ખાસ-ખબર સંવાદદાતા
2018 માં થયેલા વાહન અકસ્માત વખતે પોલીસ કોન્સ્ટેબલ સાથે રિવાબાને થઇ હતી માથાકૂટ: પોલીસમેન સામે હુમલાની રિવાબાએ નોંધાવેલી ફરિયાદમાં તેણીની માતા બન્યા હતાં સાક્ષી: રિવાબાનું વોરંટ જામનગર એસ.પી અને તેણીના માતાનું વોરંટ રાજકોટ પોલીસ કમિશનરને બજવણી માટે મોકલાયું.
- Advertisement -
2018માં ક્રિકેટર રવીન્દ્ર જાડેજાના પત્ની રીવાબા પર પોલીસકર્મીએ કરેલ હુમલા કેસમાં રીવાબા અને તેમના માતાને હાજર રહેવા કોર્ટ દ્વારા ફરમાન કરવામાં આવ્યું છે. ફરિયાદ પક્ષે બંને હાજર નહી રહેતા કોર્ટે આગામી મહિનાની તારીખ જાહેર કરી હાજર રહેવા હુકમ કર્યો છે.
ભારતીય ક્રિકેટ ટીમના આધારભૂત ઓલરાઉન્ડર રવીન્દ્ર જાડેજાના પત્ની રીવાબા ગત તા. 21/05/2018 ના રોજ જીજે-03 ડીએફ 9366 નંબરની બીએમડબલ્યું કાર લઇ જામનગરના સરુ સેકશન રોડ પરથી પસાર થતા હતા ત્યારે પોલીસ હેડકવાટર્સ પાસે સંજય કરંગીયા નામના પોલીસ કર્મચારીનું મોટર સાયકલ રીવાબાની કાર સાથે ભટકાયુ હતુ. જેને લઈને રીવાબાએ કાર ઉભી રાખી હતી.
દરમિયાન બાઈક ચાલક પોલીસ કોન્સ્ટબલે પોતાનું કાર્ડ બતાવી, રીવાબાના માથાના વાળ પકડી, મોઢા પર જાપટો મારવા લાગેલ અને રીવાબાનું માથું કાચ સાથે જોરથી બે ત્રણ વાર અથડાવ્યું હતું. જેમાં રીવાબાને ઈજા થઇ હતી. આ બનાવના પગેલ રાડારાડી થઇ જતા મનીષાબેન દિક્ષીત, રાજદીપસિંહ જાડેજા, વિજયસિંહ ચાવડા આવી ગયા હતા અને વચ્ચે પડી એકબીજાને છોડાવ્યા હતા. આ બનાવ વખતે રીવાબાની સાથે રહેલ તેમના માતાએ પોલીસકર્મી સામે ફરિયાદ નોંધાવી હતી.
- Advertisement -
આ અંગેનો કેસ જામનગરની અદાલતમાં શરૂ થતાં ફરિયાદી રિવાબા તથા બનાવના સાક્ષી તરીકે નોંધાયેલા રિવાબાના માતા સામે સમન્સ ઇસ્યુ થયા હતાં પરંતુ જુદા જુદા કારણસર પરત ફરતા હતાં. આથી અદાલતે જામીનપાત્ર વોરંટ પણ ઇસ્યુ કર્યા હતાં. આ વોરંટની બજવણી ન થતાં આખરે અદાલતે રિવાબા રવિન્દ્રસિંહ જાડેજાનું વોરંટ બજાવવા જામનગરના એસ.પી. અને રિવાબાના માતાનું વોરંટ બજાવવા રાજકોટ પોલીસ કમિશનરને મોકલ્યું હોવાનું જાણવા મળે છે.
