અમેરિકી સાયબર નિષ્ણાંતોની ચેતવણી: આઈપી આધારિત ઈઈઝટ કેમેરા જોખમી
અમદાવાદમાં 399, વડોદરામાં 87, સુરતમાં 166, રાજકોટમાં 33, ભાવનગરમાં 24 અને ગાંધીનગરમાં 20 આઈપી કેમેરા છે
- Advertisement -
ખાસ-ખબર ન્યૂઝ રાજકોટ
રાજકોટમાં દસ મહિના પહેલા ગાયનેકોલોજી હોસ્પિટલના સીસીટીવી ફુટેજ હેક થઈ વાંધાજનક ક્લીપીંગ અને વીડિયો વાયરલ થતાં ભારે હંગામો મચ્યો હતો. ત્યારે ગુજરાત સહિત દેશના સીસીટીવી નેટવર્કના સુરક્ષા મુદ્દે સવાલો ઊઠ્યા હતા. હવે અમેરિકા સ્થિત સાયબર સિક્યુરિટી નિષ્ણાંતોએ ફરી એકવાર ચોંકાવનારી ચેતવણી આપતા જણાવ્યું છે કે દેશભરમાં કુલ 21,444 આઈપી બેઝડ સીસીટીવી કેમેરા ઓપન ઇન્ટરનેટ પરથી ઍક્સેસ થતાં હેકિંગનું જોખમ છે.
તેમણે ખાસ કરીને આઈપીએ આધારીત કેમેરા ઉપર ગંભીર જોખમ હોવાનું જણાવ્યું છે. જેમાં દિલ્હીમાં 2,914, મુંબઈમાં 1,842, બેંગલુરુમાં 1,205, હૈદરાબાદમાં 1,100, પુણેમાં 899, ચેન્નાઈમાં 823, કોલકાતામાં 683 જ્યારે ગુજરાતની વાત કરીએ તો સૌથી વધુ 399 કેમેરા અમદાવાદમાં, 166 સુરતમાં, 87 વડોદરામાં, 33 રાજકોટમાં, 24 ભાવનગરમાં અને 20 ગાંધીનગરમાં આઇપી સીસીટીવી કેમેરા કાર્યરત છે.
નિષ્ણાંતોના જણાવ્યા મુજબ ઘણા કેમેરામાં નબળા પાસવર્ડ અને ડિફોલ્ટ લોગિન સેટિંગ્સને કારણે હેકરો સહેલાઈથી ઘૂસી શકે છે. ગત ફેબ્રુઆરીમાં હેકરોએ 80 ખાનગી આઈપી કેમેરાના ડેશબોર્ડમાંથી 50,000થી વધુ પ્રાઇવેટ ક્લિપ્સ મેળવીને ટેલીગ્રામ ગ્રુપો અને પોર્ન નેટવર્ક પર વેચાણ માટે મુકી હોવાનું પણ ખુલ્યું હતું. રાજકોટની ઘટનાથી સમગ્ર દેશમાં ખળભળાટ મચી ગયો હતો.
એની પાછળ અન્ય રાજ્યોમાં પણ આવી જ રીતે કેમેરા હેક થયાની તપાસમાં પુષ્ટિ મળી હતી. આ સાથે અનેક નવી ખામીઓ સામે આવી છે. એક તરફ ભારતમાં સાઇબર ફ્રોડના કેસો સતત વધતા જાય છે અને લોકો કરોડો રૂપિયા ગુમાવી રહ્યા છે. સરકાર જાગૃતિ અભિયાનથી લઈને ટેક્નિકલ રિફોર્મ સુધી અનેક પ્રયાસ કરી રહી છે. છતાં હેકરો નવી રીતો અપનાવીને ગુનાખોરીને અંજામ આપી રહ્યા છે.
સાયબર નિષ્ણાંતોનું માનવું છે કે દેશમાં દરેક ખૂણે ગુનાખોરી અટકાવવા, સુરક્ષા વધારવા અને મોનિટરિંગ માટે સીસીટીવી કેમેરાનો વ્યાપ વધી રહ્યો છે. પરંતુ જો સુરક્ષા ફીચર્સ પૂરતા મજબૂત ન હોય તો આવા કેમેરા જ સુરક્ષા માટે જોખમ બની શકે છે. લોકો, સરકારી વિભાગો અને ખાનગી સંસ્થાઓ માટે આ ચેતવણી નવા પડકારરૂપ છે. નિષ્ણાંતોએ તાત્કાલિક સુરક્ષા અપડેટ, મજબૂત પાસવર્ડ, નેટવર્ક પ્રોટેક્શન અને મોનિટરિંગ સિસ્ટમ લાગુ કરવાની સલાહ આપી છે જેથી ‘સિક્યુરિટી કેમેરા’ હેકરો માટે ‘સરળ કેમેરા’ ન બની જાય.
