લોકસભા 2024ની ચૂંટણીના બીજા તબક્કામાં 13 રાજ્યોની 88 બેઠકો પર શુક્રવારે મતદાન થયું હતું.
ખાસ-ખબર ન્યૂઝ નવી દિલ્હી, તા.27
- Advertisement -
લોકસભા 2024ની ચૂંટણીના બીજા તબક્કામાં 13 રાજ્યોની 88 બેઠકો પર શુક્રવારે મતદાન થયું હતું. આ દરમિયાન ભારતના ચૂંટણી પંચએ રાજકીય કાર્યક્રમો, ચૂંટણી પ્રચારમાં ભાગ લેવા અને આદર્શ આચાર સંહિતાનું ઉલ્લંઘન કરવા બદલ સરકારી કર્મચારીઓને સસ્પેન્ડ કર્યા છે. રાજ્યના મુખ્ય ચૂંટણી અધિકારી પુનિત અગ્રવાલએ શુક્રવારે આ માહિતી આપી હતી. બીજા એક અન્ય ચૂંટણી અધિકારીએ જણાવ્યું હતું કે બે શિક્ષકો અને ત્રિપુરા રાજ્ય રાઈફલ્સના એક રાઈફલમેનને ચૂંટણી આચાર સંહિતાનું ઉલ્લંઘન કરવા બદલ શુક્રવારે સસ્પેન્ડ કરવામાં આવ્યા હતા. આર્દશ આચાર સંહિતાનું ઉલ્લંઘન કરવા બદલ અત્યાર સુધીમાં સુરક્ષા કર્મચારીઓ સહિત ત્રિપુરાના 26 સરકારી કર્મચારીઓને સસ્પેન્ડ કર્યા છે.
ચૂંટણી પંચે સરકારી કર્મચારીને નિષ્પક્ષ રહેવા જણાવ્યું
આ વચ્ચે, સંબંધિત અધિકારીઓએ શુક્રવારે દેશના ટોચના રાજકીય નેતા વિરુદ્ધ ટિપ્પણી કરવાના આરોપ બદલ સુરમા વિધાનસભા મતવિસ્તારમાં નિયુક્ત મતદાન અધિકારી મૌસમી ઘોષને સસ્પેન્ડ કરી દીધા હતા. શુક્રવારે મોડી સાંજે સસ્પેન્શનનો આદેશ પાછો ખેંચી લેવામાં આવ્યો હતો. ચૂંટણી અધિકારીઓએ જણાવ્યું હતું કે પંચે અનેક પ્રસંગોએ સરકારી કર્મચારીઓને, ખાસ કરીને ચૂંટણી સંબંધિત ફરજોમાં રોકાયેલા, નિષ્પક્ષ રહેવા અને સંપૂર્ણ પવિત્રતા સાથે તેમની ચૂંટણી ફરજ બજાવવા જણાવ્યું છે.
સરેરાશ 61 ટકા મતદાન નોંધાયું
નોંધનીય છે કે ત્રિપુરા પશ્ર્ચિમ લોકસભા બેઠક માટે પ્રથમ તબક્કામાં 19 એપ્રિલે મતદાન થયું હતું, જ્યારે ત્રિપુરા પૂર્વ સંસદીય મતવિસ્તાર માટે શુક્રવારે બીજા તબક્કામાં મતદાન થયું હતું. લોકસભાની ચૂંટણીના બીજા તબક્કામાં 13 રાજ્યોની 88 બેઠકો પર બીજા તબક્કામાં સરેરાશ મતદાન 61 ટકા નોંધાયું છે. જેમાં ત્રિપુરામાં સૌથી વધુ 78.53, મણિપુરમાં 77.18 જ્યારે ઉત્તર પ્રદેશ અને મહારાષ્ટ્રમાં મામૂલી 53 ટકા જેટલું મતદાન થયું હતું.