ફરાર બુટલેગર યાકુબ મોટાણી, પુત્ર કોનન વિરૂદ્ધ ઓર્ગેનાઇઝ્ડ ક્રાઇમની કલમનો ઉમેરો

રાજ્યના ટોપ 10 બુટલેગરની યાદીમાં આવતા અને દારૂની હેરાફેરી, મર્ડર, લૂંટ સહિત 55થી વધુ ગુનામાં પકડાઇ ચૂકેલા રાજકોટના બુટલેટર વિરૂદ્ધ રાજકોટ પોલીસને આકરી કાર્યવાહી

રાજકોટ ક્રાઇમ બ્રાન્ચ દ્વારા બુટલેગર વિરૂદ્ધ ઓર્ગેનાઇઝ્ડ ક્રાઇમનો સૌરાષ્ટ્રમાં પ્રથમ કેસ: આ કાયદા હેઠળ દોષિત ઠરે તો આજીવન કેદ, રૂ. 10 લાખના દંડની જોગવાઇ હોવાથી લીસ્ટેટ બુટલેગરોમાં ફફડાટ

ખાસ-ખબર ન્યૂઝ રાજકોટ, તા.13

ગુજરાતમાં દારૂબંધીના કડક અમલ માટે વર્ષોતી પ્રયત્નશીલ પોલીસ અને સરકારને લેશ માત્ર સફળતા મળી નથી. જોકે નવા કાયદાની જોગવાઇઓ મુજબ દારૂની હેરાફેરી પર મહદઅંશે અંકુશ આવી શકે એવી આશા જાગી છે. રાજકોટ પોલીસની ક્રાઇમ બ્રાન્ચની ટીમે પાંચ દિવસ પહેલાં રાજકોટ-અમદાવાદ હાઇવે પરથી બાતમી આધારે દારૂ-બિયરનો જથ્થો લઇને આવતા રાજકોટના બે શખ્સની ટ્રક સાથે ધરપડક કરી હતી. દારૂનો આ જથ્થો રાજકોટમાં બજરંગવાડી વિસ્તારમાં રહેતા કુખ્યાત બુટલેગર યાકુબ મુસા મોટાણીએ સેલવાસ (દાદરાનગર હવેલી) થી રાજકોટ માટે રવાના કર્યાની આરોપીએ આપેલી કબૂલાતના પગલે પોલીસે નવા કાયદા મુજબની કલમ 111 મુજબ યાકુબ અને તેના પુત્ર વિરૂદ્ધ ઓર્ગેનાઇઝ્ડ ક્રાઇમની કલમનો ઉમેરો કર્યો છે. બુટલેગર વિરૂઘ્ધ ઓર્ગેનાઇઝ્ડ ક્રાઇમનો સૌરાષ્ટ્રમાં પ્રથમ અને રાજ્યમાં આ બીજો કેસ છે. પોલીસને આ કાર્યવાહીથી બુટલેગરોમાં ફફડાટ ફેલાયો છે.

કેસની વિગત મુજબ, ક્રાઇમ બ્રાન્ચના ડીસીપી પાર્થરાજસિંહ ગોહિલ, પીઆઇ એમ. આર. ગોંડલીયાના માર્ગદર્શન હેઠળ પીએસઆઇ એ. એન. પરમાર તથા સ્ટાફે પાંચેક દિવસ પહેલાં રાજકોટ- અમદાવાદ હાઇવે પર બાતમીના આધારે એક ટ્રકને અટકાવ્યો હતો. ટ્રકની તલાશી લેતા
ટ્રકમાંથી પ્લાસ્ટિકના કેરબામાં કેમિકલના નામે સિફત પૂર્વક પેક કરેલો રૂપિયા 3.58 લાખની કિંમતનો કિંમતનો દારૂ-બિયરનો જથ્થો મળી આવ્યો હતો.
પોલીસે ટ્રક, દારૂ સહિત 1.57 લાખના મુદ્દામાલ સાથે રાજકોટના લાલચંદ ગગનદાસ અડવાણી અને શોયબ અહેમદ મોટાણીની ધરપકડ કરી હતી. પકડાયેલા બન્ને શખ્સે વિશેષ પૂછરપરછમાં

દારૂનો ઉપરોક્ત જથ્થો રાજકોટમાં બજરંગવાડી વિસ્તારમાં મોમીન સોસાયટીમાં રહેતા કુખ્યાત બુટલેગર યાકુબ મુસા મોટાણી અને તેના પુત્ર કોનનએ સેલવાસ (દાદરાનગર હવેલી) થી રાજકોટ રવાના કર્યાની કબૂલાત આપી હતી.

નોંધનિય છે કે, યાકુબ મુસા મોટાણી બે દસકાથી દારૂની હેરાફેરીમાં ગળાડૂબ છે અને તેના વિરૂઘ્ધ રાજકોટ સહિત રાજ્યના અનેક શહેરમાં દારૂની હેરાફેરી, લૂંટ, મર્ડર સહિત 55 થી વધુ ગુના નોંધાયેલા છે. નવા કાયદા મુજબ આવી પ્રતિબંધિત ચીજવસ્તુઓની હેરાફેરી કરતા અપરાધીઓ વિરૂદ્ધ ભારતીય ન્યાય સંહિતાની કલમ 111 હેઠળ ઓર્ગેનાઇઝ્ડ ક્રાઇમની આકરી કાર્યવાહી થઇ શકે છે.

રાજકોટના બુટલેગર યાકુબ મોટાણી વિરૂઘ્ધ 55 થી વધુ ગુના છે અને નવા કાયદાની જોગવાઇ હેઠળ તેની સામે ઓર્ગેનાઇઝ્ડ ક્રાઇમ મુજબ કાર્યવાહી થઇ શકે તેમ હોવાથી તપાસ અધિકારી એ. એન. પરમાર દ્વારા ઉચ્ચ અધિકારીઓ તથા કાયદા નિષ્ણાંતનું માર્ગદર્શન લેવાયું હતું. ત્યાર બાદ ગઇ કાલે સોમવારે યાકુબ મોટાણી અને તેના પુત્ર કોનન વિરૂઘ્ધ નવા કાયદા હેઠળ ઓર્ગેનાઇઝ્ડ ક્રાઇમની કલામનો ઉમેરો કર્યો છે. નોંધનીય છે કે આ કાયદામાં આજીવન કેદની સજા, 10 લાખના દંડ સુધીની જોગવાઇ છે.

યાકુબની પત્ની, પુત્ર, સાળી સામે પણ લૂંટ, મર્ડર જેવા ગંભીર ગુના

શહેરના જામનગર રોડ પર બજરંગવાડીમાં મોમીન સોસાયટીમાં રહેતો બુટલેગર યાકુબ મોટાણી બે દસકા કરતા વધારે સમયથી દારૂની હેરાફેરીમાં સક્રીય છે. દમણ અને મહારાષ્ટ્રમાં તેનું જબરું નેટવર્ક છે અને ત્યાં રહીને રાજકોટ સહિત ગુજરાતના વિવિધ શહેર-જિલ્લામાં દારૂ સપ્લાય કરે છે. યાકુબની પત્ની બિલ્કીશ સામે પણ ત્રિભોવન ભીમજી જ્વેલર્સના કર્મચારી સાથે ઝપાઝપડી કરી 1.48 કરોડના ઘરેણાની લૂંટ ઉપરાંત પોલીસની ફરજમાં રૂકાવટ, પોપટપરામાં મહિલાની હત્યા, એરપોર્ટ રોડ પર વૃધ્ધને આંતરી માર મારવા સહિત 6 ગુના છે. લૂંટના ગુનામાં બિલકીશ સાથે તેના પતિ યાકુબ અને સગીર પુત્રનું નામ પણ હતું. જ્યારે મર્ડરના કેસમાં બિલકીશ ઉપરાંત તેના પતિ યાકુબ, અને યાકુબની સાળી પરવીન સામે કાર્યવાહી થઇ હતી. બિલકીશ એક વખત પાસા તળે જેલવાસ ભોગવી ચૂકી છે.

નામચીન યાકુબ મોટાણી, તેના પરિવાર વિરૂદ્ધ ગુજસીટોકની કાર્યવાહીના સંકેત

બુટલેગર યાકુબ મુસા મોટાણી દારૂની હેરાફેરીનું રાજ્યવ્યાપી નેટવર્ક ધરાવે છે. યાકુબની પત્ની, પુત્ર સામે પણ છેલ્લા 10 વર્ષમાં ગંભીર ગુના નોંધાઇ ચૂક્યા છે. ગુજસીટોકના કાયદાની જોગવાઇ મુજબ યાકુબ અને ગુનાહિત કૃત્યમાં સામેલ તેની પત્ની સહિતના શખ્સો વિરૂદ્ધ ઓર્ગેનાઇઝ્ડ ક્રાઇમ (સંગઠિત) હેઠળ કાર્યવાહી થઇ શકે છે કે કેમ? એ અંગે પણ ઉચ્ચ પોલીસ અધિકારી, કાનૂની તજજ્ઞોનું માર્ગદર્શન મેળવાઇ રહ્યાની સૂત્રોમાંથી માહિતી મળી રહી છે.