નીચાણવાળા વિસ્તારો, નાળા, અંડરબ્રિજ અને ફાયર સ્ટેશનોની કમિશનર તુષાર સુમેરાએ સમીક્ષા કરી

ભારે વરસાદની આગાહીને પગલે રાજકોટ મહાનગરપાલિકા એલર્ટ મોડ પર

24×7 મોનીટરીંગ, રાહત-બચાવ માટે ટીમો સજ્જ, નાગરિકોને બિનજરૂરી બહાર ન નીકળવા અપીલ

હવામાન વિભાગ દ્વારા આગામી દિવસોમાં ભારે વરસાદની આગાહી જાહેર કરવામાં આવતાં રાજકોટ મહાનગરપાલિકા સંપૂર્ણ સતર્ક બની ગઈ છે. આજે સવારથી શહેરમાં સતત વરસાદ વરસી રહ્યો હોવાથી મહાનગરપાલિકાએ વરસાદી પરિસ્થિતિનો ધ્યાને લઇ તમામ વિભાગોને એલર્ટ મોડ પર મૂક્યા છે. મ્યુનિસિપલ કમિશનર તુષાર સુમેરાના માર્ગદર્શન હેઠળ શહેરના તમામ ઝોનના અધિકારીઓ, ઇજનેરો અને સંબંધિત શાખાના કર્મચારીઓ સતત ફિલ્ડમાં રહી પાણી નિકાલ સહિતની કામગીરીનું મોનીટરીંગ કરી રહ્યા છે. મ્યુનિસિપલ કમિશનર તુષાર સુમેરાએ રેલનગર ખાતે આવેલા નાળા તેમજ ભગવતીપરા વિસ્તારના નીચાણવાળા વિસ્તારોની સ્થળ મુલાકાત લઈને વરસાદી સ્થિતિની સમીક્ષા કરી હતી. તેમણે અધિકારીઓને પાણી ભરાવાની સમસ્યા સર્જાય તે પહેલાં જ જરૂરી પગલાં લેવા અને નાગરિકોને મુશ્કેલી ન પડે તે માટે તાત્કાલિક કાર્યવાહી કરવાની સૂચનાઓ આપી હતી. રાજકોટ મહાનગરપાલિકાની ડ્રેનેજ, એન્જિનિયરિંગ, ફાયર એન્ડ ઇમરજન્સી, ઇલેક્ટ્રિકલ સહિતની તમામ સંબંધિત શાખાઓની ટીમો સતત કાર્યરત છે. શહેરના મુખ્ય ડ્રેનેજ નેટવર્ક, સ્ક્રીન ચેમ્બર, સ્ટોર્મ વોટર લાઇન તથા અંડરબ્રિજોમાં પાણીનો પ્રવાહ સરળ રહે તે માટે સતત દેખરેખ રાખવામાં આવી રહી છે. જરૂરિયાત મુજબ પમ્પિંગ મશીનો સહિતના સાધનો પણ કાર્યરત રાખવામાં આવ્યા છે, જેથી પાણીનો ઝડપથી નિકાલ થઈ શકે.

કમિશનરે તમામ ઝોનલ અધિકારીઓને સ્પષ્ટ સૂચના આપી છે કે શહેરના કોઈપણ વિસ્તારમાં વરસાદને કારણે પાણી ભરાવું, વૃક્ષ ધરાશાયી થવું કે અન્ય કોઈપણ પ્રકારની સમસ્યા સર્જાય તો તેની તાત્કાલિક જાણ મેળવી ઝડપી પ્રતિસાદ આપવામાં આવે અને સમયસર નિરાકરણ લાવવામાં આવે. તમામ અધિકારીઓ અને કર્મચારીઓને સતત ફિલ્ડમાં રહી પરિસ્થિતિ પર નજર રાખવા તથા નાગરિકોની સુરક્ષા સુનિશ્ચિત કરવા સક્રિય કામગીરી કરવા પણ સૂચના આપવામાં આવી છે.

શેલ્ટર હોમની પણ કરાઈ સમીક્ષા
જો ભારે વરસાદને કારણે નીચાણવાળા વિસ્તારોમાંથી નાગરિકોને સ્થળાંતર કરવાની જરૂરિયાત ઊભી થાય તો તેમના માટે નિર્ધારિત કરાયેલા શેલ્ટર હોમની પણ મુલાકાત લેવામાં આવી હતી. અહીં રહેઠાણ, પીવાનું પાણી, પ્રકાશ વ્યવસ્થા અને અન્ય પ્રાથમિક સુવિધાઓની સમીક્ષા કરીને તમામ વ્યવસ્થાઓ કાર્યરત રહે તે સુનિશ્ચિત કરવામાં આવ્યું હતું. તમામ વિભાગો વચ્ચે સંકલન સાથે 24 કલાક કામગીરી ચાલી રહી છે અને વરસાદી પરિસ્થિતિ સામાન્ય ન બને ત્યાં સુધી સતત મોનીટરીંગ ચાલુ રહેશે.