રાષ્ટ્રીય-આંતરરાષ્ટ્રીય ટૂર્નામેન્ટમાં મેડલ જીતનારા ખેલાડીઓને ગ્રેડ-સીની જગ્યાએ ગ્રેડ-વનની નોકરી અપાશે
બિહારના મુખ્યમંત્રી નીતિશકુમારે પોતાના રાજ્યના પ્રતિભાશાળી ખેલાડીઓ માટે સરકારી નોકરીનો પટારો ખોલતાં મહત્ત્વની જાહેરાત કરી છે. હવેથી બિહારનો જે ખેલાડી રાષ્ટ્રીય અને આંતરરાષ્ટ્રીય સ્તરની ટૂર્નામેન્ટમાં મેડલ જીતશે તેને બિહારની સરકાર નોકરી આપશે. નીતિશકુમારે કહ્યું કે નોકરી પણ ‘ગ્રેડ વન’ સ્તરની આપવામાં આવશે. આ એલાનથી ખેલાડીઓની ખુશીનો કોઈ પાર રહ્યો નથી.
- Advertisement -
નીતિશકુમારે જાહેરાત કરી કે મેડલ જીતનારા ખેલાડીઓને બિહારના વહીવટી તંત્ર તેમજ બિહાર પોલીસમાં ગ્રેડ-1ની નોકરી આપવામાં આવશે. પટણામાં પાટલીપુત્ર સ્પોર્ટસ સંકુલમાં આયોજિત 18મા રાષ્ટ્રીય આંતર જિલ્લા જુનિયર એથ્લેટિક્સ મીટનું ઉદ્ઘાટન કરતાં નીતિશે કહ્યું કે રાજ્ય સરકાર વતી રાષ્ટ્રીય અને આંતરરાષ્ટ્રીય રમત આયોજનોમાં ભાગ લઈને મેડલ જીતનારા તેમજ રાજ્યનું ગૌરવ વધારનારા ખેલાડીઓને નોકરી આપવામાં આવશે.
તેમણે વધુમાં ઉમેર્યું કે અત્યાર સુધી રાજ્ય સરકાર મેડલ જીતનારા ખેલાડીઓને ગ્રુપ-સીની નોકરી આપી રહી હતી પરંતુ હવે ગ્રેડ-1ની નોકરી આપશે. રાજ્ય સરકાર રાજગીરમાં એક આધુનિક આંતરરાષ્ટ્રીય રમત સ્ટેડિયમ અને સ્પોર્ટસ યુનિવર્સિટીનું નિર્માણ કરી રહી છે અને આ માટષ 740 કરોડ રૂપિયાની જોગવાઈ પણ કરાઈ છે.
