ટેલિકોમ ક્ષેત્રે ઐતિહાસિક સિદ્ધિ : T-Mobile-જિયોએ સ્થાપિત કર્યું વિશ્વનું પ્રથમ ‘5G SA’ રોમિંગ કનેક્શન

આંતરરાષ્ટ્રીય પ્રવાસ દરમિયાન ગ્રાહકોને મળશે હાઇપર-ફાસ્ટ અને અવિરત 5G સ્પીડ

5G સ્ટેન્ડઅલોન (SA) ટેકનોલોજીને કારણે લેટન્સી નહિવત્ થશે, વિદેશમાં પણ હાઇ-રિઝોલ્યુશન વીડિયો અને હેવી કલાઉડ એપ્લિકેશન્સ વિના વિલંબે ચાલશે

વૈશ્વિક વાયરલેસ કનેક્ટિવિટીના ક્ષેત્રમાં ક્રાંતિકારી સીમાચિહ્ન સ્થાપિત કરતાં યુએસ સ્થિત T-Mobile અને ભારતની અગ્રણી ટેલિકોમ કંપની રિલાયન્સ જિયોએ વિશ્વમાં પ્રથમ વખત ‘5G સ્ટેન્ડઅલોન’ (SA) રોમિંગ કનેક્શન સફળતાપૂર્વક સ્થાપિત કર્યું છે. ગ્લોબલ કનેક્ટિવિટી પ્લેટફોર્મ Syniversell સહયોગ અને ઇન્ટરઓપરેબિલિટી દ્વારા આ ઐતિહાસિક સિદ્ધિ હાંસલ કરવામાં આવી છે. આ સફળતાએ સાબિત કરી દીધું છે કે આગામી પેઢીનું હાઈ-સ્પીડ બોર્ડરલેસ નેટવર્ક હવે માત્ર કલ્પના ન રહેતાં નક્કર વાસ્તવિકતા બની ગયું છે, જેણે સરહદ પાર 5G રોમિંગ માટે નવો વૈશ્વિક માપદંડ નિર્ધારિત કર્યો છે. આ નવીન પહેલના પરિણામે T-Mobile અને જિયોના ગ્રાહકોને આંતરરાષ્ટ્રીય પ્રવાસ દરમિયાન સાચા અર્થમાં હાઇપર-ફાસ્ટ 5G સ્ટેન્ડઅલોન રોમિંગની અવિરત સુવિધા મળશે. 5G SA ટેકનોલોજી પરંપરાગત નેટવર્ક કરતાં અનેકગણી ઝડપી ડાઉનલોડ-અપલોડ સ્પીડ પૂરી પાડે છે તેમજ લેટન્સી (ડેટા ટ્રાન્સફરમાં થતો વિલંબ) નહિવત્ કરી દેશ છે. પરિણામે, વિદેશ પ્રવાસ વખતે હાઈ-રિઝોલ્યુશન વીડિયો સ્ટ્રીમિંગ, સોશિયલ મીડિયા પર રીલ્સ શેરિંગ કે હેવી બિઝનેસ ક્લાઉડ એપ્લિકેશન્સનો ઉપયોગ કરતી વખતે નેટવર્ક સ્પીડમાં સહેજ પણ ઘટાડો અનુભવાશે નહીં. આ ઉપરાંત ઇન્ટરનેટ ઓફ થિંગ્સ (IOT), રિયલ-ટાઈમ કમ્યુનિકેશન અને એઆઈ આધારિત નેક્સટ જનરેશન સેવાઓ માટે પણ વૈશ્વિક સ્તરે નવા દ્વાર ખૂલશે.
T-Mobileના ચીફ નેટવર્ક ઓફિસર અંકુર કપૂરે આ ઉપલબ્ધિ અંગે જણાવ્યું કે, વૈશ્વિક ટેલિકોમ ક્ષેત્રે આ એક ગૌરવપૂર્ણ ક્ષણ છે. અમે વર્ષ ૨૦૨૦માં 5G સ્ટેન્ડઅલોન ટેકનોલોજી માટે પાયાનું કામ શરૂ કર્યું હતું અને આજે રિલાયન્સ જિયો જેવી વિશાળ વૈશ્વિક બ્રાન્ડ સાથે ભાગીદારી કરી તેનું સફળ પરિણામ હાંસલ કર્યું છે. વપરાશકર્તા એક દેશમાંથી બીજા દેશમાં પ્રવેશ કરે તો પણ તેને હોમ નેટવર્ક જેવો જ સુરક્ષિત અને ઝડપી 5G અનુભવ મળશે. રિલાયન્સ જિયોના ઇન્ટરનેશનલ નેટવર્ક, પાર્ટનરશિપ એન્ડ સર્વિસિસ હેડ માર્ક યાર્કોસ્કીએ ઉમેર્યું કે, આ એક પરિવર્તનકારી સીમાચિહ્ન છે. જ્યારે બે દિગ્ગજ 5G સ્ટેન્ડઅલોન નેટવર્ક્સ પરસ્પર જોડાય છે ત્યારે ગ્રાહકો અને કોર્પોરેટ જગત માટે અપાર સંભાવનાઓ સર્જાય છે. ક્રોસ-નેટવર્ક ક્ષમતા અને આર્ટિફિશિયલ ઇન્ટેલિજન્સ આધારિત ભવિષ્યલક્ષી સુવિધાઓ પૂરી પાડવા માટે આ જોડાણ મહત્વનો પાયો સાબિત થશે. Syniverseના ચીફ પ્રોડક્ટ ઓફિસર જ્હોન વિકે ખુશી વ્યક્ત કરતાં જણાવ્યું કે, કંપનીની અદ્યતન મેડિએશન ટેકનોલોજી અને સુરક્ષિત ઇન્ટરવર્કિંગ પ્લેટફોર્મ થકી વિશ્વની આ પ્રથમ 5G SA રોમિંગ સેવા શક્ય બની છે. વધુને વધુ વૈશ્વિક ઓપરેટર્સ આ સિસ્ટમ સાથે જોડાઈને આગામી પેઢીની કોમર્શિયલ રોમિંગ સેવાઓ સરળતાથી શરૂ કરી શકશે.