કથામાં જતા દંપતીને આડેધડ ધોકા મારતા પત્નીનું ઘટનાસ્થળે, પતિનું સારવારમાં મોત : બેને ઇજા
નશામાં ધૂત થઇ બેવડી હત્યાને અંજામ આપનાર અશોકને આટકોટ પોલીસે ઝડપી લીધો
- Advertisement -
રાજકોટ જીલ્લાના જસદણ તાલૂકાના જંગવડ ગામે ડબલ મર્ડરની ઘટના બનતાં ચકચાર મચી જવા પામી છે કોળી યુવાન અને તેના સગર્ભા પત્નિ પર તેના જ કૌટુંબિક મોટાબાપુના દિકરાએ ધોકાના ઘા માથામાં ફટકારતાં પત્નિનું ઘટના સ્થળે જ અને પતિનું રાજકોટ ખાતે સારવારમાં મોત નિપજ્યું હતું આ બંનેને બચાવવા માટે વચ્ચે પડેલા તેમના ભાભી અને ભત્રીજાના પત્નિને પણ ઇજા થઇ હતી હત્યાનો ભોગ બનનારના ભાભીએ કહ્યું હતું કે અગાઉ અમે કાકાજી લઘરાભાઇ ઘોડકીયાના મકાનમાં રહેતાં હતાં ત્યારે કુટુંબી જેઠ અશોક ઉર્ફે સૂડો વારંવાર માથાકુટ કરી ગાળો દઇ મારવાની ધમકી આપતો હોઇ અમે મકાન ખાલી કરી ભાડે રહેવા જતાં રહ્યાં હોઇ તેનું મનદુઃખ રાખી ગુરૂવારે ધોકા સાથે આવી તૂટી પડયો હતો.
પ્રાપ્ત માહિતી મુજબ જંગવડના લીમડા ચોકમાં રહેતાં પ્રકાશભાઇ બચુભાઇ ઘોડકીયા ઉ.35 અને તેમના પત્નિ વિલાસબેન ઘોડકીયા ઉ.32 ગઇકાલે બપોરે ગામના ધારેશ્વર મંદિરે કથા ચાલુ હોઇ તે સાંભળવા જવા ઘરને તાળા મારતા હતા ત્યારે અચાનક ગામમાં રહેતો પ્રકાશભાઇના મોટા બાપુનો દિકરો અશોક ઉર્ફે સૂડો ધોકો લઇને આવ્યો હતો અને પતિ-પત્નિ પર તૂટી પડયો હતો આડેધડ ઘા ફટકારતા દેકારો થતાં કરીયાણાની દુકાન ધરાવતાં પ્રકાશભાઇના ભત્રીજાના પત્નિ પુરીબેન ભૂપતભાઇ ઘોડકીયા તેમજ પ્રકાશભાઇના ભાભી મુક્તાબેન ઉર્ફ લાભુબેન જેન્તીભાઇ ઘોડકીયા દોડી આવ્યા હતા તો અશોકે આ બંનેને પણ ધોકાના ઘા ફટકાર્યા હતાં આ હુમલામાં ગંભીર ઇજા થતા વિલાસબેનનું ઘટના સ્થળે જ મોત થયુ઼ હતું જ્યારે પ્રકાશભાઇ, મુક્તાબેન, પુરીબેનને સારવાર માટે ખસેડાયા હતાં અહીં રાજકોટ સિવિલ હોસ્પિટલમાં આજે સવારે સારવાર દરમિયાન પ્રકાશભાઇ ઘોડકીયાનું પણ મૃત્યુ થતાં બનાવ ડબલ મર્ડરમાં પરીણમ્યો હતો. આ બનાવમાં આટકોટ પોલીસે જંગવડ રહેતાં હત્યાનો ભોગ બનનાર દંપતિના ભાભી લાભુબેન જેન્તીભાઇ ઘોડકીયાની ફરિયાદ પરથી જંગવડમાં જ રહેતાં અશોક ઉર્ફે સુડો ગોવિંદભાઇ ઘોડકીયા વિરૂધ્ધ ગુનો નોંધ્યો છે.
ફરિયાદમાં જણાવ્યું હતું કે માાર પતિ ત્રણ ભાઇઓ છે. જેમાં સૌથી નાના પ્રકાશભાઇ છે ગુરૂવારે બાજુમાં રહેતાં લાલજીભાઇની દિકરી ઇલાનો મને ફોન આવ્યો હતો અને તેમાંથી મારા દિકરા વ્રજે મારી સાથે વાત કરી કહ્યું હતું કે – હું પ્રકાશકાકા સાથે સપ્તાહ-કથામાં જાઉ છું. જેથી મેં મારા દિકરાને મંદિર થોડુ દુર હોય ત્યાં જવાની ના પાડી હતી આ પછી હું દિકરા વ્રજને લેવા મારા દિયર પ્રકાશભાઇના ઘરે જવા નીકળી હતી ઘરનું બારણુ ખખડાવતાં મારા દેરાણી વિલાસબેન બહાર આવેલ ત્યાં મારો કૌટુંબિક જેઠ અશોક ઉર્ફે સુડો લાકડાના ધોકા સાથે હાજર હતો. તે મોટે મોટેથી ગાળો બોલતો હતો જેથી મેં અને મારા દેરાણી વિલાસબેને તેને ગાળો બોલવાની ના પાડી હતી આથી અશોકે કે-આજે તમને બધાને મારી નાંખવા છે. આ પછી તેણે ધોકાથી હુમલો કરી મને માથામાં મારવા જતાં મેં હાથ રાખી દેતાં મારા દેરાણી વચ્ચે પડતાં તેના માથામાં લાકડાના ઘા ફટકારી દીધા હતાં. અમે રાડા રાડ કરતાં દિયર પ્રકાશભાઇ ઘર અંદરથી બહાર આવતાં તેને પણ માથામાં લાકડાના ઘા ફટકારી દીધા હતાં આ વખતે મારા ભત્રીજા ભૂપતના પત્નિ પુરીબેન વચ્ચે પડતાં અશોકે તેને પણ માથામાં ધોકો ફટકારતાં તે પણ જમીન પર પડી ગયા હતાં. દરમિયાન મારા જેઠ રમેશભાઇ આવી જતાં અશોક ભાગી ગયો હતો. મને મારા દિયર, દેરાણી, ભત્રીજાના પત્નિે રિક્ષા મારફત આટકોટ કે. ડી. પી. હોસ્પિટલમાં લઇ ગયા હતાં. જ્યાં મારા દેરાણીને ડોક્ટરે મૃત જાહેર કર્યા હતાં. જ્યારે પુરીબેનને અને મારા દિયર પ્રકાશભાઇને વધુ સારવાર માટે રાજકોટ લઇ ગયા હતાં આ બનાવનું કારણ એવું છે કે અમે મારા કાકાજી સસરા લઘરાભાઇ ઘોડકીયાના મકાને અગાઉ રહેતાં હતાં ત્યારે કુટુંબી જેઠ અશોક ઉર્ફે સુડો અમને અવાર-નવાર માથાકુટ કરી ગાળો દેતો હતો. અગાઉ મારવાની ધમકી પણ આપી હતી. જેથી અમે મકાન ખાલી કરી નાંખ્યું હતું અને ભાડે રહેવા જતાં રહ્યા હતાં. આ કારણે અશોકને ગમ્યું નહોતું. ગુરૂવારે તે દિયર પ્રકાશભાઇના ઘરે ધોકા સાથે આવી ગાળો બોલતો હોઇ મેં અને મારા દેરાણીએ ના પાડતાં તેણે આજે તો તમને બધાને મારી નાંખવા છે કહી ધોકાના ઘા ફટકાર્યા હતાં દેરાણીનું આટકોટમાં અને દિયરનું રાજકોટમાં મોત થયું હતું આટકોટ પીઆઇ આર. એમ. રાઠોડ અને ટીમે ગુનો દાખલ કરી આરોપી અશોક ઉર્ફે સૂડોને સકંજામાં લઇ લીધો હતો. ડબલ મર્ડરની આ ઘટનાથી આટકોટ-જસદણ પંથકમાં અરેરાટી વ્યાપી ગઇ છે.
- Advertisement -
હત્યાનો ભોગ બનનાર વિલાસબેનને સારા દિવસો જતા હતા
હત્યાનો ભોગ બનનાર પ્રકાશભાઇ હીરા ઘસવાનું કામ કરતાં હતાં પતિ સાથે હત્યાનો ભોગ બનનાર વિલાસબેનના બે વર્ષ પહેલા જ લગ્ન થયા હતાં. તેણીને હાલમાં સારા દિવસો જતાં હતા અને ટુંક સમયમાં સિમંતનો પ્રસંગ યોજવાનો હતો. પરંતુ પરિવારમાં એક નવા સદસ્યનું આગમન થાય એ પહેલા જ સગર્ભા માતાની હત્યા થઇ ગઇ હતી હત્યાનો ભોગ બનેલા વિલાસબેન અને ફરિયાદી બનેલા તેમના જેઠાણી લાભુબેન બંને સગા બહેનો થાય છે.
કાકા નિઃસંતાન હોઇ પ્રકાશને મકાન આપી દેતા અશોક માથાકૂટ કરતો હતો
જંગવડ ગામે કૌટુંબિક ભાઈ ભાભી ઉપર હુમલો કરી મોતને ઘાટ ઉતારનાર અશોક ઉર્ફે સુડો રીઢો ગુનેગાર છે કૌટુંબિક કાકાની મિલકત માટે આ હત્યા થઈ હોવાનું સામે આવી રહ્યું છે. પ્રકાશના કાકા લઘરાભાઈ મંગળાભાઈ નિઃસંતાન હોઇ પ્રકાશ તેમને પિતાની જેમ સાચવતો હતો. આથી લધરાભાઈએ તેમનું મકાન અને બેંકમાં બચત કરેલી રકમ પ્રકાશને આપતા અશોકને માઠુ લાગ્યું હતું. આ બાબતે અગાઉ પણ બોલાચાલી થઈ હતી જે હવે બબ્બે હત્યામાં પરિણમી હતી. પોલીસ વિધિવત ધરપકડ કરી વિશેષ વિગતો જાહેર કરશે.



