મુખ્યમંત્રી ભૂપેન્દ્ર પટેલે અમદાવાદના કાર્યક્રમમાં ફિલ્મની સત્તાવાર રિલીઝ તારીખ જાહેર કરી
‘મારણ’ ફિલ્મના દિગ્દર્શક અને નિર્માતા અભિષેક જૈન જ્યારે લેખન દિવ્યા મહેન્દ્રભાઈ ઠાકોરેએ કર્યું
- Advertisement -
સતત બીજી વખત મળેલો નેશનલ એવોર્ડ ગુજરાતી ફિલ્મ ઉદ્યોગ માટે ગૌરવની સિદ્ધિ : નાયબ મુખ્યમંત્રી હર્ષ સંઘવી
72મા નેશનલ ફિલ્મ એવોર્ડ્સ-2026માં શ્રેષ્ઠ ગુજરાતી ફીચર ફિલ્મનો એવોર્ડ જીતનારી ગુજરાતી ફિલ્મ ‘મારણ’ (MAARAN) હવે 31 જુલાઈ, 2026ના રોજ રાજ્યભરના સિનેમાઘરોમાં રિલીઝ થશે. ગુજરાતના મુખ્યમંત્રી ભૂપેન્દ્રભાઈ પટેલે અમદાવાદ ખાતે યોજાયેલા કાર્યક્રમમાં ફિલ્મની સત્તાવાર રિલીઝ તારીખ જાહેર કરી હતી. આ પ્રસંગે તેમણે ફિલ્મની સમગ્ર ટીમને શુભેચ્છા પાઠવતાં જણાવ્યું કે તેઓ આ ફિલ્મ ચોક્કસપણે જોવા જશે. મુખ્યમંત્રી ભૂપેન્દ્ર પટેલે જણાવ્યું હતું કે, સામાજિક ચેતનાને સ્પર્શતી અને ગુજરાતી સિનેમાને નવી ઊંચાઈએ પહોંચાડતી આવી ફિલ્મો રાજ્ય માટે ગૌરવની બાબત છે. તેમણે ફિલ્મના નિર્માતાઓ, દિગ્દર્શક અને સમગ્ર ટીમના સર્જનાત્મક પ્રયાસોની પ્રશંસા કરી હતી.
ફિલ્મના દિગ્દર્શક અને નિર્માતા અભિષેક જૈને મુખ્યમંત્રી સમક્ષ આ રાષ્ટ્રીય સન્માન સમગ્ર ગુજરાત રાજ્યને સમર્પિત કરતાં જણાવ્યું હતું કે, ગુજરાતી સિનેમા પ્રત્યે રાજ્ય સરકારનો સતત મળતો સહયોગ ફિલ્મ ઉદ્યોગ માટે પ્રેરણારૂપ છે. તેમણે મુખ્યમંત્રી દ્વારા ફિલ્મની રિલીઝ તારીખ જાહેર કરવાનું ગૌરવપૂર્ણ ક્ષણ ગણાવી સમગ્ર ટીમ તરફથી આભાર વ્યક્ત કર્યો હતો.
- Advertisement -
કાર્યક્રમ દરમિયાન ગુજરાતના નાયબ મુખ્યમંત્રી હર્ષ સંઘવીએ પણ ટીમને અભિનંદન પાઠવતાં જણાવ્યું હતું કે, સતત બીજી વખત મળેલો નેશનલ એવોર્ડ ગુજરાતી ફિલ્મ ઉદ્યોગ માટે ગૌરવની સિદ્ધિ છે. તેમણે ઉમેર્યું કે, ફિલ્મ ઉદ્યોગ અથવા પોલિસી લેવલ પર કોઈ પણ રચનાત્મક સૂચન કે જરૂરિયાત હશે તો રાજ્ય સરકાર તે અંગે સકારાત્મક રીતે વિચાર કરશે અને જરૂરી સહયોગ આપશે.આ ઉપરાંત ગુજરાત સરકારના કેબિનેટ મંત્રી અર્જુન મોઢવાડિયાએ દિગ્દર્શક અભિષેક જૈન સાથે મુલાકાત કરીને ફિલ્મની કથા, તેના શીર્ષક ‘મારણ’ના અર્થ તેમજ ફિલ્મના વિષય અંગે ચર્ચા કરી હતી. તેમણે અભિષેક જૈનનું સન્માન કરીને ફિલ્મની સફળતા માટે શુભેચ્છાઓ પાઠવી હતી.
સિનેમેન પ્રોડક્શન્સના બેનર હેઠળ નિર્મિત ‘મારણ’ને 72મા નેશનલ ફિલ્મ એવોર્ડ્સમાં શ્રેષ્ઠ ગુજરાતી ફીચર ફિલ્મ તરીકે પસંદ કરવામાં આવી છે. ફિલ્મમાં દીક્ષા જોશી, યશ સોની, શ્રુહદ ગોસ્વામી, તર્જની ભડલા, અભિનય બેન્કર, વૈશાખ રાઠોડ, કુકુલ તારમાસ્ટર, પ્રાચી ઠાકર, ધૈર્ય ઠક્કર, દ્રુમા મહેતા, મોર્લી પટેલ અને ગરિમા ભારદ્વાજ સહિતના કલાકારો મુખ્ય ભૂમિકામાં જોવા મળશે.
ફિલ્મનું દિગ્દર્શન અભિષેક જૈને કર્યું છે, જ્યારે લેખન દિવ્યા મહેન્દ્રભાઈ ઠાકોરેએ કર્યું છે. ફિલ્મના નિર્માતાઓ નયન જૈન, અમિત દેસાઈ અને અભિષેક જૈન છે. પ્રતિક પરમાર સિનેમેટોગ્રાફી, નિકી જોશી કોસ્ચ્યુમ ડિઝાઇન, શીલ ઠાકોરે પ્રોડક્શન ડિઝાઇન, અજીત સિંહ રાઠોડ સાઉન્ડ ડિઝાઇન અને આલાપ-પાર્થે સંગીતની જવાબદારી સંભાળી છે. ગુજરાતી સિનેમાને રાષ્ટ્રીય સ્તરે સતત મળી રહેલી સફળતાઓ વચ્ચે ‘મારણ’ હવે 31 જુલાઈએ દર્શકો સમક્ષ આવશે. નેશનલ એવોર્ડથી સન્માનિત આ ફિલ્મ પ્રત્યે ફિલ્મપ્રેમીઓમાં અત્યારથી જ ભારે ઉત્સુકતા જોવા મળી રહી છે.
