એક પણ વાછરડાંને જન્મ આપ્યા વિના રોજનું 4 લિટર દૂધ અપાતી કામધેનુ ગાય

જૂનાગઢના ધંધુસર ગામે ગાયનો અજીબો ગરીબ કુદરત કા કરિશ્મા

ખાસ-ખબર ન્યૂઝ જૂનાગઢ, તા.29

કહેવાય છેને કે, કુદરતની લીલા અપરમ પાર હોઈ છે અને કુદરતના કરિશ્મા પણ કઈ અલગ હોઈ છે. આવોજ એક કિસ્સો જૂનાગઢ જિલ્લાના ધંધુસર ગામે જોવા મળ્યો છે. વાત કરીયે તો વંથલી તાલુકાના ધંધુસરમાં એક ખેડૂત પરિવારને ત્યાં ત્યાં કુદરતનો કરિશ્મા થયો છે. તેને ત્યાં 2021માં ગાથે એક સાથે વાછરડા અને વાછરડીને જન્મ આપ્યો હતો. વાછરડીની તપાસ કરતા તેને ગર્ભાશય જ ન હતું. આ ગાય રજસ્વલામાં આવી ન હતી. થોડા સમય પૂર્વે ગાય થોડી બીમાર પડતાં વેટરનરી તબીબ તપાસ કરી પરિવારને ગાય દોહવાનું શરૂ કરવા જણાવ્યું હતું. તે મુજબ દોહવાનું શરૂ કરતાં છેલ્લા બે ત્રણ સપ્તાહથી આ ગાય રોજ ચાર લિટર જેટલું દૂધ આપી રહી છે. શાસ્ત્રોમાં આવી ગાયને કામધેનું કહેવામાં આવી છે. આ અંગેની વધુ વિગત મુજબ વંથલી તાલુકાના ધંધુસરમાં રહેતા પૂંજાભાઈ સરમણભાઈ મૂળિયાસીયાની ગાયે 2021ના વર્ષમાં મહાશિવરાત્રીની રાત્રે એક વાછરડાને જન્મ આપ્યો હતો, તેની થોડી વાર બાદ વાછરડીને જન્મ આપ્યો હતો. ત્યારે વેટરનરી તબીબે વાછરડી પાછળથી આવી છે એટલે તેમાં કઈ ખોડખાંપણ હશે એમ જણાવ્યું હતું. ખેડૂત પરિવારે સ્નેહ પૂર્વક વાછરડા અને વાછરડીનો ઉછેર કર્યો હતો. ખેડૂત પૂંજાભાઈએ જણાવ્યું હતું કે વાછરડો દોઢ બે વર્ષનો થયો ત્યારે તેને શેરનાથબાપુને અર્પણ કર્યા હતો.

વાછરડી અઢી ત્રણ વર્ષની થઈ ત્યારે વેટરનરી તબીબે તપાસ કરતા તેને ગર્ભાશય ન હોવાનું જાણવા મળ્યું હતું. આ વાછરડીને માલ ગામે રહેતો તેમનો ભાણેજ લઈ ગયો હતો. થોડા સમય પહેલા એ ગાયને ધંધુસર લઈ આવવામાં આવી હતી. ગાયને તાવ આવી જતા ભાણેજે કુતિયાણાના વેટરનરી તબીબને મોકલ્યા હતા, તેઓએ ગાયની તપાસ કરી આ ગાયને દોહવાનું શરૂ કરવા જણાવ્યું હતું. છેલ્લા 15-20 દિવસથી શરૂ કર્યું છે. શરૂઆતમાં સવાર એક દોઢ લિટર આસપાસ દૂધ આપતી હતી, હાલ સવાર સાંજ બે-બે લિટર જેટલું દૂધ આપે છે. આમ આ કામધેનુ રજસ્વલામાં આવતી નથી, ગર્ભાશય ન હોવાથી પ્રસુતિ થઈ નથી છતાં રોજ કુલ ચાર લિટર દૂધ આપે છે. આ ગાયની જીભ, ચારેય આંચળ અને કાન કાળા છે. ખેડૂત પરિવાર તેને પોતાનાં ઘરની સભ્ય જ માને છે. વધુમાં પૂંજાભાઈએ જણાવ્યું હતું કે, આ ગાય આજીવન દૂધ આપશે તેમજ વચ્ચે વસુકી જવાનો સમય પણ આવે એવી સંભાવના પણ નથી. શાસ્ત્રોમાં આવી ગાયને કામધેનુ કહેવામાં આવી છે.

આ કામધેનુ ગાયની 17.51 લાખની માંગ કરી છતાં ન આપી

આ કામધેનુ ગાયને થોડા સમય પહેલા 17.51 લાખમાં માંગવામાં આવી હતી છતાં ગીર પ્રજાતિની આ ગાયને આપવા પરિવારે ના પાડી દીધી હતી. રોજ બ રોજ ગાયને જોવા અને તેને લેવા માટે લોકો આવતા રહે છે પરંતુ ખેડૂત પરિવારે તો આ ગાયને આજીવન પોતાના પરિવારની સભ્ય જ બનાવી કોઈને ન આપવાનો સંકલ્પ કરી લીધો છે. આજે આ કામધેનુ ગાય સાથે પરિવારનો અનેરો લગાવ થયો છે અને પોતાના પરિવારના સભ્યની જેમ તેની દેખભાળ કરીને ગૌમાતાને પૂજી રહ્યા છે.

વાછરડાં સાથે જન્મ થયો છતાં કામધેનુ ગાય હોવું ભાગ્યેજ જોવા મળે છે

ગાય બે વાછરડીને જન્મ આપે તેમાંથી એક ગાય પ્રજોત્પતિ વિના દૂધ આપે એ સામાન્ય બાબત છે પરંતુ વાછરડા સાથે જન્મેલી ગાયને ગર્ભાશય ન હોય અને પ્રજોત્પતિ વિના દૂધ આપે એ ભાગ્યે જ બનતી ઘટના છે. આ ગાયનો પોતાને ત્યાં જન્મ થયો એ બાબતથી ખેડૂત પરિવાર પોતાને ભાગ્યશાળી માની રહ્યો છે.