રાજકોટમાં ડૉ. કુમાર વિશ્ર્વાસ કરશે ત્રણ દિવસની ‘જલકથા’

જળસંચય માટે સતત કાર્યરત ગીરગંગા પરિવાર ટ્રસ્ટનું ભગીરથ આયોજન

15, 16 અને 17 ડિસેમ્બર રેસકોર્સ મેદાનમાં રાત્રે 8થી 12 કથા યોજાશે

ખાસ-ખબર ન્યૂઝ રાજકોટ

ગીરગંગા પરિવાર ટ્રસ્ટની જળસંચય માટેની અથાગ મહેનતના પરિણામ સ્વરૂપ સૌરાષ્ટ્રની કાયાપલટનો પ્રારંભ થઈ રહ્યો છે ત્યારે આ ભગીરથ કાર્યને વધુ બળ પૂરું પાડવા હિન્દી ભાષાના વિશ્વપ્રસિદ્ધ કવિ તત્વચિંતક અને કથાકાર ડો. કુમાર વિશ્ર્વાસ ડિસેમ્બર મહિનામાં રાજકોટમાં ત્રણ દિવસ જલકથા કરશે. ખાસ કરીને, શિક્ષિત વર્ગ અને યુવાનોમાં અપ્રતિમ લોકપ્રિયતા ધરાવતા કુમાર વિશ્ર્વાસ ફક્ત એક કવિ નથી, પણ ખરા અર્થમાં એક તત્વચિંતક પણ છે. તેઓ સામાજિક અને સાંસ્કૃતિક વિષયો પર પોતાના વિચારો સ્પષ્ટપણે રજૂ કરવા માટે વિખ્યાત છે. પ્રવચનો અને કથાના માધ્યમથી ભારતીય સંસ્કૃતિ અને મૂલ્યો પર ભાર મુકતા ડો. કુમાર વિશ્ર્વાસના વિષયોમાં મુખ્યત્વે રામ, રામાયણ, શ્રીકૃષ્ણ, મહાભારત અને અન્ય પ્રાચીન ગ્રંથોનો સમાવેશ થાય છે. 15, 16 અને 17 ડિસેમ્બર દરમિયાન દરરોજ રાત્રે 8 થી 12 દરમિયાન તેઓ “જલકથા : અપને અપને શ્યામ કી” વિષય પર કથાનું શ્રોતાઓને રસપાન કરાવશે. આજની નવી જનરેશનને નવા વિચારો આપવા માટે ગીરગંગા ટ્રસ્ટ દ્વારા વ્યાસપીઠ પર કુમાર વિશ્ર્વાસની પસંદગી કરવામાં આવી છે. કથા અંતર્ગત ડો. કુમાર વિશ્ર્વાસ શ્યામ કથા સાથે જળસંચયની આવશ્યકતા અને મહત્વને પણ વણી લેશે. સૌરાષ્ટ્રની મોટામાં મોટી જરૂરિયાત પાણીની છે ત્યારે જળસંચય માટે ચેક ડેમો ઊંડા ઉતારવા, રીપેર કરવા, ઊંચા કરવા, નવા બનાવવા તેમજ બોર-કુવા રિચાર્જ, ખેત તલાવડી સોર્સ ખાડા વગેરે જેવા જળસંચયના 1,11,111 સ્ટ્રકચરોના કાર્યો પૂર્ણ કરવાના સંકલ્પ સાથે કાર્યરત સંસ્થા ગીરગંગા પરિવાર ટ્રસ્ટના પ્રમુખ દિલીપભાઈ સખિયા, ટ્રસ્ટી મંડળ અને સંસ્થાની કોર ટીમ તેમજ સંસ્થા સાથે તન,મન,ધનથી જોડાયેલા સૌ કોઈના પ્રયત્નોથી જળસંચયને લગતા લગભગ 9,000 સ્ટ્રકચરો પૂર્ણ કરવામાં આવ્યા છે. આ કાર્યને અનેકગણો વેગ મળે તેમજ જળસંચયના આ ભગીરથ કાર્ય દ્વારા સૌરાષ્ટ્ર હરીયાળુ બને અને તે માટે સમાજ શ્રેષ્ઠિઓ અનુદાન માટે આગળ આવે તે હેતુથી આ ’જલકથા : અપને અપને શ્યામ કી’નું આયોજન થઈ રહ્યું છે. રાજકોટના રેસકોર્સ મેદાન ખાતે યોજાનાર આ કથામાં લગભગ દોઢ લાખ શ્રોતાઓ ઉપસ્થિત રહેવાની ધારણા છે.
ગીરગંગા પરિવાર ટ્રસ્ટના પ્રમુખ દિલીપભાઈ સખિયા અને ગીરગંગા પરિવારના માર્ગદર્શક તેમજ પ્રદેશ ભાજપના ઉપાધ્યક્ષ ડો. ભરતભાઈ બોઘરાએ ગત મંગળવારે દિલ્હી મુકામે કેન્દ્રીય જળશક્તિ મંત્રી અને ગુજરાત પ્રદેશ ભાજપના પ્રમુખ સી.આર. પાટીલના અધ્યક્ષતામાં કવિ-તત્વચિંતક કુમાર વિશ્ર્વાસ સાથે બેઠક કરી હતી અને આ બેઠકમાં ગીરગંગાની જળસંચય માટેની પ્રવૃત્તિની ઊંડાણપૂર્વક માહિતી મેળવ્યા બાદ કુમાર વિશ્ર્વાસે રાજકોટમાં ત્રણ દિવસની જલકથા કરવા સહમતી આપી હતી.

અદભુત અને અવિસ્મરણીય બની રહેનાર આ જલકથા-શ્યામ કથાના આયોજનમાં કેન્દ્રીય જળશક્તિ મંત્રાલય અને કેન્દ્રીય મંત્રી સી. આર. પાટીલ ઊંડો રસ લઈ તમામ પ્રકારનું માર્ગદર્શન પૂરું પાડી રહ્યા છે. ગીરગંગા ટ્રસ્ટની કુમાર વિશ્ર્વાસ સાથેની બેઠક પણ તેમના માધ્યમથી અને તેમની ઉપસ્થિતિમાં જ મળી હતી. સાહિત્ય જગત અને નવા વિચારો માટે ઉત્સુક નવી પેઢી જેમના તરફ વિશ્ર્વાસથી જોઈ રહી છે તેવા ડો. કુમાર વિશ્ર્વાસની કથા માટે ગીરગંગા પરિવારમાં ભારે ઉત્સાહ જોવા મળી રહ્યો છે અને કથા પૂર્વે આજથી જ તૈયારીઓનો ધમધમાટ શરૂ કરી દેવાયો છે. આ અંગે ટ્રસ્ટના આગેવાનો, શુભેચ્છકો અને કાર્યકરોની પ્રથમ બેઠક તાજેતરમાં નવા રીંગ રોડ સ્થિત મુરલીધર ફાર્મ પર મળી હતી. જેમાં કથાને અનુલક્ષીને વિવિધ મુદ્દાઓ પર ગહન ચર્ચા થઈ હતી તેમજ વ્યવસ્થાના ભાગરૂપે જુદી-જુદી સમિતિઓની રચના કરવામાં આવી હતી.

આ સમગ્ર જલકથાને રાષ્ટ્રીય ફલક પર લઈ જવા માટે ગીરગંગા ટ્રસ્ટના પ્રમુખ દિલીપભાઈ સખિયાના, માર્ગદર્શન હેઠળ કોર કમિટીના સભ્યો સર્વ દિનેશભાઈ પટેલ પ્રકૃતિ પ્રેમી, પ્રતાપભાઈ પટેલ, વીરાભાઇ હુંબલ, જમનભાઈ ડેકોરા, શૈલેષભાઈ જાની, ડો. દેવાંગીબેન મૈયડ, હરીશભાઈ લાખાણી, રમેશભાઈ ઠક્કર, સતીશભાઈ બેરા, યશવંતભાઈ ગોસ્વામી, ભરતભાઈ ટીલવા, સુરેશભાઈ દેસાઈ, ગિરીશભાઈ દેવડીયા, કૌશિકભાઇ સરધારા, ગોપાલભાઈ બાલધા, ભાવેશભાઈ સખીયા, મનીષભાઈ માયાણી, અમિતભાઈ દેસાઈ, સંજયભાઈ ટાંક, કૌશલભાઈ ખોયાણી વગેરે કાર્યરત છે.