પ્રમુખસ્વામી મહારાજના 13 ગ્રંથના જીવનચરિત્રને ગિનીસ વર્લ્ડ રેકોર્ડ્સઃ વિશ્વનું સૌથી વિસ્તૃત જીવનચરિત્ર બન્યું

8,848 પાનાં અને 21.46 લાખ શબ્દ ધરાવતા બૃહદ્ ગ્રંથશ્રેણી માટે મહંતસ્વામી મહારાજને લંડનમાં સન્માનપત્ર અર્પણ

આદર્શજીવનદાસ સ્વામી દ્વારા 38 મહિનાના સંશોધન બાદ રચનાઃ અત્યાર સુધીમાં 3.10 લાખથી વધુ નકલ વેચાઈ

બીએપીએસ સ્વામિનારાયણ સંસ્થાના પાંચમા આધ્યાત્મિક ગુરુ પ્રમુખસ્વામી મહારાજના (૧૯૨૧-૨૦૧૬) ૯૪ વર્ષના દિવ્ય જીવનકાર્ય અને વૈશ્વિક પ્રદાનને આલેખતા બૃહદ્ જીવનચરિત્ર ‘બ્રહ્મસ્વરૂપ પ્રમુખસ્વામી મહારાજઃ વિસ્તૃત જીવનચરિત્ર’ ને ગિનીસ વર્લ્ડ રેકોર્ડ્સ દ્વારા સત્તાવાર માન્યતા એનાયત કરવામાં આવી છે. સંસ્કૃતના વિદ્વાન અને પીએચ.ડી. પૂજ્ય આદર્શજીવનદાસ સ્વામી દ્વારા એકલે હાથે રચાયેલા આ ગ્રંથને ‘એક જ લેખક દ્વારા લખાયેલા વિશ્વના સૌથી વિસ્તૃત જીવનચરિત્ર’ તરીકે ઘોષિત કરવામાં આવ્યો છે. આ ગ્રંથશ્રેણી ૧૩ ગ્રંથોમાં વિસ્તરેલી છે, જેમાં ૮,૮૪૮ પાનાં અને ૨૧,૪૬,૪૪૭ (૨૧.૪૬ લાખથી વધુ) શબ્દો સમાવિષ્ટ છે. આ ઐતિહાસિક સન્માન રવિવાર, ૪ ઑક્ટોબરના રોજ લંડનના પ્રખ્યાત ઘટઘ અરીના વેમ્બલી ખાતે પ્રગટ ગુરુહરિ મહંતસ્વામી મહારાજના ૯૩મા પ્રાગટ્ય પર્વની ભવ્ય ઉજવણી દરમિયાન એનાયત કરાયું હતું. ગિનીસ વર્લ્ડ રેકોર્ડ્સના વરિષ્ઠ નિર્ણાયક કાર્લ સેવિલે મંચ પરથી ૧૧,૦૦૦ ભાવિકો અને વિશ્વભરના લાખો ઓનલાઇન દર્શકોની ઉપસ્થિતિમાં આ પ્રમાણપત્ર અર્પણ કર્યું હતું. કાર્લ સેવિલે જણાવ્યું કે, પૃથ્વી પર આજ સુધી કોઈએ હાંસલ ન કરી હોય તેવી આ અનોખી સાહિત્યિક સિદ્ધિને વૈશ્વિક મંચ પર પ્રમાણિત કરવી એ ગૌરવપૂર્ણ બાબત છે.

આ મહાગ્રંથમાં પ્રમુખસ્વામી મહારાજના ૧૯૨૧માં વડોદરાના ચાણસદ ગામે થયેલા જન્મથી માંડીને ૨૦૧૬માં સારંગપુર ખાતે થયેલા અક્ષરધામગમન સુધીની સમગ્ર જીવનયાત્રાનું સાતત્યપૂર્ણ આલેખન કરાયું છે. તેમના આધ્યાત્મિક નેતૃત્વ, નમ્રતા, વૈશ્વિક માનવસેવા અને નિર્વ્યસની સમાજ નિર્માણના કાર્યોનું તેમાં ઝીણવટભર્યું દસ્તાવેજીકરણ છે. જુલાઈ ૨૦૧૭થી ઑગસ્ટ ૨૦૨૦ સુધીના સતત ૩૮ મહિનાના ગહન સંશોધન અને લેખન બાદ આ ગ્રંથશ્રેણી તૈયાર થઈ હતી, જેની અત્યાર સુધીમાં ૩,૧૦,૦૦૦ થી વધુ નકલોનું વેચાણ થઈ ચૂક્યું છે. લેખક આદર્શજીવનદાસ સ્વામીએ આ સિદ્ધિ પ્રમુખસ્વામી મહારાજના ચરણોમાં સમર્પિત કરતાં જણાવ્યું કે, આ સન્માન લેખક કરતાં જેમનું ચરિત્ર લખાયું છે તેવા દિવ્ય સંત પ્રમુખસ્વામી મહારાજનું છે. ઉલ્લેખનીય છે કે, ચાલુ વર્ષે ફેબ્રુઆરી ૨૦૨૬માં વડોદરા ખાતે ૧૨,૭૨૩ બાળકોએ એકસાથે મહંતસ્વામી મહારાજ રચિત ‘સત્સંગદીક્ષા’ ગ્રંથના સંસ્કૃત શ્લોકોનું પઠન કરી ‘સૌથી મોટા સામૂહિક ધર્મગ્રંથ પઠન’નો ગિનીસ રેકોર્ડ સ્થાપ્યો હતો, ત્યારબાદ આ વર્ષે બીએપીએસ સંસ્થાના નામે વધુ એક વૈશ્વિક રેકોર્ડ નોંધાયો છે.

BAPSના વિદ્વાન સંત આદર્શજીવનદાસ સ્વામીનું વિરાટ સાહિત્યિક પ્રદાન : મિકેનિકલ એન્જિનિયરિંગ બાદ સંસ્કૃતમાં 2 ડોક્ટરેટઃ 17 પુસ્તક અને 300થી વધુ નાટકનું સર્જન

બી.એ.પી.એસ. (BAPS) સ્વામિનારાયણ સંસ્થાના પ્રખર સંત આદર્શજીવનદાસ સ્વામી (Ph.D.) સંસ્કૃત સાહિત્ય અને આધ્યાત્મિક ક્ષેત્રે અનોખું પ્રદાન આપી રહ્યા છે. પૂર્વે મિકેનિકલ એન્જિનિયરિંગમાં સ્નાતકની પદવી મેળવ્યા બાદ તેમણે સંસ્કૃત વિષયમાં અનુસ્નાતક અભ્યાસ પૂર્ણ કર્યો હતો અને સંસ્કૃતમાં બે ડોક્ટરેટ (Ph.D.) પદવીઓ હાંસલ કરી છે. તેમના પ્રેરક સાહિત્યિક સર્જનમાં ૧૭ સ્વતંત્ર પુસ્તકો, અન્ય ૮ પુસ્તકોનું સહલેખન તેમજ ૩૦૦થી પણ વધુ વિશાળ ફલક ધરાવતા નાટકો અને સંવાદોનો સમાવેશ થાય છે. તેમના લખાણો અને પ્રવચનોમાં ભગવાન સ્વામિનારાયણની ગુરુપરંપરાના પાંચમા ગુરુ પરમ પૂજ્ય પ્રમુખસ્વામી મહારાજ (૧૯૨૧-૨૦૧૬)ના દિવ્ય જીવનચરિત્રની વિશેષ ઝાંખી જોવા મળે છે. બીજાના સુખમાં આપણું સુખ છે એ સૂત્રને જીવનમંત્ર બનાવી પ્રમુખસ્વામી મહારાજે વિશ્વભરમાં ૧૭,૦૦૦થી વધુ ગામડાંઓમાં વિચરણ કરી, ૨.૫૦ લાખથી વધુ ઘરોમાં પધરામણી કરી અને ૭ લાખથી વધુ પત્રોના ઉત્તર આપી માનવસેવાનું વિરાટ કાર્ય કર્યું હતું. અક્ષરધામ સહિત વિશ્વભરમાં ૧૨૦૦થી વધુ ભવ્ય મંદિરોનું સર્જન કરી તેમણે ભારતીય સંસ્કૃતિનો ડંકો વગાડ્યો હતો.