ખાસ-ખબર ન્યૂઝ નવી દિલ્હી, તા.28
અમેરિકાનું રાષ્ટ્રપતિ ભવન ‘વ્હાઇટ હાઉસ’ જે વૈશ્વિક રાજનીતિ, ઇતિહાસના મોટા નિર્ણયો અને ગંભીર વહીવટી વ્યુહરચનાઓ માટે જાણીતું છે, તે હવે એક અનોખા અને અભૂતપૂર્વ આયોજનનું સાક્ષી બનવા જઈ રહ્યું છે. અમેરિકાના રાષ્ટ્રપતિ ડોનાલ્ડ ટ્રમ્પે વ્હાઇટ હાઉસના સાઉથ લોન (મોટા ગાર્ડન) માં એક વિશાળ અને ભવ્ય કેજ ફાઇટ (પાંજરામાં થતી લડાઈ) નો અખાડો ઊભો કરાવ્યો છે. વ્હાઇટ હાઉસમાં હાલમાં મોટી-મોટી ક્રેનો દ્વારા લોખંડના વિશાળ માળખા અને સ્ટેજ ફિટ કરવાની કામગીરી ચાલી રહી છે, જેને જોઈને આખી દુનિયા આશ્ચર્યચકિત થઈ ગઈ છે. આ તમામ ભવ્ય તૈયારીઓ આગામી 14 જૂને યોજાનારી પ્રખ્યાત યુએફસી (ઞઋઈ) ઇવેન્ટ માટે કરવામાં આવી રહી છે, જે સંયોગથી ડોનાલ્ડ ટ્રમ્પનો 80મો જન્મદિવસ પણ છે. ઇતિહાસના રાજા-મહારાજાઓની જેમ પોતાના જન્મદિવસ પર પહેલવાનોની કુસ્તી કરાવીને આનંદ લેવાની શૈલીમાં ટ્રમ્પ આ આખી ઇવેન્ટ પાછળ 6 કરોડ ડોલર એટલે કે ભારતીય ચલણ મુજબ આશરે 575 કરોડ રૂપિયાનો ધૂમ ખર્ચ કરવા જઈ રહ્યા છે.આ ભવ્ય ઇવેન્ટનું સત્તાવાર નામ ઞઋઈ ફ્રીડમ 250 રાખવામાં આવ્યું છે, જેને ટ્રમ્પે અમેરિકાની સ્થાપનાની 250મી વર્ષગાંઠની ઉજવણી સાથે જોડી દીધું છે. આગામી 14 જૂને યોજાનારી આ ઇવેન્ટમાં કુલ છ મુખ્ય મુકાબલા થશે, જેમાં લાઇટવેઇટ ચેમ્પિયનશિપ માટે ઇલિયા ટોપુરિયા અને જસ્ટિન ગેથજે સામસામે ટકરાશે. ઐતિહાસિક સ્થળે થનારા આ કરોડોના ખર્ચ અંગે વ્હાઇટ હાઉસના અધિકારીએ સ્પષ્ટતા કરી છે કે, આ ઇવેન્ટનો સંપૂર્ણ આર્થિક ખર્ચ ઞઋઈની પેરેન્ટ કંપની ઉઠાવી રહી છે અને તેમાં અમેરિકાના કરદાતાઓનો એક પણ ડોલર વાપરવામાં આવી રહ્યો નથી. જોકે, આ ભવ્ય જલસાનો અમેરિકામાં જ ભારે વિરોધ પણ શરૂ થયો છે. વિવેચકોનું કહેવું છે કે, આ વૈભવી આયોજન એવા સમયે થઈ રહ્યું છે જ્યારે અમેરિકા આંતરરાષ્ટ્રીય સ્તરે ઈરાન સાથેના ગંભીર યુદ્ધમાં ફસાયેલું છે. યુદ્ધના કારણે દેશમાં ઓઈલના ભાવ આસમાને પહોંચ્યા છે અને સામાન્ય અમેરિકનો મોંઘવારીના કારણે રહેવા-ખાવાના ખર્ચમાં પીસાઈ રહ્યા છે. આ પૂર્વે પણ ટ્રમ્પે વ્હાઇટ હાઉસના પ્રખ્યાત રોઝ ગાર્ડનનું ઐતિહાસિક ઘાસ હટાવી દીધું હતું અને 40 કરોડ ડોલરનો નવો બોલરૂમ બનાવવા માટે આખી ઇસ્ટ વિંગ તોડી પાડી હતી, જેને લઈને ભારે વિવાદ સર્જાયો હતો.
- Advertisement -
આ પૃથ્વી પરનો સૌથી મોટો શો હશે: ટ્રમ્પ
તાજેતરમાં ઓવલ ઓફિસમાં યોજાયેલા એક કાર્યક્રમ દરમિયાન ટ્રમ્પે આ ઇવેન્ટમાં ભાગ લેનારા ચાર ફાઇટર્સની હાજરીમાં પ્રોમો લોન્ચ કરતા ગર્વભેર કહ્યું હતું કે, અમે વ્હાઇટ હાઉસમાં એક ખૂબ જ મોટી ફાઇટ કરાવવા જઈ રહ્યા છીએ. આવું વિશ્વના ઇતિહાસમાં પહેલા ક્યારેય થયું નથી, અને કદાચ ભવિષ્યમાં ફરી ક્યારેય નહીં થાય. આ પૃથ્વી પરનો સૌથી મોટો શો સાબિત થશે. ટ્રમ્પે આઠ ખૂણાવાળી લોખંડની જાળી વાળી ફાઇટિંગ રિંગ ઓક્ટેગનની ઓફિશિયલ તસવીરો પણ મીડિયાને બતાવી હતી, જેના બેકગ્રાઉન્ડમાં વ્હાઇટ હાઉસનો મુખ્ય દરવાજો ભવ્ય રીતે દેખાશે. આ અખાડામાં આશરે 4,500 વીઆઈપી લોકો લોનમાં બેસીને સીધી મેચ નિહાળી શકશે, જ્યારે સામાન્ય જનતા માટે વ્હાઇટ હાઉસની બહાર જાયન્ટ સ્ક્રીન લગાવવામાં આવશે, જ્યાં 1 લાખથી વધુ લોકો આ મુકાબલો મફતમાં જોઈ શકશે.
