ઇન્સ્ટાગ્રામ રીલ્સની ‘ક્વીન’ પૂજા જાટવ નીકળી  કિલર

લવ, લિવ-ઇન અને લોહીયાળ ખેલ!

પૂજા જાટવે પતિ પર જાનલેવા હુમલો કરાવ્યો, કોર્ટકેસના ચક્કરમાં કુખ્યાત ગુનેગાર સાથે પ્રેમ થઈ ગયો, સગી બહેન અને તેના પ્રેમી સાથે મળીને સાસુની ક્રૂર હત્યા કરી, જેઠ-સસરા જોડે અનૈતિક સંબંધો બાંધ્યા

સોશિયલ મીડિયા પર પોતાની અદાઓ અને પ્રેમ-વફાદારીની વાતોથી હજારો લોકોના દિલ જીતનારી ઇન્સ્ટાગ્રામ રીલ્સની ‘ડિજિટલ ક્વીન’ પૂજા જાટવનો અસલી ચહેરો સામે આવતાં જ લોકોના રુંવાડા ઊભા થઈ ગયા છે. ઉત્તર પ્રદેશના ઝાંસી અને મધ્ય પ્રદેશના ગ્વાલિયર વચ્ચે રચાયેલી આ ક્રાઇમ સ્ટોરી કોઈ ફિલ્મી પટકથા કરતાં પણ વધુ ભયાનક અને ચોંકાવનારી છે. ગ્લેમર અને સોશિયલ મીડિયાની ચમક પાછળ છુપાયેલી એક એવી ખૂની સાઝિશ જેમાં પ્રેમ, દગો, લિવ-ઇન રિલેશનશિપ, ગેરકાયદેસર સંબંધો અને છેલ્લે પોતાની જ સાસુની નિર્મમ હત્યાનો સમાવેશ થાય છે. લોકો હવે પૂજા જાટવની સરખામણી ઇન્દોરની કુખ્યાત સોનમ રઘુવંશી સાથે કરી રહ્યા છે અને તેને તેનાથી પણ વધુ જાલિમ ગણાવી રહ્યા છે.

પૂજા જાટવ મૂળભૂત રીતે મધ્ય પ્રદેશના ગ્વાલિયરની રહેવાસી છે. તેના પિતા ભારતીય રેલવેમાં લોકો પાયલટ તરીકે ફરજ બજાવતા હતા. પિતાએ દીકરીના સુખી ભવિષ્ય માટે વર્ષ 2014માં રેલવેમાં જ નોકરી કરતા રમેશ નામના યુવાન સાથે પૂજાના લગ્ન કરાવ્યા હતા. રમેશ ઓરછાનો વતની હતો. લગ્નની શરૂઆતમાં બધું બરાબર ચાલ્યું, પરંતુ થોડા જ સમયમાં બંને વચ્ચે અણબનાવ અને ઝઘડા શરૂ થઈ ગયા. આ વિવાદ એટલો વધી ગયો કે પૂજાએ પોતાના જ પતિને રસ્તામાંથી હટાવવાનું નક્કી કરી લીધું. તેણે ભાડાના ગુંડાઓ બોલાવીને પોતાના જ પતિ રમેશ પર ગોળીબાર કરાવ્યો. સદનસીબે આ હુમલામાં રમેશનો જીવ બચી ગયો અને તેણે પત્ની પૂજા વિરુદ્ધ પોલીસમાં ફરિયાદ નોંધાવી.

પતિ પર જાનલેવા હુમલો કરાવવાના કેસમાં પૂજા કાનૂની સકંજામાં ફસાઈ ગઈ હતી. આ કેસની સુનાવણી માટે તેણે વારંવાર ગ્વાલિયર કોર્ટમાં હાજરી આપવી પડતી હતી. આ દરમિયાન કોર્ટ પરિસરમાં જ તેની મુલાકાત ઝાંસીના કુંહરિયા ગામના કલ્યાણ ઉર્ફે લાખન સાથે થઈ. લાખન પોતે પણ એક ગુનાહિત પૃષ્ઠભૂમિ ધરાવતો વ્યક્તિ હતો અને તેના પર અડધા ડઝનથી વધુ ગુનાહિત કેસો ચાલી રહ્યા હતા. બે ગુનેગાર માનસિકતા ધરાવતા લોકોની આંખો મળી અને જોતજોતામાં બંને વચ્ચે પ્રેમ પાંગર્યો. થોડા જ સમયમાં પૂજા પોતાના ભૂતકાળને પાછળ છોડીને ઝાંસી આવી ગઈ અને લાખન સાથે ભાડાના મકાનમાં લિવ-ઇન રિલેશનશિપમાં રહેવા લાગી.

પૂજાની જિંદગીમાં મોટો વળાંક ત્યારે આવ્યો જ્યારે 25 મે 2019ના રોજ એક માર્ગ અકસ્માતમાં તેના લિવ-ઇન પાર્ટનર લાખનનું મોત થઈ ગયું. લાખનના અવસાન બાદ પૂજા થોડો સમય ગ્વાલિયર પોતાની બહેન કમલા ઉર્ફે કામિની સાથે રહેવા જતી રહી. જોકે, તેના મગજમાં કોઈ મોટો પ્લાન ચાલી રહ્યો હતો. થોડા સમય પછી તે ફરીથી ઝાંસી આવી અને સીધી લાખનના ઘરે પહોંચી ગઈ. ત્યાં જઈને તેણે ભાવનાત્મક ડ્રામા શરૂ કર્યો અને લાખનની માતાના ખોળામાં માથું મૂકીને રડવા લાગી. પોતાને લાચાર અને બેબસ ગણાવી તેણે આશરો માંગ્યો. લાખનનો પરિવાર પૂજા અને લાખનના સંબંધોથી વાકેફ હતો, તેથી દયા ખાઈને તેમણે પૂજાને પોતાના ઘરમાં રહેવાની મંજૂરી આપી દીધી.

પરિવારને એમ હતું કે પૂજા લાખનના પ્રેમમાં અહી આવી છે, પરંતુ પૂજાની નજર કંઈક અલગ જ હતી. તેણે પોતાની સુંદરતાની જાળમાં લાખનના મોટા ભાઈ સંતોષને ફસાવી લીધો. રાતના અંધારામાં સંતોષ અને પૂજા વચ્ચે ગેરકાયદેસર સંબંધો બંધાયા. આ અનૈતિક સંબંધોનો ભાંડો ત્યારે ફૂટ્યો જ્યારે પૂજાએ એક બાળકીને જન્મ આપ્યો, જે સંતોષની હતી. સંતોષની પત્ની રાગિણીને આ વાતની ખબર પડતાં ઘરમાં ભારે હોબાળો મચ્યો. જોકે, સંતોષ પૂજાના પ્રેમમાં એટલો અંધ થઈ ગયો હતો કે તેણે પોતાની પત્ની તરફ ધ્યાન આપવાનું બંધ કરી દીધું જેથી કંટાળીને રાગિણી પોતાના પિયર ચાલી ગઈ.

ત્યારબાદ પૂજા પોતાની પુત્રીને લઈને ગ્વાલિયર રહેવા ગઈ અને ત્યાંથી તેણે સંતોષ પાસે પરિવારની 16 વીઘા જમીનમાંથી લાખનના હિસ્સાની 8 વીઘા જમીન પોતાના નામે કરવા અને તેને વેચી દેવા દબાણ શરૂ કર્યું. સંતોષ અને તેના પિતા અજય આ જમીન આપવા તૈયાર થઈ ગયા, પરંતુ લાખનની માતા સુશીલાએ આ હિસ્સો આપવાનો સ્પષ્ટ ઈન્કાર કરી દીધો.

જમીન મેળવવામાં આડખીલી બનતી સાસુ સુશીલાને રસ્તામાંથી હટાવવા પૂજાએ એક ખૌફનાક કાવતરું ઘડ્યું. તેણે યોજનાબદ્ધ રીતે સંતોષ અને તેના પિતા અજયને બહાના હેઠળ ગ્વાલિયર પોતાના ઘરે બોલાવી લીધા જેથી તેઓ શંકાના દાયરામાં ન આવે. બીજી તરફ, પૂજાએ પોતાની સગી બહેન કમલા અને તેના પ્રેમીને ઝાંસી મોકલ્યા. જમીન વેચાયા પછી અડધી રકમ આપવાની લાલચ આપીને પૂજાએ આ બંને પાસે પોતાની સાસુ સુશીલાની ગળું દબાવીને નિર્મમ હત્યા કરાવી દીધી. હત્યા કર્યા બાદ પૂજાએ પોલીસને ગેરમાર્ગે દોરવા માટે પોતાના સસરા અજય પર જ હત્યાની શંકા વ્યક્ત કરી અને પોલીસને જણાવ્યું કે સસરા અને સાસુ વચ્ચે અણબનાવ હતો.

પોલીસની કડક પૂછપરછમાં પાપનો ઘડો ફૂટ્યો

પોલીસે જ્યારે સસરા અજયની અટકાયત કરીને પૂછપરછ કરી ત્યારે તેમણે પોતાને નિર્દોષ ગણાવ્યા. પૂજાએ સસરાને એમ પણ કહ્યું કે તમે ગુનો કબૂલી લો, હું સારો વકીલ કરીને તમને છોડાવી લઈશ. પરંતુ અજયે ના પાડી. પોલીસને પૂજાની હિલચાલ પર શંકા ગઈ, તેથી તેમણે પૂજાને કસ્ટડીમાં લઈને કડક પૂછપરછ શરૂ કરી. પોલીસના થર્ડ ડિગ્રીના ડર અને સચોટ સવાલો સામે પૂજા લાંબો સમય ટકી શકી નહીં અને તેણે પોતાનો ગુનો કબૂલ કરી લીધો. પોલીસે આ મામલે પૂજા, તેની બહેન કમલા અને તેના પ્રેમીની ધરપકડ કરીને જેલ હવાલે કર્યા છે.

હત્યાના ગણતરીના કલાકોમાં જ ઇન્સ્ટાગ્રામ પર ‘હલ્દી વાળી રિલ’ કરી શેર!

આ સમગ્ર ઘટનામાં સૌથી ચોંકાવનારી બાબત એ છે કે 24 જૂનના રોજ પૂજાએ પોતાની સાસુની હત્યા કરાવી હતી. સાસુના મોતના ગણતરીના કલાકો બાદ જ પૂજા ઇન્સ્ટાગ્રામ પર એટલી શાંતિથી સક્રિય હતી કે તેણે પાણીમાં હળદર નાખવાની એક પોપ્યુલર ટ્રેન્ડિંગ રીલ બનાવીને સોશિયલ મીડિયા પર અપલોડ કરી દીધી હતી. તેના ચહેરા પર સાસુની હત્યાનો કોઈ પસ્તાવો કે ડર દેખાતો ન હતો. ઇન્સ્ટાગ્રામ પર હજારો ફોલોઅર્સ ધરાવતી અને પોતાને ‘ડિજિટલ ક્વીન’ ગણાવતી પૂજા જાટવ પાછળ આટલી ક્રૂર હત્યારી છુપાયેલી હશે તેવું તેના ફોલોઅર્સ પણ વિચારી શકતા નથી. હાલ આ સોશિયલ મીડિયા સ્ટાર કાનૂનના સકંજામાં છે અને પોતાના પાપની સજા ભોગવી રહી છે.