હોસ્ટેલ મેનેજમેન્ટ કરવામાં પણ સૌરાષ્ટ્ર યુનિવર્સિટી FAIL

છાત્રોને હોસ્ટેલ સુવિધા આપવાના મામલે સૌરાષ્ટ્ર યુનિવર્સિટીને 0 ગુણ

સૌરાષ્ટ્ર યુનિવર્સિટીમાં નાના-નાના ગામ-શહેરોમાંથી અનેક વિદ્યાર્થીઓ અભ્યાસ માટે આવતા હોય છે. આ વિદ્યાર્થીઓની સંખ્યાના પ્રમાણમાં હોસ્ટેલની સુવિધાઓ અપૂરતી હોવાથી બહારગામના આર્થિક રીતે નબળા વિદ્યાર્થીઓ અભ્યાસ છોડવા માટે મજબૂર બને છે. વિદ્યાર્થીઓને રહેવા-જમવાની પૂરતી સુવિધા આપવાના મામલે સૌરાષ્ટ્ર યુનિવર્સિટીને 0 ગુણ મળવા પ્રાપ્ત છે, સૌરાષ્ટ્ર યુનિવર્સિટી હોસ્ટેલ મેનેજમેન્ટમાં પણ ફેઈલ સાબિત થઈ છે. સૌરાષ્ટ્ર યુનિવર્સિટીના વિવિધ ભવનોમાં વિદ્યાર્થીઓની સંખ્યા સામે બોયઝ માટે ગિરનાર અને શેત્રુંજ્ય એમ મળી કુલ ચાર હોસ્ટેલ છે. અર્ન એન્ડ લર્ન હોસ્ટેલમાં તો મર્યાદિત વિદ્યાર્થીઓ જ પ્રવેશ મેળવે છે. જ્યારે ગર્લ્સ માટે પણ ચાર જ હોસ્ટેલ છે. જે પણ હોસ્ટેલમાં પ્રવેશ મેળવનાર ગર્લ્સના પ્રમાણમાં અપૂરતી છે. જેના કારણે વિદ્યાર્થીઓ નાછૂટકે ખાનગી હોસ્ટેલ કે પી.જી.માં રહેવા મજબૂર બને છે.

કુલપતિ ભીમાણી રાજકારણની જગ્યાએ વિદ્યાર્થી હિતમાં ધ્યાન આપે એ જરૂરી

રાજકોટના યુનિવર્સિટી રોડ ઉપર અને મુંજકા ગામમાં મોટી સંખ્યામાં ખાનગી હોસ્ટેલો આવેલી છે, જેમાં હજારો વિદ્યાર્થીઓ રહે છે. આ સિવાય અહીં આવેલા અનેક રહેણાંક મકાનમાં પી.જી. તરીકે પણ વિદ્યાર્થીઓ રહે છે. જો સૌરાષ્ટ્ર યુનિવર્સિટીના સત્તાધીશો રાજકારણ છોડી થોડું સમાજકારણ અપનાવે અને સૌરાષ્ટ્ર યુનિવર્સિટીના બંધ પડેલા – ધૂળ ખાતા સંકુલોમાં વિદ્યાર્થીઓને રહેવા-જમવા માટેની વિશેષ સુવિધા ઉભી કરે તો ઉચ્ચ શિક્ષણ મેળવવાના નાના-નાના ગામડાઓના વિદ્યાર્થીઓના સ્વપ્નો પણ સાકાર થાય. ખાસ તો ઈન્ચાર્જ કુલપતિ ડો. ભીમાણીએ રાજકારણની જગ્યાએ વિદ્યાર્થીઓ હિતમાં ધ્યાન આપે એ જરૂરી છે.

બીજીબાજુ લાખોના ખર્ચે બનાવવામાં આવેલું વિદેશી વિદ્યાર્થીઓ માટેનું ટ્રાન્ઝીટ હાઉસ ધૂળ ખાય છે

હયાત હોસ્ટેલોમાં મર્યાદિત વિદ્યાર્થીને જ પ્રવેશ

ઘરથી દૂર રાજકોટ જેવા શહેરમાં બધાં વિદ્યાર્થીઓને ખાનગી હોસ્ટેલ કે પી.જી.માં રહેવું-જમવું આર્થિક રીતે પરવડે તેમ ન હોવાથી અમુક વિદ્યાર્થીઓ અભ્યાસ છોડવા માટે મજબૂર બને છે. સૌરાષ્ટ્ર યુનિવર્સિટીની હયાત હોસ્ટેલોમાં મર્યાદિત વિદ્યાર્થીને પ્રવેશ મળે છે, જ્યારે બીજીબાજુ લાખોના ખર્ચે બનાવવામાં આવેલ વિદેશી વિદ્યાર્થીઓ માટેનું ટ્રાન્ઝીટ હાઉસ ધૂળ ખાય છે. નોંધનીય છે કે, સૌરાષ્ટ્ર યુનિવર્સિટી દ્વારા વિદેશી વિદ્યાર્થીઓ માટે લાખોના ખર્ચે ટ્રાન્ઝીટ હાઉસ બનાવવામાં આવ્યું છે. આ નવા ટ્રાન્ઝીટ હાઉસ ઉપરાંત વિદેશી વિદ્યાર્થીઓ માટેની જૂની હોસ્ટેલ પણ ખાલીખમ્મ છે જેનો ઉપયોગ બાકી રહેતાં વિદ્યાર્થીઓને હોસ્ટેલ સુવિધા આપવા માટે કરવામાં આવે તો લાખો રૂપિયાના ખર્ચે બનાવવામાં આવેલી હોસ્ટેલનો સદુપયોગ પણ થાય અને વિદ્યાર્થીઓની હેરાનગતિ પણ અટકે. આ એટલા માટે જરૂરી છે કે, સૌરાષ્ટ્ર યુનિવર્સિટીના ભવનોમાંથી હોસ્ટેલમાં પ્રવેશ મેળવવા માટે વિદ્યાર્થીઓની સંખ્યા સામે પૂરતી વ્યવસ્થા ન હોવાના કારણે અમુક સમયે તો ભવન દીઠ માત્ર એક કે બે જ વિદ્યાર્થીને પ્રવેશ મળે છે અને બાકીના વિદ્યાર્થીઓને ખાનગી હોસ્ટેલ કે પી.જી.માં રહેવા-જમવા મજબૂર થવું પડે છે તો અમુક વિદ્યાર્થીઓને અભ્યાસ છોડી દેવો પડે છે!

ગર્લ્સની 4 હોસ્ટેલમાં કુલ 278 વિદ્યાર્થીનીઓને રહેવાની અને બોયઝની 4 હોસ્ટેલમાં કુલ 259 વિદ્યાર્થીઓને રહેવાની વ્યવસ્થા, સૌરાષ્ટ્ર યુનિવર્સિટીની કુલ 8 હોસ્ટેલમાં કુલ 537 વિદ્યાર્થીઓને રહેવાની વ્યવસ્થાની બીજી બાજુ હજારો વિદ્યાર્થીઓ ખાનગી હોસ્ટેલ – પી.જી.માં રહેવા મજબૂર બન્યા છે.

બૉયઝ અને ગર્લ્સ મળીને માત્ર 537ને જ મળે પ્રવેશ
યુનિવર્સિટીના વિવિધ ભવનોમાં મોટી સંખ્યામાં બહારગામના વિદ્યાર્થીઓ પ્રવેશ મેળવે છે, તેમાંથી બોયઝ અને ગર્લ્સ બંને મળીને માત્ર 537 જ વિદ્યાર્થીઓને પ્રવેશ મળે છે. યુનિ.ની વેબસાઈટ ઉપર મૂકવામાં આવેલ હોસ્ટેલના નામ અને આંકડા (જો તમામ રૂમ હાલમાં બરાબર હોય તો) આ મુજબ છે:
બોયઝ હોસ્ટેલ
ગીરનાર હોસ્ટેલ 96
શેત્રુંજ્ય હોસ્ટેલ 48
ઓસમ હોસ્ટેલ 44
અર્ન વ્હાઈલ લર્ન 90
ટોટલ 278
ગર્લ્સ હોસ્ટેલ
ગંગા હોસ્ટેલ 83
યમુના હોસ્ટેલ 52
નર્મદા હોસ્ટેલ 60
સરસ્વતી હોસ્ટેલ 64
ટોટલ 259

સૌરાષ્ટ્ર યુનિવર્સિટીમાં વિદેશી વિદ્યાર્થીઓ માટેની ટ્રાન્ઝીટ હાઉસ હોસ્ટેલ મહદ્અંશે ખાલી જ હોય છે. સૌરાષ્ટ્ર યુનિવર્સિટી પાસે પૂરતી જમીન અને ફંડ હોવા છતાંય નવી હોસ્ટેલ સુવિધા વિકસાવવામાં નથી આવતી કે ટ્રાન્ઝીટ હાઉસમાં સ્થાનિક વિદ્યાર્થીઓને પ્રવેશ અપાતો નથી.