વાંકાનેર નગરપાલિકાને સુપરસીડ કરાઈ

 પાલિકાના પદાધિકારીઓની ચેમ્બરો સીલ, તમામ રેકર્ડ જપ્ત કરાયું

ખાસ-ખબર સંવાદદાતા
વાંકાનેર નગરપાલિકાની ચૂંટણી બાદ શાસકો કોઈને કોઈ રીતે વિવાદમાં રહ્યા છે. શરૂઆતમાં પ્રમુખ પદ માટે જીતુ સોમાણીનું ગ્રુપ તથા મોરબી જીલ્લા ભાજપના પદાધિકારીઓ વચ્ચે ખટરાગ પેદા થયો હતો અને વિવાદ વકરતો રહ્યો હતો ત્યારબાદ નગરપાલિકા સુપરસીડ કરવાની હિલચાલ વચ્ચે રાજકીય ગરમાવો આવ્યો હતો.

વાંકાનેર નગરપાલિકાના પદાધિકારીઓ દ્વારા શહેરના વિકાસ કામોની કામગીરીમાં અણઆવડત, ફંડ હોવા છતાં વિકાસ કામો નહીં કરવામાં આવતાં તેમજ અનેક ગ્રાંટ વણવપરાયેલી રહી કે પરત ગઈ જેવા વિવિધ મુદ્દે પાલિકાના ચૂંટાયેલા સભ્યોને સરકાર દ્વારા નોટીસ પાઠવાઈ હતી પરંતુ નોટીસના યોગ્ય જવાબ ન મળતાં રાજ્ય સરકારના શહેરી વિકાસ વિભાગ દ્વારા નગરપાલિકાને સુપરસીડ કરવામાં આવી છે જેથી ઈન્ચાર્જ ચીફ ઓફિસર સંદીપસિંહ ઝાલા શનિવારે મોડી રાત્રીના વાંકાનેર પાલિકા કચેરીએ પહોંચ્યા હતા જ્યાં રેકર્ડ અને તમામ સાહિત્ય કબજે લેવામાં આવ્યું છે તેમજ પ્રમુખ સહિતના પદાધિકારીઓની ચેમ્બર સીલ કરવામાં આવી હતી. વાંકાનેર પાલિકા સુપરસીડ થતા હવે સરકાર દ્વારા વહીવટદારની નિમણુંક કરવામાં આવશે જે આગામી પાલીકાની ચૂંટણી સુધી પાલીકાની તમામ કામગીરી સંભાળશે.