રૂા. 5,00,000 બે માસમાં ફરિયાદીને ચૂકવવામાં કસુર કરે તો વધુ 3 માસની સજાનો પણ હુકમ
ખાસ-ખબર ન્યૂઝ રાજકોટ
રાજકોટમાં આલાબાઈના ભઠ્ઠા પાસે શક્તિનગરના ખૂણે નિવાસસ્થાન ધરાવતી અને યુ.કે. ખાતે રહેતી નિશાબેન કેતનભાઈ ડુસારાએ રાજકોટના મિત્ર મયુરકુમાર વૃંદાવનભાઈ કારીયા પાસેથી સંબંધના દાવે લીધેલ રકમ પરત કરવા ઈસ્યુ કરી આપેલ ચેક રિટર્ન થતાં કેસ ચાલી જતાં હાલ મુંબઈમાં જેલમાં રહેલા આરોપી નિશાબેન ડુસારાને એક વર્ષની સજા ઉપરાંત ચેકની રકમની સવા ગણી રકમ રૂા. 6,25,000 ફરિયાદીને બે માસમાં વળતર ચૂકવવામાં નિષ્ફળ રહે તો વધુ ત્રણ માસની સજા ફરમાવતો હુકમ રાજકોટના મહે. એડિ. ચીફ જ્યુડિ. મેજિ.એ ફરમાવતા આરોપીને આ ત્રીજા ચેક રિટર્નના કેસમાં ત્રીજી વખત સજા ફરમાવતો હુકમ ફરમાવવામાં આવ્યો છે.
કેસની હકીકત જોઈએ તો રાજકોટમાં શ્રદ્ધાપાર્ક, શ્યામ હોલ પાસે, 40 ફૂટ રોડ, અટીકામાં રહેતા મયુરકુમાર વૃંદાવનભાઈ કારીયાએ આલાબાઈના ભઠ્ઠા પાસે અરૂણોદય મકાન સામે શક્તિનગરના ખૂણે ચામુંડા નિવાસ મકાનમાં રહેતા નીશાબેન કેતનભાઈ ડુસારા સામે રાજકોટની અદાલતમાં એ મતલબની ફરિયાદ દાખલ કરેલી કે ફરિયાદી તથા આરોપી મિત્ર સર્કલ ગ્રુપ હોય અને આરોપી વિદેશમાં યુ.કે. (યુનાઈટેડ કિંગ્ડમ) રહેવા જતા રહેલા હોવાથી ક્યારેક આવતા હોય આરોપીએ યુ.કે.થી બેંકમાં ત્રીસ હજાર પાઉન્ડ જમા કરાવેલા તે કોઈ કારણોસર ઉપડતા નથી અને તે ટેકનીકલ ખામી દૂર કરતાં પાંચથી સાત દિવસ લાગે તેમ હોય અને તહોમતદારને અરજન્ટ રૂા. 23,00,000ની કોઈ પાર્ટીને પેમેન્ટ કરવાનું હોય ટેકનીકલ ખામી ક્લિયર થયે ખાતામાં રકમ જમા થયે રકમ પરત કરી આપશે તેમ કહી ફરિયાદી તથા ગ્રુપ સર્કલમાંથી રકમની વ્યવસ્થા કરી આપવા જણાવેલું, અને તહોમતદાર હિથ્રો એરપોર્ટમાં નોકરી કરતા હોય મોટા બિઝનેશમેન સાથે સંકળાયેલા હોય નાણા ડૂબશે નહીં તેવો વિશ્ર્વાસ આપતાં ફરિયાદીએ રૂા. 5,00,000 તથા અન્ય બે મિત્રો પાસેથી રૂા. 18,00,000ની અઠવાડિયા પૂરતી જરૂરત હોવાથી વ્યવસ્થા કરી આપેલી તે રકમ અદા કરવા ફરિયાદીએ આપેલી રૂા. 5,00,000ની ફરિયાદીની તરફેણમાં ચેક ઈસ્યુ કરી આપી ચેક પાસ થઈ જવા બાંહેધરી આપવા છતાં ચેક પાસ ન થવા દેતાં તે સંબંધે આરોપી વિરુદ્ધ દાખલ કરવામાં આવેલી ફરિયાદ ચાલી જતાં ફરિયાદી તરફે રજૂ થયેલા દસ્તાવેજો તથા મૌખિક પુરાવા પર આધાર રાખી એડવોકેટ સુરેશ ફળદુ દ્વારા એવી રજૂઆતો કરવામાં આવેલી કે ફરિયાદીના કાયદેસરના લેણા પેટે ચેક ઈસ્યુ કરી આપેલો છે, ચેકની કે તે માંહેના સહીની તકરાર નથી, ફરિયાદી દ્વારા આપવામાં આવેલા પુરાવો તથા રજૂ કરવામાં આવેલા દસ્તાવેજી પુરાવાથી વિરુદ્ધનો પુરાવો લાવવામાં વિકલ્પે ફરિયાદીના પુરાવાના કોગઝન્ટ એવિડન્સથી ખંડન થઈ શકે તેટલો ચુસ્ત, વિશ્ર્વાસપાત્ર, ભરોસાપાત્ર, માનવાપાત્ર તથા પ્રિપોન્ડરન્સ ઓફ પ્રોબેબીલીટી જેટલો પુરાવો રેકર્ડ પર લાવવામાં આરોપી નિષ્ફળ નિવડેલ છે અને બચાવ પુરવાર કરવા જાતે કે સાહેદો મારફત કે દસ્તાવેજી પુરાવાથી હકીકતો સાબિત કરી ફરિયાદીના પુરાવાનું ખંડન કરી શકેલ નથી, ફરિયાદપક્ષે જ્યારે પોતાનો કેસ શંકાથી પર પૂરવાર કરેલ હોય, ચેક આપ્યાનો કે ચેકમાં સહીનો ઈન્કાર ન હોય ત્યારે ફરિયાદી ચેકના યથાનુક્રમે ધારણકર્તા છે તેમ માની ધારણકર્તાની તરફેણમાં અનુમાન કરવું જોઈએ, હાલના તહોમતદાર મુંબઈ મુકામે પણ રૂપિયા આઠ કરોડથી વધુ રકમની છેતરપિંડી, વિશ્ર્વાસઘાત અને ફોર્જરી કરેલનો ગુનો દાખલ થતા આરોપી યુ.કે.થી ઈન્ડિયામાં પ્રવેશ કરતાં ધરપકડ થઈ જતાં મુંબઈ મુકામે જેલમાં હોય ત્યાંથી હાલના કામે હાજર રખાવવામાં આવેલ નથી આરોપીની આવા પ્રકારના ગુના કરવાની ટેવ હોય આરોપી હેબીચ્યુઅલ હોય અગાઉ બે ચેક રિટર્ન કેસોમાં પણ આરોપીને સજા થઈ ચૂકેલ છે અને હાલનો આ ત્રીજો કેસ છે વિગેરે મુદ્દાઓ સંબંધે લંબાણપૂર્વકની દલીલો કરવામાં આવેલ.
રેકર્ડ પરના રજૂ મૌખિક તથા દસ્તાવેજી પુરાવાઓને સમગ્રપણે ધ્યાને લેતાં ફરિયાદપક્ષની હકીકતોને સોગંદ પરના પુરાવાથી દસ્તાવેજી પુરાવાને સંપૂર્ણપણે સમર્થન મળે છે, આરોપીએ ફરિયાદીનું કાયેદસરનું લેણું પરત કરવા ચેક ઈસ્યુ કરી આપેલની હકીકતને સમર્થન મળે છે, ફરિયાદપક્ષે રજૂ કરેલ દસ્તાવેજો સંબંધે કોઈ તકરાર લેવામાં આવેલ નથી, ફરિયાદવાળો ચેક આરોપીએ કાયદેસરના દેવાના ચૂકવણી પેટે આપ્લો હતો, તેવી હકીકત રેકર્ડ ઉપરના પુરાવાથી પૂરવાર થયેલો છે તેમજ ચેક રિટર્ન થયા બાદ નોટીસ આપ્યા બાદ કે કેસ દાખલ થયા બાદ પણ વિવાદી ચેકની રકમ ફરિયાદીને ચૂકવેલી હોવાનું પુરવાર થતું નથી, ફરિયાદીએ એન.આઈ. એક્ટના તમામ આવશ્યક તત્ત્વો પુરવાર કરેલા છે તેમજ ચેક આપેલ નહીં હોવાનું કે ચેકમાં પોતાની સહી નહીં હોવાનો આરોપીનો બચાવ નથી, ફરિયાદપક્ષના પુરાવાનું ખડન કરતો ખંડનાત્મક પુરાવો આરોપી રેકર્ડ પર લાવવામાં સફળ થયેલા નથી ત્યારે ફરિયાદીનો કેસ પુરવાર માની આરોપીને એક વર્ષની સજા ઉપરાંત ચેકની રકમની સવા ગણી રકમ રૂા. 6,25,000 બે માસમાં ફરિયાદીને ચૂકવવામાં કસુર થયે વધુ ત્રણ માસની સજા ફરમાવતો સિમાચિન્હરૂપ ચૂકાદો ફરમાવવામાં આવેલો છે.
ઉપરોક્ત કામમાં ફરિયાદી મયુરકુમાર કારીયા વતી રાજકોટના એડવોકેટ સુરેશ ફળદુ, ભુવનેશ શાહી, કૃણાલ શાહી, ચેતન ચોવટીયા, પાર્થ સંઘાણી, જસ્મીન દુધાગરા, જય પીઠવા તથા મદદમાં યુવરાજ વેકરીયા, નીરવ દોંગા, પ્રીન્સ રામાણી, ભાવીન ખુંટ, જયમલ મકવાણા રોકાયેલા હતા.
