હવે તમારી હરેક ક્લિકથી શીખશે AI: મેટાએ US કર્મચારીઓ માટે નાખ્યું ‘MCI’ સોફ્ટવેર

દરેક ક્લિક, દરેક કીસ્ટ્રોક રેકોર્ડ: મેટા એમ્પ્લોઇના કમ્પ્યૂટર પર નજર રાખી AIને કરશે ટ્રેન

જુદી જુદી ટેક કંપનીઓ વચ્ચ આર્ટિફિશિયલ ઇન્ટેલિજન્સ (એઆઇ)ની સ્પર્ધા હવે વધુ ને વધુ તીવ્ર બનતી જાય છે. એઆઇ સર્વિસ ઓફર કરતી બધી કંપની પોતાનાં એઆઇ મોડેલ્સને વધુ સ્માર્ટ બનાવવા મથી રહી છે ને હવે તો એ માટે જીવતા જાગતા એમ્પ્લોઇની મદદ લેવામાં આવી રહી છે! હમણાં બહાર આવ્યું છે કે મેટા કંપની તેના યુએસમાંના બધા એમ્પ્લોઇના કમ્પ્યૂટર્સમાં એક ખાસ પ્રકારનો ટ્રેકિંગ સોફ્ટવેર ઇન્સ્ટોલ કરી રહી છે. જે એમ્પ્લોઇ પોતાના કમ્પ્યૂટરમાં માઉસ જે રીતે મૂવ કરે, જે રીતે ક્લિક કરે અને કી-બોર્ડ પર જે કોઈ કીસ્ટ્રોક એન્ટર કરે એ બધું જ રેકોર્ડ કરી લે છે. કંપનીએ પોતે પોતાના એમ્પ્લોઇને એક ઇન્ટર્નલ મેમો મોકલીને આ વાત જાણ કરી છે.

આ ટૂલ ‘મોડેલ કેપેબિલિટી ઇનિસિએટિવ (એમસીઆઇ)’ તરીકે ઓળખાય છે. આ ટૂલ ખાસ કરીને ઓફિશિયલ કામકાજ સંબંધિત એપ્સ અને વેબસાઇટનો ઉપયોગ થતો હોય ત્યારે એક્ટિવેટ થશે અને કમ્પ્યૂટરના સ્ક્રીન પર જે કંઈ દેખાતું હોય તેના થોડા થોડા સમયે સ્ક્રીનશોટ્સ પણ લેશે. આ બધી વિગતોનો ઉપયોગ કરીને કંપનીના એઆઇ મોડેલને ટ્રેઇન કરવામાં આવશે. હેતુ એ છે કે જીવતા જાગતા લોકો જે રીતે પોતાનું રોજિંદું કામ કરતા હોય એ બરાબર સમજીને એઆઇ ટૂલ્સ પોતાનું કામ કોઈ પ્રોમ્પ્ટ કે સૂચના વગર આપોઆપ કરતા થઈ જાય એવી સ્થિતિ સર્જવી. આ ટ્રેકિંગ એટલી હદે થશે કે એમ્પ્લોઇ કમ્પ્યૂટરમાં ડ્રોપડાઉન મેનૂ ઓપન કરીને કંઈ સિલેક્ટ કરે છે કે પછી કીબોર્ડના શોર્ટકટ્સનો ઉપયોગ કરે છે એ પણ તપાસવામાં આવશે!

ફેસબુક અને ઇન્સ્ટાગ્રામ બંનેમાં અત્યારે કંપનીના વર્કફ્લોમાં એઆઇ ઇન્ટિગ્રેટ કરવાની તેજ ગતિએ કોશિશ થઈ રહી છે. યૂઝર તરીકે આપણને આ બધી સર્વિસમાં એઆઇ ટૂલ્સનો લાભ મળે તેના કરતાં આ અલગ વાત છે. અત્યારે તો કંપની કહે છે કે તેનો હેતુ એમ્પ્લોઇનાં રોજિંદાં કામકાજ એઆઇને સોંપવાનો અને એમ્પ્લોઇની પોતાની ભૂમિકા એઆઇનું કામકાજ તપાસવાના લેવલે લઈ જવાનો છે.

હજી હમણાં સોશિયલ મીડિયા પર ફેકટરીમાં દરજીઓ સિલાઇ કામ કરતા હોય અને તેમના માથા પર રેકોર્ડિંગ કરતા કેમેરા હોય તેવી ક્લિપ્સ વાયરલ થઈ હતી. આ ક્લિપ્સમાં દાવો કરવામાં આવ્યો હતો કે દરજીઓની મૂવમેન્ટ રેકોર્ડ કરીને તેની મદદથી એઆઇ અને હ્યુમનોઇડ રોબોટ્સને ટ્રેઇન કરવામાં આવશે! એ ક્લિપ્સ કેટલી સાચી છે તે વિશે હજી સ્પષ્ટતા નથી પરંતુ એઆઇ મોડેલની ટ્રેનિંગનો આવો જ કંઈક પ્રયોગ ખુદ કંપનીએ સ્વીકારેલો છે.