ઓખા અને વેરાવળથી નવી એસી ટ્રેન મંજૂર; ગરીબ રથ પણ હરિદ્વાર સુધી લંબાવાઈ
પૂર્વ સાંસદ રામભાઈ મોકરીયા અને પૂર્વ મંત્રી ગોવિંદ પટેલના પ્રયાસોથી હરિદ્વાર માટે નવી ટ્રેનો મંજૂર
- Advertisement -
સૌરાષ્ટ્રના ધર્મપ્રેમી મુસાફરો અને ગંગા સ્નાન તેમજ ભાગવત સપ્તાહ માટે હરિદ્વાર જતા શ્રદ્ધાળુઓ માટે મોટા રાહતના સમાચાર સામે આવ્યા છે. રેલવે મંત્રાલય દ્વારા ઓખા-હરિદ્વાર અને વેરાવળ-હરિદ્વાર વચ્ચે નવી એસી એક્સપ્રેસ ટ્રેનો શરૂ કરવા તેમજ બાંદ્રા-દિલ્હી સરાય રોહિલ્લા ગરીબ રથ એક્સપ્રેસને હરિદ્વાર સુધી લંબાવવાની સત્તાવાર મંજૂરી આપી દેવામાં આવી છે. દિવાળી પછી સૌરાષ્ટ્રવાસીઓને અઠવાડિયામાં હરિદ્વાર માટે કુલ ૪ ટ્રેનની સુવિધા ઉપલબ્ધ બનશે, તેમ પૂર્વ સાંસદ રામભાઈ મોકરિયા અને પૂર્વ મંત્રી ગોવિંદભાઈ પટેલે એક પ્રેસ યાદીમાં જણાવ્યું છે.
હાલ સૌરાષ્ટ્રમાંથી હરિદ્વાર તરફ જતા મુસાફરોને લાંબા સમય સુધી ટ્રેનમાં કન્ફર્મ સીટ મળતી નહોતી. છેલ્લા બે વર્ષથી સ્થાનિક અગ્રણીઓ દ્વારા રેલવે મંત્રી અશ્વિની વૈષ્ણવ અને રેલવે બોર્ડ સમક્ષ આ અંગે સતત રજૂઆતો અને પત્રવ્યવહાર કરવામાં આવી રહ્યો હતો. રેલવે તંત્ર દ્વારા કોમર્શિયલ ફિઝિબિલિટી રિપોર્ટ મેળવ્યા બાદ આ માંગણી સ્વીકારી લેવામાં આવી છે.
રેલવે બોર્ડના સત્તાવાર પરિપત્ર મુજબ, આ નવી ટ્રેનો ૨૨ એલએચબી (LHB) કોચ સાથે દોડાવવામાં આવશે. જેમાં ૨૦ ઇકોનોમી એસી કોચ અને ૨ પાવર કાર (LWLRRM) સામેલ રહેશે, જેનાથી મુસાફરોને આરામદાયક અને કિફાયતી મુસાફરીનો લાભ મળશે.
- Advertisement -
૧. વેરાવળ – હરિદ્વાર – વેરાવળ એસી એક્સપ્રેસ (ટ્રેન નં. ૧૪૩૨૫ / ૧૪૩૨૬):
- આવર્તન (વાર): આ ટ્રેન અઠવાડિયામાં બે દિવસ દોડશે.
- હરિદ્વારથી દર બુધવાર અને રવિવારે.
- વેરાવળથી દર ગુરુવાર અને સોમવારે.
- સમય: વેરાવળથી સવારે ૧૧:૦૫ કલાકે ઉપડી બીજા દિવસે સાંજે ૧૮:૦૦ કલાકે હરિદ્વાર પહોંચશે. વળતી મુસાફરીમાં હરિદ્વારથી સવારે ૦૪:૦૦ કલાકે ઉપડી બીજા દિવસે સવારે ૦૮:૧૫ કલાકે વેરાવળ પહોંચશે.
- મુખ્ય સ્ટોપેજ: કેશોદ, જૂનાગઢ, જેતલસર, ગોંડલ, રાજકોટ, વાંકાનેર, સુરેન્દ્રનગર, વિરમગામ, મહેસાણા, પાલનપુર, આબુ રોડ, અજમેર, જયપુર, દિલ્હી, ગાઝિયાબાદ, મેરઠ, રૂરકી.
૨. ઓખા – હરિદ્વાર – ઓખા એસી એક્સપ્રેસ (ટ્રેન નં. ૧૪૩૨૭ / ૧૪૩૨૮):
- આવર્તન (વાર): આ ટ્રેન સાપ્તાહિક (અઠવાડિયે ૧ દિવસ) દોડશે.
- હરિદ્વારથી દર શુક્રવારે.
- ઓખાથી દર શનિવારે.
- સમય: ઓખાથી સવારે ૧૦:૨૦ કલાકે ઉપડી બીજા દિવસે સાંજે ૧૮:૦૦ કલાકે હરિદ્વાર પહોંચશે. વળતી મુસાફરીમાં હરિદ્વારથી સવારે ૦૪:૦૦ કલાકે ઉપડી બીજા દિવસે સવારે ૦૮:૧૫ કલાકે ઓખા પહોંચશે.
- મુખ્ય સ્ટોપેજ: દ્વારકા, ખંભાળિયા, જામનગર, હાપા, રાજકોટ, વાંકાનેર, સુરેન્દ્રનગર, વિરમગામ, મહેસાણા, પાલનપુર, આબુ રોડ, અજમેર, જયપુર, દિલ્હી, ગાઝિયાબાદ, મેરઠ, રૂરકી.
૩. બાંદ્રા (ટી) – હરિદ્વાર ગરીબ રથ એક્સપ્રેસ (૧૨૨૧૬ / ૧૨૨૧૫):
- બાંદ્રા ટર્મિનસથી દિલ્હી સરાય રોહિલ્લા વચ્ચે ચાલતી ગરીબ રથ એક્સપ્રેસને હરિદ્વાર સુધી લંબાવવામાં આવી છે. જે હરિદ્વારથી સોમ, મંગળ, ગુરુ અને શનિવારે તેમજ બાંદ્રાથી મંગળ, બુધ, શુક્ર અને રવિવારે દોડશે.
