ફૅક ઑનલાઇન એપ્લિકેશનથી વેપારીઓ સાથે છેતરપિંડી
ખાસ-ખબર ન્યૂઝ જૂનાગઢ, તા.29
- Advertisement -
ફેક ઓનલાઇન એપ્લિકેશનથી વેપારીઓ સાથે ફ્રોડ કરતું સુરતનું દપંતી રાધિકા દેવાંગ પઢિયાર, દેવાંગ જગદીશ પઢીયાર તેનો મિત્ર ભાવેશ ચાંદગેલાની પોલીસે અટક કરી રૂ. 6,39,348નો મુદ્દામાલ કબ્જે લીધો હતો.
જૂનાગઢમાં વણઝારી ચોક પાસે આવેલ નાઈટવેર કાપડની દુકાને ગત તા. 23 એપ્રિલના રોજ એક કપલ ખરીદી કરવા આવ્યું હતું અને રૂ.10,700ની કાપડની ખરીદી કરી અમદાવાદ થી આવતા હોય રોકડ પૂરી થઈ ગઈ છે તેમ કહી વધારાની રૂપિયા 3000ની રોકડ વેપારી પાસેથી મેળવી કાપડ તથા રોકડ મળી કુલ રૂ.13,700નું મહિલાએ પોતાના મોબાઈલમાં રહેલ ફેંક ફોન પે ઓનલાઈન એપ્લિકેશન મારફત વેપારીના સ્કેનરમા સ્કેન કરી ઓનલાઇન ટ્રાન્જેક્શન સક્સેસ થયાનો ખોટો મેસેજ વેપારીને બતાવી કારમાં નાસી ગયા હતા.
વેપારીએ રવિવારે છેતરપિંડીની ફરિયાદ કરતા ઇન્ચાર્જ નાયબ પોલીસ અધિક્ષક રવિરાજસિંહ પરમારના માર્ગદર્શનમાં એ ડિવિઝનના પીઆઈ આર. કે. પરમાર, પીએસઆઇ વાય.એન. સોલંકી, સરતાજ સાંધની ટીમે નેત્રમ શાખાની મદદથી ટેકનિકલ તથા હ્યુમન સોર્સથી સુરતના પુણા ગામની સત્યનારાયણ સોસાયટીમાં આવેલ કેવટ એપાર્ટમેન્ટ બ્લોક નંબર 404માં રહેતી રાધિકા, તેનો પતિ દેવાંગ જગદીશ પઢીયાર અને સુરતમાં સાથે રહેતો મિત્ર ભાવેશ વિનુ ચાંગેલાની ધરપકડ કરી હતી તેમજ ત્રિપુટી પાસેથી કપડા, મેંદરડા સાસણ રોડ પરથી ખરીદેલ કેરીના 4 બોક્સ, અમદાવાદ ઇસ્કોન રોડ ખાતેની દુકાનમાંથી ખરીદેલા શૂઝ, સુરતમાં લસકાણા રોડ પરથી ખરીદેલ ટેડી બિયર, રૂ.3,000ની રોકડ, 2 કાર, 3 મોબાઈલ ફોન સહિત કુલ રૂ. 6,39,348નો મુદ્દામાલ કબજે લઈ વધુ તપાસ હાથ ધરી હતી.
આરોપીઓ ફોન-પે, પેયટીએમ, જેવી ફેક ઓનલાઇન એપ્લિકેશનનો ઉપયોગ કરી જુદા જુદા શહેરોમાં અલગ અલગ વેપારીની દુકાને જઈ ત્યાંથી ખરીદી કરતા હતા. પતિ પત્ની ફરવા નીકળેલ હોય અને રોકડ પૂરી થઈ ગઈ હોવાનું કહી વેપારીને વિશ્વાસમાં લેતા હતા. બાદમાં વેપારી પાસેથી રોકડ રકમ મેળવી પોતાના મોબાઈલમાં રહેલ ફેક એપ્લિકેશન મારફત વેપારીના સ્કેનરને તેમ કરી ખરીદેલ વસ્તુ તેમજ રોકડ જેટલી રકમનું બોગસ ઓનલાઈન ટ્રાન્જેક્શન સક્સેસ થયાનો ખોટો મેસેજ બતાવી વેપારીને છેતરતા હતા. જયારે બનાવ મામલે ડીવાયએસપી રવિરાજસિંહ પરમારે જણાવ્યું હતું કે, ગુગલ પે, ફોન-પે, પેયટીએમ જેવી ઓનલાઇન એપ્લિકેશનના માધ્યમથી નાણાકીય લેતી દેતી કરતી વખતે બેન્ક એકાઉન્ટ તેમજ બેંક મારફત આવતાં મેસેજ પરથી ખરેખર પોતાના બેંક ખાતામાં નાણા જમા, ઉધાર થયેલ છે કે કેમ તે અંગે ખરાઈ કરવી જોઈએ.
