દુધાળા ગામે ગૌચર અને સરકારી જમીનો પર ગેરકાયદે કબજાનો RTI એક્ટિવિસ્ટ નાથાલાલ સુખડિયાનો દાવો
RTIમાં મનરેગા, સુજલામ સુફલામ અને નદીના કામો પેટે ₹30.35 કરોડથી વધુની ચૂકવણીનો ખુલાસો થયાનો અરજદારનો દાવો
- Advertisement -
કાર્યવાહી નહીં થાય તો હાઈકોર્ટ-સુપ્રીમ કોર્ટમાં જવાની RTI એક્ટિવિસ્ટ નાથાલાલ સુખડિયાની ચીમકી
જાણીતા ઉદ્યોગપતિ અને જળક્રાંતિના પ્રણેતા તરીકે ઓળખાતા પદ્મશ્રી સવજીભાઈ ધોળકિયા સામે સરકારી તથા ગૌચરની જમીનો પચાવી પાડવાના ગંભીર આક્ષેપો થતાં ગુજરાતમાં ભારે ચર્ચા જાગી છે. આ મામલે વડાપ્રધાન કાર્યાલય (PMO), રાષ્ટ્રપતિ ભવન અને ગુજરાતના મુખ્યમંત્રી સમક્ષ લેખિત ફરિયાદ કરવામાં આવી છે. અમરેલી તાલુકાના દેવભૂમિ દેવળીયા ગામના RTI એક્ટિવિસ્ટ નાથાલાલ સુખડિયાએ સરકારી વિભાગો પાસેથી મેળવેલી માહિતીના આધારે સવજીભાઈ ધોળકિયા અને તેમના ફાઉન્ડેશન સામે લેન્ડ ગ્રેબિંગ કાયદા હેઠળ કાર્યવાહી કરવાની માંગ કરી છે. એટલું જ નહીં, તેમને આપવામાં આવેલો પદ્મશ્રી પુરસ્કાર પરત ખેંચવાની પણ માંગ ઉઠાવી છે. ફરિયાદમાં આક્ષેપ કરવામાં આવ્યો છે કે લાઠી તાલુકાના દુધાળા ગામે જળક્રાંતિના નામે સરકારી ખરાબા અને ગૌચરની કિંમતી જમીનો પર કથિત રીતે ગેરકાયદે કબજો કરવામાં આવ્યો છે. અરજદારના જણાવ્યા અનુસાર, આ જમીનો પર બાંધકામ અને સરોવરોનું નિર્માણ કરવામાં આવ્યું છે તેમજ તેની આસપાસ તારની ફેન્સિંગ કરી દેવામાં આવી છે. આ ઉપરાંત આસપાસનાં ગામો અને ‘હેતની હવેલી’ સહિતના વિસ્તારોમાં સવજીભાઈ ધોળકિયા તથા તેમના સગા-સંબંધીઓનાં નામનાં બોર્ડ લગાવવામાં આવ્યાં હોવાનો પણ આક્ષેપ કરાયો છે.
જળસંચય અને જળક્રાંતિના ક્ષેત્રમાં જાણીતા નામ તરીકે ઓળખાતા સવજીભાઈ ધોળકિયા સામે થયેલી આ રજૂઆતથી હવે મામલો ઉચ્ચ સ્તરે પહોંચ્યો છે. એક તરફ જમીનના કથિત દબાણના આક્ષેપો છે તો બીજી તરફ સરકારી યોજનાઓ હેઠળ થયેલી કરોડોની ચૂકવણીના આંકડા રજૂ કરવામાં આવ્યા છે. હવે સંબંધિત સરકારી વિભાગો દ્વારા આ ફરિયાદની તપાસ કરવામાં આવે છે કે કેમ, જમીનના રેકોર્ડ અને નાણાકીય વ્યવહારોની ચકાસણીમાં શું બહાર આવે છે તથા આક્ષેપો અંગે સવજીભાઈ ધોળકિયા અને તેમના ફાઉન્ડેશનનો શું પક્ષ છે તે જોવું મહત્ત્વનું રહેશે.
- Advertisement -
RTIમાં સરકારી ચૂકવણીના આંકડા સામે આવ્યાનો દાવો
આ સમગ્ર મામલામાં સૌથી વધુ ચર્ચા સરકારી યોજનાઓ હેઠળ થયેલી નાણાકીય ચૂકવણીને લઈને થઈ રહી છે. RTI મારફતે મેળવેલી વિગતોના આધારે નાથાલાલ સુખડિયાએ દાવો કર્યો છે કે પાણી સંગ્રહ, તળાવો અને નદીઓના વિકાસનાં વિવિધ કામો માટે ધોળકિયા ફાઉન્ડેશનને સરકારી તંત્ર દ્વારા કરોડો રૂપિયાની ચૂકવણી કરવામાં આવી છે. આ ફરિયાદમાં રજૂ કરાયેલા આંકડા મુજબ, વર્ષ 2017થી 2019 દરમિયાન મનરેગા યોજના હેઠળ પાણી સંગ્રહનાં કામો માટે રૂ. 2.33 કરોડથી વધુની રકમ ચૂકવવામાં આવી હતી. જ્યારે વર્ષ 2019થી 2025 દરમિયાન સુજલામ સુફલામ યોજના હેઠળ અકાળા, ચિતલ અને હરસુરપુર સહિતનાં ગામોમાં થયેલાં કામો માટે રૂ. 98 લાખ ફાળવવામાં આવ્યા હોવાનું જણાવાયું છે. બીજી તરફ, વર્ષ 2023થી 2026 દરમિયાન લાઠી, પીપરીયા, બોડીયા, અંટાળીયા અને ગાગડીયા નદીઓના વિવિધ કામો પેટે સરકાર દ્વારા રૂ. 27.04 કરોડની માતબર રકમ ચૂકવાઈ હોવાનો દાવો કરવામાં આવ્યો છે. આમ, વિવિધ સરકારી યોજનાઓ હેઠળ અત્યાર સુધીમાં કુલ રૂ. 30.35 કરોડથી વધુનાં બિલોની ચૂકવણી થઈ હોવાનું ફરિયાદમાં જણાવાયું છે. આ ઉપરાંત કેટલાંક કામોનાં રનિંગ બિલો પણ હજુ બાકી હોવાનું અરજદારે રજૂઆતમાં જણાવ્યું છે.
સરકારી ગ્રાન્ટ છતાં પોતાના ખર્ચે કામ કર્યાનો જશ ખાટ્યાનો આક્ષેપ
નાથાલાલ સુખડિયાએ વધુમાં આક્ષેપ કર્યો છે કે સરકારી યોજનાઓ હેઠળ કરોડો રૂપિયાની ગ્રાન્ટ મેળવીને કામો કરવામાં આવ્યાં હોવા છતાં આ કામગીરી પોતાના ખર્ચે કરવામાં આવી હોય તેવો પ્રચાર કરવામાં આવી રહ્યો છે. સરકારી નાણાંથી થયેલાં કામોનો શ્રેય ફાઉન્ડેશન દ્વારા લેવામાં આવતો હોવાની રજૂઆત પણ કરવામાં આવી છે. જોકે, આ આક્ષેપોની સત્યતા અને સરકારી ચૂકવણીની વાસ્તવિક સ્થિતિ સંબંધિત દસ્તાવેજો, ટેન્ડર, મંજૂરીઓ તથા હિસાબોની સત્તાવાર તપાસ બાદ જ સ્પષ્ટ થઈ શકશે.
તંત્ર કાર્યવાહી નહીં કરે તો આંદોલન અને કોર્ટમાં જવાની ચીમકી
આ સમગ્ર મામલે નાથાલાલ સુખડિયાએ સરકારને રજૂઆત કરી છે કે ગૌચર અને સરકારી જમીનોના કથિત દબાણની તટસ્થ તપાસ કરવામાં આવે, સરકારી નાણાંની ચૂકવણી અંગેના હિસાબોની ચકાસણી કરવામાં આવે અને જવાબદારો સામે કાયદેસરની કાર્યવાહી હાથ ધરવામાં આવે. જો સરકારી તંત્ર દ્વારા સત્વરે યોગ્ય પગલાં લેવામાં નહીં આવે તો આગામી દિવસોમાં મોટાપાયે આંદોલન કરવાની ચીમકી પણ ઉચ્ચારવામાં આવી છે. જરૂર પડ્યે ન્યાય મેળવવા માટે ગુજરાત હાઈકોર્ટ અથવા સુપ્રીમ કોર્ટના દ્વાર ખખડાવવાની તૈયારી પણ દર્શાવવામાં આવી છે.
કામ સરકારી પણ નામ ધોળકિયા ફાઉન્ડેશનનું
આ સમગ્ર મામલે ફરિયાદી નાથાલાલ સુખડિયાનો મુખ્ય આક્ષેપ છે કે, જ્યારે પાણી સંગ્રહ અને નદીના વિકાસનાં કામો માટે સંપૂર્ણ સરકારી ગ્રાન્ટનો ઉપયોગ થયો હોય ત્યારે આ કામો પોતાના ખર્ચે કર્યાં હોય તે રીતે ફાઉન્ડેશનના નામનાં બોર્ડ લગાવવાનો શું અર્થ છે? સરકારી યોજનાઓ હેઠળ થયેલી કામગીરીનો શ્રેય પોતાના ફાઉન્ડેશનના નામે દર્શાવવામાં આવતો હોવાની રજૂઆત પણ કરવામાં આવી છે. હવે આક્ષેપોની સત્યતા ચકાસવા માટે સંબંધિત વિભાગો દ્વારા કામોની મંજૂરી, ટેન્ડર પ્રક્રિયા, વર્ક ઓર્ડર, માપપોથી (MB), બિલોની ચૂકવણી અને સ્થળ પર થયેલી વાસ્તવિક કામગીરીની તપાસ કરવી જરૂરી બની છે. સરકારી ગ્રાન્ટની રકમ અને ફાઉન્ડેશન દ્વારા દર્શાવવામાં આવેલા ખર્ચ વચ્ચે કોઈ તફાવત છે કે કેમ તે પણ તપાસનો વિષય છે.
ગૌચરની જમીન પરથી દબાણ હટાવો, નહીં તો 26મીએ કલેક્ટર કચેરી સામે અર્ધનગ્ન આંદોલન!
લાઠી તાલુકાના દુધાળા ગામે ગૌચરની જમીન પર કથિત ગેરકાયદે દબાણનો મુદ્દો હવે ઉગ્ર બનવાના સંકેત મળી રહ્યા છે. જાણીતા ઉદ્યોગપતિ સવજીભાઈ ધોળકિયા સાથે સંકળાયેલા ધોળકિયા ફાઉન્ડેશન અને હેતની હવેલીના માલિકો સામે સરકારી માલિકીની ગૌચરની જમીન પર અનધિકૃત દબાણ કર્યાના આક્ષેપ સાથે અમરેલી જિલ્લા કલેક્ટરને લેખિત રજૂઆત કરવામાં આવી છે. આ મુદ્દે છેલ્લા ઘણા દિવસોથી સંબંધિત તંત્ર સમક્ષ રજૂઆતો કરવામાં આવી રહી હોવા છતાં કોઈ નક્કર કાર્યવાહી થઈ ન હોવાનો અરજદારે આક્ષેપ કર્યો છે. સમગ્ર મામલાની હકીકત બહાર ન આવે તે માટે વિવિધ પ્રયાસો થઈ રહ્યા હોવાનો દાવો પણ રજૂઆતમાં કરવામાં આવ્યો છે. અરજદારે જિલ્લા કલેક્ટર સમક્ષ માંગ કરી છે કે વિવાદિત જમીનની તાત્કાલિક સરકારી માપણી કરાવવામાં આવે, સર્વે નંબર પ્રમાણે હદ-નિશાન નક્કી કરવામાં આવે અને ગૌચરની જમીન પર થયેલા તમામ કથિત અનધિકૃત દબાણો દૂર કરવા કાયદેસરની કાર્યવાહી કરવામાં આવે. જો આગામી તા. 25 નવેમ્બર, 2026 સુધીમાં કાર્યવાહી કરવામાં નહીં આવે તો તા. 26 નવેમ્બરના રોજ અમરેલી કલેક્ટર કચેરી સામે અર્ધનગ્ન હાલતમાં ઉપવાસ આંદોલન કરવાની ચીમકી આપવામાં આવી છે.



