મેસન ક્લબના ડિરેક્ટર સહિતનાઓ સામે ક્રાઈમ બ્રાંચમાં ફરિયાદ

અઢી લાખની લોન સામે 4.77 લાખ જમા કરાવ્યા છતાં 1.98 લાખ માંગી ત્રાસ દીધાનો આક્ષેપ

અઢી લાખની લોનના 4.77 લાખ વસૂલી લીધા પછી પણ લોનધારક અને તેના પરિવારને ત્રાસ આપી, ધાક ધમકીઓ આપવા અંગે મેસન ક્લબ ક્રેડીટ સોસાયટીના ડિરેક્ટર પરાગ અનિલ સોલંકી, મેનેજર મોન્ટુ વિનોદ ટાંકુ, વિવેક વિનોદ ટાંક, કર્મચારી નિશાંત દવે અને અન્યો વિરુદ્ધ ક્રાઈમ બ્રાંચમાં ફરિયાદ નોંધાઇ છે. જેની તપાસ ઈઓડબલ્યુને સોંપવામાં આવી છે. અન્ય લોન ધારકો સાથે પણ આરોપીઓ આવી રીતે જ લોનની ઉઘરાણી કરતા હોવાનું પણ ફરિયાદમાં જણાવાયું છે.રાજકોટના મિલપરાને રઘુવીર પાર્કમાં રહેતા દીપ્તીબેન દોશીએ નોંધાવેલી ફરિયાદમાં જણાવ્યું છે કે, 28 વર્ષ પહેલા મહેશ ત્રિવેદી સાથે લગ્ન થયા હતા. સંતાનમાં પુત્ર હાર્દિકની પ્રાપ્તી થઈ હતી. જે વડોદરામાં ખાનગી કંપનીમાં નોકરી કરે છે. પુત્રી રિદ્ધી પુનામાં આઇટી કંપનીમાં નોકરી કરે છે. પતિ સાથે વીસ વર્ષ પહેલાં છુટાછેડા થઈ ગયા ત્યારથી બંને સંતાનો સાથે રહે છે પુત્ર હાર્દિકે ઘરેથી કપડાનો વેપાર શરૂ કર્યો હતો. જે માટે પૈસાની જરૂર પડતાં નૈમિષ રાયચુરા મારફત પરાગ સોલંકીના સંપર્કમાં આવ્યા હતા. જેણે પોતાની મેસન ક્લબમાંથી અઢી લાખની વાર્ષિક 21 ટકા લેખે લોન આપવાની વાત કરી 2019માં લોન આપી હતી. તે વખતે પ્રોસેસ ફીના 45 હજાર અને પ્રથમ હપ્તાના 9818 કાપી લીધા હતા. લોનના નિયમિત હપ્તા ભરતા હતા પરંતુ કોવિડમાં તેની પુત્રવધુ પૂજાને પેરેલિસિસનો એટેક આવી જતાં હપ્તા ચૂકી ગયા હતા. આખરે 3.51 લાખ ભર્યા હતા. આમ છતાં પરાગે ચેક રીટર્નની કાર્યવાહી કરી હતી. કોર્ટે 1.24 લાખ રકમ જમા કરાવવાનું કહેતાં તેમ કર્યું હતું. ગત એપ્રિલ મહિનામાં બાકીની રકમ પણ ભરી હતી. ત્યાર પછી અવાર નવાર મેસન ક્લબમાં સ્ટેટમેન્ટ લેવા માટે જતાં ત્યારે ત્યાં હાજર સંજય વિવિધ બહાના બતાવી સ્ટેટમેન્ટ આપતો ન હતો. સાથોસાથ હજું લોનના રૂપિયા બાકી છે તેમ જણાવી 1.72 લાખની ઉઘરાણી કાઢી હતી. જામીનદારો વિરુદ્ધ પણ નિગોશિએબલની દરખાસ્ત કરી હતી. આ પછી 1.98 લાખ ભરો પછી જ એનઓસી મળશે તેમ કહીં દીધું હતું. લોનનું સેટલમેન્ટ કરવાનું કહેતાં એવું કહ્યું હતું કે રૂા.૨ લાખની લોનમાં લઇએ છીએ એટલું જ નહીં પરાગે ધમકી આપી હતી કે, તમને કોઈ સ્ટેટમેન્ટ આપવાનું નથી, તમારા ઘરની જપ્તી પણ કરવાની છે, રૂપિયા ન ભરો તો તમને જાનથી મારી નાંખીને પણ રૂપિયા તમારા ઘરના સભ્યો પાસેથી ભરાવવાના છે. ગત નવેમ્બર માસમાં મોન્ટુ, નિશાંત અને વિવેક તેમના ઘરે બેલીફ વગેરે સાથે આવી ધમકી આપી ગયા હતા કે રૂપિયા નહીં આપો તો તમને ઉઠાવી લેતા વાર નહીં લાગે. આરોપીઓ ખોટી રીતે ચેક રીટર્ન કરાવી ફરિયાદ કરાવી ત્રાસ આપતા હોવાથી આખરે ફરિયાદ નોંધાવી હતી.