ગુજરાતમાં સૌપ્રથમ વખત ISISના આતંકવાદીઓને સજા આપવામાં આવી છે. રાજકોટના બે આતંકવાદી સગા ભાઈઓને સ્પેશિયલ NIA કોર્ટે 10-10 વર્ષની સખત કેદની સજા ફટકારી છે.
યાત્રાધામ ચોટીલા મંદિરને ઉડાવી દેવાનું ષડયંત્ર રચનાર બે આતંકવાદી સગા ભાઈઓને સ્પેશિયલ NIA કોર્ટે દસ- દસ વર્ષની સજા ફટકારી છે. ગુજરાતમાં ISISના આતંકવાદીઓને સજા આપી હોય તેવો આ પહેલો કેસ છે. મહત્વનું છે કે, રાજકોટના બન્ને ભાઈઓ સિરિયા ખાતે ISISના સંપર્કમાં હતા.
- Advertisement -
બે આતંકવાદી સગા ભાઈઓ સામે આકરી કાર્યવાહી
સ્પેશિયલ NIA કોર્ટે સિરિયા ખાતે ISISના સંપર્કમાં રહેલા રાજકોટના બે સગાભાઈઓ વસીફ આરીફ રામોડીયા અને નઇમ આરીફ રામોડીયાઓ સામે આકરી કાર્યવાહી કરી છે. બંને ISISના આતંકવાદીઓ હોવાથી તેમની સામે 8 હજાર જેટલા પાનાની ચાર્જશીટ દાખલ કરાઈ હતી. જેમાં બંનેની ભૂમિકા સામે આવી હતી. જે બાદ ન્યાયાધીશ સુભદ્રાબેન બક્ષીએ બંને આતંકી ભાઈઓને 10-10 વર્ષની સજા ફટકારી છે.
ગુજરાત ATSએ કરી હતી ધરપકડ
અત્રે ઉલ્લેખનીય છે કે, રાજકોટના વસીમ આરીફ રામોડીયા અને નઇમ આરીફ રામોડીયાને ગુજરાત ATSએ ભાવનગર અને રાજકોટથી ઝડપી પાડ્યા હતા. બંને પાસેથી બોમ્બ બનાવવાની સામગ્રી, ડમી સીમકાર્ડ, ગન પાઉડર સહિત અનેક પુરાવા મળી આવ્યા હતા.
તપાસમાં થયો હતો ચોંકાવનારો ખુલાસો
આ સાથે તપાસમાં એવું પણ સામે આવ્યું હતું કે બંનેએ ચોટીલા ચામુંડા માતાજીના મંદિર ઉડાવી દેવા ‘લોન વુલ્ફ એટેક’ નામના ખતરનાક પ્લાન બનાવ્યો હતો. તો બંને આતંકવાદીઓ તાલીમ લેવા માટે સિરીયા જવાના હતા. જોકે, ષડયંત્ર સફળ થાય એ પહેલાં જ તેઓને ઝડપી લેવામાં આવ્યા હતા.
