અને ઈરફાનશાએ લોખંડના સળીયા તથા છરી વડે તાજીમને ગંભીર ઈજાઓ પહોંચાડી તેનું મોત નિપજાવ્યું હતું. આ ઘટના દરમિયાન બચાવવા આવેલા સાહેદ શકીલને પણ લોખંડના સળીયા વડે ઈજાઓ પહોંચાડવામાં આવી હતી. આ ઘટનાની ગંભીરતાને જોતા એસપી સુભાષ ઓડેદરાની સૂચના હેઠળ અલગ-અલગ ટીમો બનાવવામાં આવી હતી. વંથલી પીઆઇ આર.બી. ગઢવી અને તેમની ટીમે ખાનગી બાતમીદારો અને ટેકનિકલ સોર્સના આધારે તપાસ તેજ કરી હતી. પોલીસને ચોક્કસ માહિતી મળી હતી કે આરોપીઓ કેશોદ તાલુકાના અગતરાય ગામે મરઘા ફાર્મ નજીક સંતાયેલા છે. વંથલી અને કેશોદ પોલીસની સંયુક્ત ટીમોએ દરોડો પાડી રફીકશા કાસમશા સર્વેદી, અરબાજશા રફીકશા સર્વેદી અને અકરમશા હનીફશા સર્વેદી ગણતરીની કલાકોમાં ઝડપી પાડેલ હતા. પોલીસ પ્રાથમિક પૂછપરછમાં આરોપીઓએ કબૂલાત કરી છે કે પ્રેમ સંબંધના ખારમાં આ હત્યાને અંજામ આપવામાં આવ્યો હતો. પોલીસ હવે આ કેસમાં વધુ તપાસ અને કાયદેસરની કાર્યવાહી કરી રહી છે.