રાજકોટ સ્કૂલ વાન એસોસિએશને ભાડાંમાં 10% વધારો જાહેર કર્યો
આ વધારો નહીં, ખુલ્લી લૂંટ છે, પહેલાં વેકેશનનું ભાડું પરત આપો: વાલીઓ
- Advertisement -
ખાસ-ખબર ન્યૂઝ રાજકોટ
રાજકોટ શહેરમાં સતત વધી રહેલી મોંઘવારી વચ્ચે હવે શિક્ષણ સાથે જોડાયેલા ખર્ચમાં વધુ એક વધારો થવા જઈ રહ્યો છે. પેટ્રોલ, ડીઝલ અને સીએનજીના સતત વધી રહેલા ભાવોને કારણ દર્શાવી રાજકોટ સ્કૂલ વાન એસોસિએશને આગામી 8 જૂનથી શરૂ થનારા નવા શૈક્ષણિક સત્રથી સ્કૂલ વાન અને રિક્ષાના ભાડામાં 10 ટકા વધારો કરવાની જાહેરાત કરી છે. આ નિર્ણય સામે શહેરના વાલીઓમાં ભારે રોષ જોવા મળી રહ્યો છે અને વેકેશનનું ભાડું પરત આપો તેવી માંગ પણ ઉઠવા લાગી છે.
વાલીઓનું કહેવું છે કે દર વર્ષે ઉનાળાના વેકેશન દરમિયાન બે મહિનાની સ્કૂલ બંધ હોવા છતાં વાન અને રિક્ષા ચાલકો દ્વારા નિયમિત ભાડું વસૂલવામાં આવે છે. હવે જ્યારે ફરીથી ભાડામાં વધારો કરવામાં આવી રહ્યો છે ત્યારે વાલીઓ આ નિર્ણયને અન્યાયી ગણાવી રહ્યા છે. અનેક વાલીઓએ માગ કરી છે કે વેકેશન દરમિયાન વસૂલવામાં આવેલી રકમમાં જ આ વધારો સમાવી લેવો જોઈએ અને વધારાનો સીધો બોજ વાલીઓ પર નાંખવો યોગ્ય નથી.
વાલીઓમાં આ નિર્ણયને લઈને ભારે નારાજગી જોવા મળી રહી છે. પહેલેથી જ શાળા ફી, પુસ્તકો, યુનિફોર્મ, સ્ટેશનરી અને અન્ય શૈક્ષણિક ખર્ચમાં વધારો સહન કરી રહેલા મધ્યમવર્ગીય પરિવારો માટે હવે વાહન ભાડાનો વધારેલો બોજ વધુ મુશ્કેલી ઊભી કરશે તેવી ચર્ચા છે. અનેક પરિવારોનું કહેવું છે કે દર વર્ષે નવા સત્ર પહેલાં શિક્ષણ સંબંધિત ખર્ચ એટલો વધી જાય છે કે ઘરનું માસિક બજેટ ખોરવાઈ જાય છે. નવા શૈક્ષણિક સત્ર પહેલાં જ ઉભા થયેલા આ વિવાદને કારણે હવે અનેક વાલીઓ પોતાના બાળકો માટે વૈકલ્પિક પરિવહન વ્યવસ્થા અંગે વિચારણા કરી રહ્યા છે. કેટલાક વાલીઓ ખાનગી વાહન કે કારપૂલિંગ તરફ વળવાની તૈયારી કરી રહ્યા છે, જ્યારે કેટલાકે આ મુદ્દે સંકલિત વિરોધ કરવાની પણ ચર્ચા શરૂ કરી છે.
રાજકોટમાં સ્કૂલ વાન-રિક્ષા ભાડું અને વિદ્યાર્થીઓ
- Advertisement -
4500 સ્કૂલ વાન અને રિક્ષાની સંખ્યા
45000 વિદ્યાર્થીઓની સંખ્યા
260 રાજકોટ સ્કૂલ વાન એસોસિએશનના સભ્યો
1150 રિક્ષાનું માસિક ભાડું રૂ.1000 જે હવે વધીને રૂ.1150 સુધી પહોંચશે
1400 સ્કૂલ વાનનું માસિક ભાડું રૂ.1200 જે વધીને રૂ.1400 સુધી પહોંચશે
ઇંધણના ભાવમાં સતત વધારાના કારણે નિર્ણય લેવાયો : એસો.
રાજકોટમાં હાલ અંદાજે 4500 જેટલી સ્કૂલ વાન અને રિક્ષાઓ વિદ્યાર્થીઓની હેરફેર માટે કાર્યરત છે. એસોસિએશનના નિર્ણય બાદ હવે અન્ય ખાનગી વાહનચાલકો પણ સત્તાવાર રીતે ભાડા વધારાની જાહેરાત કરે તેવી શક્યતા વ્યક્ત થઈ રહી છે. પરિણામે નવા શૈક્ષણિક સત્રની શરૂઆત સાથે જ વાલીઓ માટે શિક્ષણ ખર્ચમાં વધુ વધારો જોવા મળશે. સ્કૂલ વાન એસોસિએશનના સભ્યોનું કહેવું છે કે છેલ્લા કેટલાક સમયથી ઇંધણના ભાવમાં સતત વધારો થઈ રહ્યો છે. સાથે જ વાહનોના મેન્ટેનન્સ, ઇન્સ્યોરન્સ, સ્પેર પાર્ટ્સ અને ડ્રાઈવરોના ખર્ચમાં પણ વધારો નોંધાયો હોવાથી ભાડા વધારવાનો નિર્ણય લેવો અનિવાર્ય બન્યો છે. એસોસિએશનનો દાવો છે કે લાંબા સમયથી ભાડામાં કોઈ વધારો કરવામાં આવ્યો નહોતો, જ્યારે ખર્ચ સતત વધી રહ્યો હતો. આ કારણથી રાજકોટ સ્કૂલ વાન એસોસિએશન દ્વારા સ્કૂલ વાન-રિક્ષાના ભાડામાં 10% વધારો જાહેર કરવામાં આવ્યો છે.
વેકેશનની વસૂલાતમાં જ વધારો સમાવી લો : વાલીઓની માગ
રાજકોટમાં નવા શૈક્ષણિક સત્ર પૂર્વે સ્કૂલ વાન અને રિક્ષાના ભાડામાં જાહેર કરાયેલા 10 ટકા વધારાને લઈને વાલીઓમાં ભારે નારાજગી જોવા મળી રહી છે. વાલીઓનું કહેવું છે કે સ્કૂલ વાન અને રિક્ષા ચાલકો દર વર્ષે ઉનાળાના વેકેશનના બે મહિનામાં વિદ્યાર્થીઓને સેવા આપવામાં આવતી ન હોવા છતાં સંપૂર્ણ ભાડું વસૂલ કરે છે. આવા સંજોગોમાં હવે ફરીથી 10 ટકા ભાડા વધારો કરવો અન્યાયી હોવાનું વાલીઓ જણાવી રહ્યા છે. અનેક વાલીઓએ માગ ઉઠાવી છે કે વેકેશન દરમિયાન વસૂલાત થતી ફીમાં જ આ વધારો સરભર કરવો જોઈએ અને વધારાનો સીધો બોજ વાલીઓ પર નાંખવો ન જોઈએ. વાલીઓમાં એવી પણ ચર્ચા છે કે ઘણા વાહનચાલકો વર્ષ દરમિયાન પહેલેથી જ વધારાના ચાર્જિસ, વાર્ષિક ફી અને વેકેશન ફી વસૂલતા હોય છે. ત્યારે હવે ફરીથી ઇંધણના ભાવને કારણ બતાવી વધારાનો નિર્ણય લેવાતા મધ્યમવર્ગીય પરિવારોનું માસિક બજેટ ખોરવાઈ જશે.
