ઝગમગતી રોશની વચ્ચે રમતગમત અને મનોરંજનનો ત્રિવેણી સંગમ: લીંબુ-ચમચી, રસ્સા ખેંચ અને મ્યુઝિકલ માહોલમાં પરિવારોએ માણી ખુશીની પળો
રાજકોટ: રાજકોટ શહેરના સુવ્યવસ્થિત અને આધુનિક ઇન્ફ્રાસ્ટ્રક્ચર વિકાસના વધુ એક મહત્વપૂર્ણ સોપાનરૂપે રાજકોટ મહાનગરપાલિકા દ્વારા જામનગર રોડ પર ₹74.32 કરોડના ખર્ચે નવનિર્મિત ઓવરબ્રિજ, જે ‘સાંઢિયા પુલ’ તરીકે લોકપ્રિય છે, તેનું લોકાર્પણ કરવામાં આવનાર છે. ગુજરાત રાજ્યના નાયબ મુખ્યમંત્રી હર્ષ સંઘવીના વરદ્ હસ્તે આજે તા. 13-06-2026 ને શનિવારના રોજ સવારે 10:00 કલાકે આ બ્રિજ જનતા માટે ખુલ્લો મૂકવામાં આવશે. આ ઐતિહાસિક અવસરની પૂર્વસંધ્યાએ ગઇકાલે શુક્રવારે રાત્રે મહાનગરપાલિકા દ્વારા એક યાદગાર ‘Happy Street’ નું આયોજન કરવામાં આવ્યું હતું.
- Advertisement -
સાંઢિયા પુલ પર ‘હેપ્પી સ્ટ્રીટ’ની ધૂમ
નવનિર્મિત સાંઢિયા પુલ અને એરપોર્ટની દિવાલ પાસેના ગાર્ડન ખાતે યોજાયેલા આ કાર્યક્રમમાં વિવિધ વયજૂથના લોકો માટે અનેક આકર્ષક પ્રવૃત્તિઓ રાખવામાં આવી હતી. જેમાં રમતગમત, ફન એક્ટિવિટીઝ, ફિટનેસ કાર્યક્રમો અને મ્યુઝિકલ માહોલનો સમાવેશ થયો હતો. બાળકો, યુવાનો અને વડીલોએ શહેરના વ્યસ્ત જીવનમાંથી વિરામ લઈને પરિવાર અને મિત્રો સાથે આ યાદગાર સાંજ માણી હતી. આ આયોજનનો મુખ્ય હેતુ જાહેર સ્થળોને સામૂહિક આનંદના કેન્દ્ર તરીકે વિકસાવવાનો અને નાગરિકોને શહેરના આધુનિક ઇન્ફ્રાસ્ટ્રક્ચરનો નજીકથી અનુભવ કરાવવાનો હતો.
ઝગમગતી રોશની અને પરંપરાગત રમતોનું આકર્ષણ
નવનિર્મિત બ્રિજ પર કરવામાં આવેલી ભવ્ય અને આકર્ષક લાઈટિંગ શહેરવાસીઓ માટે આકર્ષણનું કેન્દ્ર બની હતી. પ્રકાશથી ઝળહળતા બ્રિજ પર લોકોએ સહેલગાહનો આનંદ માણ્યો હતો. ‘Happy Street’ અંતર્ગત લીંબુ-ચમચી, રસ્સા ખેંચ, કોથળા દોડ, દોરડા કૂદ જેવી પરંપરાગત રમતોની સાથે લૂડો, સાપસીડી, હોપ્સકોચ, પઝલ અને ડ્રોઈંગ એક્ટિવિટી જેવી પ્રવૃત્તિઓમાં લોકો ઉત્સાહભેર જોડાયા હતા. રાજકોટના વિકાસના નવા પ્રતીક સમાન આ બ્રિજ હવે જામનગર રોડ પરના ટ્રાફિકની સમસ્યામાં મોટી રાહત આપશે.
