રવિ રાઠોડે 24 કલાકમાં 651 લોકોના હેર કટ કરી સર્જ્યો ગિનીસ વર્લ્ડ રેકોર્ડ

રાજકોટના 38 વર્ષીય યુવાને વિશ્ર્વમાં વગાડ્યો ડંકો

દક્ષિણ આફ્રિકાના યુવાનનો 543 હેર કટનો રેકોર્ડ તોડી રવિ રાઠોડે ઇતિહાસ રચ્યો 

નાની કેબિનથી ધંધો શરૂ કરનાર રવિ રાઠોડ અત્યારે ‘છઉ સલૂન એન્ડ એકેડેમી’ નામે મોટું ફેમિલી સલૂન ચલાવે છે

રાજકોટમાં તા.20 મીએ સવારે 6 વાગ્યાથી શરૂ થયેલું અભિયાન 21મીએ સવારે 6 વાગ્યે પૂર્ણ થયું

ખાસ-ખબર ન્યૂઝ રાજકોટ

“અડગ મનના માનવીને હિમાલય પણ નડતો નથી” આ કહેવતને રાજકોટના 38 વર્ષીય યુવાન રવિભાઈ મણિલાલ રાઠોડે અક્ષરશ: સાર્થક કરી બતાવી છે. છેલ્લા 21 વર્ષથી હેર આર્ટના વ્યવસાય સાથે જોડાયેલા રવિભાઈએ સતત 24 કલાક સુધી નોન-સ્ટોપ 651 લોકોના હેર કટ કરીને ગિનીસ બુક ઓફ વર્લ્ડ રેકોર્ડમાં પોતાનું નામ નોંધાવી સમગ્ર દેશ અને વિશ્ર્વમાં રાજકોટ સહિત ગુજરાતનું નામ ગૌરવવંતું કર્યું છે. આ અગાઉ વર્ષ 2024માં દક્ષિણ આફ્રિકાના આન્દ્રે ગ્રોઇનવલ્ડ નામના યુવાને 24 કલાકમાં 543 લોકોના હેર કટ કરીને વર્લ્ડ રેકોર્ડ બનાવ્યો હતો, જે પડકારને ઝીલીને રવિભાઈએ નવો કીર્તિમાન સ્થાપિત કર્યો છે. રાજકોટના કાલાવડ રોડ સ્થિત હોટલ ખઝટ ખાતે ગત તા. 20 મેના રોજ સવારે 6 વાગ્યાથી શરૂ થયેલું આ મહાઅભિયાન બીજા દિવસે એટલે કે તા. 21 મેના રોજ સવારે
6 વાગ્યે પૂર્ણ થયું હતું, જેમાં તેમણે સરેરાશ માત્ર 1થી 2 મિનિટના સમયગાળામાં એક હેર કટ કરીને આ અશક્ય લાગતો ટાર્ગેટ પૂરો કર્યો હતો.
આ વર્લ્ડ રેકોર્ડ માટે ગિનીસ બુકની ટીમના કડક નિયમોનું પાલન કરીને સમગ્ર ઇવેન્ટનું લાઈવ વિડીયો રેકોર્ડિંગ કરાયું હતું, જેમાં હેર કટ કરાવનાર પ્રત્યેક વ્યક્તિનું ફોર્મ ભરીને કટિંગ પહેલાં અને કટિંગ પછીની વાળની લંબાઈ માપીને ‘બીફોર-આફ્ટર’ ના ફોટોગ્રાફ્સ સાથેના તમામ પુરાવા ગિનીસ બુકની ટીમને સોંપવામાં આવ્યા છે અને આ સફળતામાં તેમને પોતાની ‘છઉ સલૂન’ના 10 સભ્યોના સ્ટાફ અને મિત્ર વર્તુળનો સંપૂર્ણ સહયોગ સાંપડ્યો હતો. ધોરણ 12 પાસ કર્યા બાદ આર્થિક સંકડામણ વચ્ચે સાયકલ લઈને 7 કિલોમીટર દૂર એક નાની કેબિનથી સફર શરૂ કરનાર રવિભાઈ આજે રૈયા ટેલિફોન એક્સચેન્જ સામે ‘છઉ સલૂન એન્ડ એકેડેમી’ નામે મોટું ફેમિલી સલૂન ચલાવે છે. વાળંદ સમાજનું ગૌરવ વધારતા રવિભાઈએ જણાવ્યું હતું કે, અગાઉ આ કામને નાનું ગણાતું પણ હવે દરેક સમાજના યુવાનો પ્રોફેશનલ હેર આર્ટિસ્ટ બનવા આંતરરાષ્ટ્રીય સ્તરના કોર્સ કરે છે, જેથી તેમનું આગામી સપનું રાજકોટમાં જ એક આધુનિક એકેડેમી શરૂ કરવાનું છે જેથી સૌરાષ્ટ્રના યુવાનોને આ કળા શીખવા મુંબઈ-દિલ્હી સુધી ધક્કા ન ખાવા પડે. આ અનોખી વૈશ્વિક સિદ્ધિ બદલ રવિભાઈ રાઠોડ પર હાલ પરિવાર અને સ્નેહીજનો તરફથી શુભેચ્છાઓનો અવિરત વરસાદ થઈ રહ્યો છે.
રવિભાઈએ કહ્યું કે, અગાઉના સમયમાં સોરક્રિયાએ નાનું કામ માનવામાં આવતું હતું પરંતુ આજે માત્ર વાળંદ સમાજ જ નહિ પરંતુ દરેક સમાજના યુવાનો હેર આર્ટિસ્ટ બનવા માંગતા હોય છે અને આ માટે મેગા તેમજ મેટ્રો સિટીમાં ક્લાસીસ પણ કરતા હોય છે. હું એક વાળંદ સમાજમાંથી આવતો હોવાથી મને મારી જ્ઞાતિનું ગૌરવ છે અને મારા કામ પ્રયતે ધગસ પણ છે. પહેલાના સમયમાં એટલું વળતર ન મળતું પરંતુ હવે કોઈ જ્ઞાતિ બાદ નથી દરેક સમાજના લોકો હેર આર્ટિસ્ટ બની રહ્યા છે સ્પેશિયલ કોર્સ કરી રહ્યા છે. અમદાવાદ મુંબઈ દિલ્લી અને વિદેશોમાં પણ હેર કટિંગ માટેના કોર્સ ચાલુ કરવામાં આવ્યા છે અને હવે આગામી ટૂંક સમયમાં રાજકોટમાં સારું એકેડેમીક શરૂ કરવા મારી ઈચ્છા છે જેથી સૌરાષ્ટ્રભરના યુવાનોને દિલ્લી મુંબઈ સુધી આ કલા શીખવા ધક્કો ન ખાવો પડે.

સાયકલથી સલૂન સામ્રાજ્ય સુધીની પ્રેરણાદાયી સફર

ધોરણ 12 પાસ કર્યા બાદ આર્થિક સંકડામણ વચ્ચે રવિભાઈએ પોતાની સફર એક નાની કેબિનથી શરૂ કરી હતી. ઘરથી 7 કિલોમીટર દૂર સાયકલ ચલાવીને તેઓ દરરોજ કેબિન પર જતા હતા. રવિભાઈએ જણાવ્યું હતું કે, “કોઈ કામ નાનું નથી હોતું, બસ મહેનત અને ધગશ હોવી જોઈએ.” અથાગ પરિશ્રમથી કેબિનમાંથી ભાડાની દુકાન, ત્યારબાદ પોતાની દુકાન ખરીદી અને આજે તેઓ રૈયા ટેલિફોન એક્સચેન્જ સામે ‘છઉ સલૂન એન્ડ એકેડેમી’ નામે મોટું ફેમિલી સલૂન ચલાવે છે.